દક્ષિણ અને મધ્ય ગુજરાતમાં વરસાદી એન્ટ્રી, 7 જૂનથી મેઘમહેર, માછીમારોને દરિયો ન ખેડવા આપી ચેતવણી

ગુજરાતમાં છેલ્લા ઘણા દિવસોથી વરસાદે વિરામ લીધો હતો, પરંતુ હવે ફરીથી મેઘરાજા પોતાનું આગમન નોંધાવવાની તૈયારીમાં છે. હવામાન વિભાગ દ્વારા જણાવાયું છે કે, 7 જૂન, શનિવારથી રાજ્યના અનેક જિલ્લાઓમાં હળવાથી મધ્યમ દરજ્જે વરસાદ પડી શકે છે. પવનની દિશા દક્ષિણ પશ્ચિમથી પશ્ચિમ તરફની રહેશે અને ભેજ વધી જવાથી છૂટાછવાયો વરસાદ શરૂ થઈ શકે છે.

ક્યા ક્યા જિલ્લાઓમાં વરસાદની આગાહી છે?

હવામાન વિભાગના જણાવ્યા અનુસાર, દાહોદ, પંચમહાલ, વડોદરા, છોટાઉદેપુર, ભરુચ, નર્મદા, સુરત, તાપી, નવસારી, ડાંગ, વલસાડ, દમણ, દાદરા નગર હવેલી, જૂનાગઢ, ગીર સોમનાથ, પોરબંદર, દીવ, રાજકોટ, અમરેલી, બોટાદ, ભાવનગર નીચેના જિલ્લાઓમાં વરસાદ પડવાની સંભાવના છે.

આ અઠવાડિયું કેવી રીતે રહેશે?

હવામાન વિભાગના અનુમાન મુજબ, આગામી 7 દિવસોમાં રાજ્યભરમાં હળવાથી મધ્યમ વરસાદની અસર જોવા મળશે. દક્ષિણ ગુજરાતમાં ખાસ કરીને વધુ વરસાદની શક્યતા છે, જ્યારે મધ્ય અને ઉત્તર ગુજરાતમાં પણ છૂટાછવાયો વરસાદ પડી શકે છે. સૌરાષ્ટ્ર અને કચ્છના દરિયાકાંઠે પણ વરસાદની આગાહી કરવામાં આવી છે.