સાબરકાંઠાના પ્રાંતિજ પાસે ખાનગી બસ ભડભડ સળગી, 36 મુસાફરોનો બચાવ

સાબરકાંઠા જિલ્લાના પ્રાંતિજ પાસે લગ્નના જાનૈયાઓને લઇ જઇ રહેલી ખાનગી બસમાં વિકરાળ આગ ફાટી નીકળતા સૌના જીવ પડીકે બંધાઇ ગયા હતા. જો કે સમયસર તમામ 36  મુસાફરો ઉતરી જતાં તમામનો બચાવ થયો હતો. ફાયર બ્રિગેડે તત્કાળ સ્થળ પર પહોંચીને આગ બુઝાવી દીધી હતી.

મળેલી માહિતી મુજબ પ્રાંતિજ પાસે કતપુર ટોલપ્લાઝા પાસે સુરથી ઉદયપુર જઇ રહેલી ખાનગી લકઝરી બસમાં અચાનક જ આગ જોવા મળી હતી જેથી મુસાફરોમાં અફરાતફરી મચી ગઇ હતી. તમામ 36 મુસાફરોમાં ભારે ગભરાટ ફેલાઇ ગયો હતો અને તમામ મુસાફરો સમયસર ઉતરી ગયા હતા. 

આ અંગે તત્કાળ ફાયર બ્રિગેડને જાણ કરાતા લાશ્કરો તુરત જ સ્થળ પર પહોંચ્યા હતા અને સતત પાણીનો મારો ચલાવીને આગને બુઝાવી દીધીલ હતી પણ પળવારમાં લાગેલી આગ સમગ્ર બસમાં ફેલાઇ જતાં બસ સંપૂર્ણપણે બળીને ખાખ થઇ ગઇ હતી. 

પોલીસ તપાસમાં જણાયું કે ડેસ્ટીનેશન વેડિંગ માટે સુરતથી જાનૈયાઓ ઉદયપુર જઇ રહ્યા હતા અને ત્યારે રસ્તામાં બનાવ બન્યો હતો. બસની આગમાં મુસાફરોનો કિંમતી સામાન સહિતની ચીજો બળીને ખાખ થઇ ગઇ હોવાનું અનુમાન છે.