ગુજરાતના 18 તાલુકાઓમાં વરસાદી માહોલ, અમરેલીમાં વરસ્યો સૌથી વધુ વરસાદ

છેલ્લા 24 કલાક દરમિયાન રાજ્યના 18 તાલુકાઓમાં વરસાદ નોંધાયો છે. તેમાં સૌથી વધુ અમરેલી જિલ્લામાં 3.25 ઈંચ વરસાદ નોંધાયો છે. આ ઉપરાંત, મેંદરડામાં 1.75 ઈંચ, લાઠીમાં 1.5 ઈંચ, માંગરોળમાં 1.5 ઈંચ, જ્યારે પાટણ અને વેરાવળમાં 1 ઈંચ જેટલો વરસાદ પડ્યો છે.

માળિયા હાટીનામાં 0.75 ઈંચ, લીમખેડામાં 5 મીમી, વંથલીમાં 6 મીમી, ગઢડામાં 4 મીમી, બગસરા અને ડાંગના આહવામાં 3-3 મીમી વરસાદ થયો છે. નવસારી શહેરના અનેક વિસ્તારો જેમ કે, મંકોડિયા, ઈટાડવા, સ્ટેશન રોડ પર પણ વરસાદી માહોલ રહ્યો હતો.

આ કમોસમી વરસાદને કારણે ખેડૂતોમાં ચિંતાનું વાતાવરણ છે. કેરી અને ચીકુ જેવા ફળના પાકને નુકસાન થવાની ભીતિ સેવાઈ રહી છે. ડાંગરના પાક પર પણ આ વરસાદનો પ્રભાવ પડી શકે છે.