ગુજરાતમાં ફરી માવઠું 29 માર્ચથી વરસાદની આગાહી

ગુજરાતના વાતાવરણમાં ફરી એકવાર મોટા ઉલટફેરના સંકેતો મળી રહ્યા છે. હવામાન વિભાગની તાજી આગાહી અનુસાર, રાજ્ય પર ફરી એકવાર કમોસમી વરસાદ એટલે કે માવઠાનું સંકટ તોળાઈ રહ્યું છે. આગામી 29 માર્ચથી વેસ્ટર્ન ડિસ્ટર્બન્સની અસરને કારણે રાજ્યભરમાં સાર્વત્રિક વરસાદી માહોલ જામવાની શક્યતા છે. આ બદલાયેલા હવામાનને કારણે ખેડૂતોમાં ફરી ચિંતાના વાદળો છવાયા છે.

બે સિસ્ટમ ભેગી થતા સર્જાશે વરસાદી માહોલ : 

હવામાન નિષ્ણાતોના મતે, હાલમાં બે વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનના કારણે ભારત પર એક મજબૂત સિસ્ટમ બની રહી છે. ઇરાન, ઓમાન, પાકિસ્તાન અને અફઘાનિસ્તાન થઈને આ સિસ્ટમ હવે ભારત તરફ આગળ વધી રહી છે, જેની સીધી અસર ગુજરાતના હવામાન પર જોવા મળશે. 27 માર્ચ બાદ રાજ્યમાં ગાજવીજ સાથે વરસાદ શરૂ થવાની સંભાવના છે, જે 29 થી 31 માર્ચ દરમિયાન તેની પીક પર હોઈ શકે છે. આ દરમિયાન પવનની ગતિ પણ સામાન્ય કરતા વધુ રહેવાની શક્યતા છે.

કયા જિલ્લાઓમાં માવઠાની સૌથી વધુ અસર થશે ?

હવામાન વિભાગના જણાવ્યા અનુસાર, વરસાદની શરૂઆત સૌથી પહેલા સૌરાષ્ટ્ર અને કચ્છના વિસ્તારોમાંથી થશે. ત્યારબાદ તેની અસર રાજ્યના અન્ય ભાગોમાં ફેલાશે:

સૌરાષ્ટ્ર અને કચ્છ: દ્વારકા, જામનગર, પોરબંદર, રાજકોટ, સુરેન્દ્રનગર, જૂનાગઢ, ગીર સોમનાથ, અમરેલી, ભાવનગર અને બોટાદ.

ઉત્તર અને મધ્ય ગુજરાત: બનાસકાંઠા (વાવ, થરાદ), અમદાવાદ, ગાંધીનગર અને અરવલ્લી.

દક્ષિણ અને પૂર્વ ગુજરાત: નવસારી, ડાંગ, ભરૂચ, છોટાઉદેપુર, વડોદરા, પંચમહાલ અને દાહોદ.

આ તમામ વિસ્તારોમાં છૂટછવાયા સ્થળોએ ગાજવીજ સાથે હળવાથી મધ્યમ વરસાદની આગાહી કરવામાં આવી છે.

ખેતી અને તાપમાન પર શું થશે અસર ?

આ કમોસમી વરસાદના કારણે ખેડૂતોની મુશ્કેલીમાં વધારો થઈ શકે છે. ખાસ કરીને શિયાળુ પાક જે હવે તૈયાર થઈને લણણીના આરે છે, તેને નુકસાન થવાની ભીતિ છે. સૌથી વધુ ચિંતા બાગાયતી ખેતી કરતા ખેડૂતોને, ખાસ કરીને આંબાના બગીચા ધરાવતા માલિકોને છે. કેરીનો પાક અત્યારે તૈયાર થવાના તબક્કે છે, અને આ સમયે વરસાદ પડે તો પાક બગડવાની પૂરેપૂરી શક્યતા છે.

બીજી તરફ, વાતાવરણમાં આવેલા પલટા અને વાદળછાયા આકાશને કારણે ગરમીમાં નોંધપાત્ર ઘટાડો થશે. લોકો અત્યારે કાળઝાળ ગરમીથી રાહત અનુભવી રહ્યા છે અને આગામી 4 એપ્રિલ સુધી તાપમાનનો પારો નીચો રહેવાનું અનુમાન છે.

4 એપ્રિલ સુધી વાતાવરણ રહેશે ડામાડોળ : 

હવામાન વિભાગના મોડલ્સ મુજબ અરબી સમુદ્ર પરથી સતત ભેજવાળા પવન અને વાદળો ગુજરાત તરફ આવી રહ્યા છે. આ સ્થિતિ 4 એપ્રિલ સુધી યથાવત રહી શકે છે. જો આ સિસ્ટમ વધુ મજબૂત બનશે તો માવઠાનું પ્રમાણ વધી શકે છે, અને જો નબળી પડશે તો માત્ર વાદળછાયું વાતાવરણ અને છૂટછવાયા ઝાપટા જોવા મળશે. હાલના આંકલન મુજબ 28 થી 30 માર્ચ દરમિયાન વરસાદની શક્યતા સૌથી પ્રબળ દેખાઈ રહી છે.