Porbandar : સૂરજ પેલેસથી સાયબર ફ્રોડનું નેટવર્ક, હિરલબા જાડેજાના કાળા કરતૂતોનો પર્દાફાશ

પોરબંદર (Porbandar)માં ₹70 લાખની લેતીદેતી પ્રશ્ને ત્રણ લોકોને ગોંધી રાખી માર મારવાના ગુનામાં જૂનાગઢ જેલમાં બંધ હિરલબા જાડેજા સામે સાયબર ક્રાઇમનો વધુ એક ગંભીર ગુનો દાખલ થતાં ભારે ચકચાર મચી ગઈ છે. પોલીસ તપાસમાં ચોંકાવનારો ખુલાસો થયો છે કે, સાયબર ફ્રોડ દ્વારા અલગ-અલગ રાજ્યોના ભોગ બનેલા વ્યક્તિઓ પાસેથી છેતરપિંડીથી પડાવેલા ₹35.70 લાખનું ટ્રાન્ઝેક્શન હિરલબાના નજીકના બેન્ક ખાતાઓમાં કરાવવામાં આવ્યું હતું.

મુખ્ય આરોપી હિરલબા જાડેજા અને સાથીદારો...

આ કેસમાં સાયબર ક્રાઇમ પોલીસ સ્ટેશનના સબ ઇન્સ્પેક્ટર વી.આર. ચાવડાએ જાતે ફરિયાદી બનીને ગુનો નોંધ્યો છે. ફરિયાદ મુજબ, હિરલબા જાડેજા તથા તેના માણસો હિતેશ ભીમા ઓડેદરા, પાર્થ સોંગેલા, મોહન રણછોડ વાજા, અજય મનસુખ ચૌહાણ અને હિરલબાના ડ્રાઇવર રાજુ મેર સામે IPC કલમ 120(બી), 411, 413, 420, તથા આઇ.ટી. એક્ટ-2000 ની કલમ 66, 66(ડી) હેઠળ કાર્યવાહી કરવામાં આવી છે. આ આરોપીઓ પર અન્ય લોકોના બેન્ક ખાતાનો ખોટી રીતે ઉપયોગ કરી, તેમના સહી કરેલા ચેક મેળવી, ખાતામાંથી રૂપિયા ઉપાડી અને તેને સગેવગે કરવાનો આરોપ છે.

કોટક મહિન્દ્રા બેન્કના શંકાસ્પદ ખાતા અને સૂરજ પેલેસ કનેક્શન...

પોરબંદર (Porbandar) સાયબર ક્રાઇમ પોલીસને પાંચેક મહિના પહેલાં મળેલી જાણવાજોગ માહિતી અને સમન્વય પોર્ટલ પરની તપાસ દરમિયાન, જિલ્લામાં સાયબર ક્રાઇમમાં ઉપયોગમાં લેવાતા હોય તેવા શંકાસ્પદ બેન્ક ખાતાઓની વિગતો મળી હતી. જેમાં પોરબંદર (Porbandar)ના એમ.જી. રોડ પર આવેલી કોટક મહિન્દ્રા બેન્કના 14 જેટલા શંકાસ્પદ ખાતાનો સમાવેશ થતો હતો. પ્રાથમિક તપાસમાં, તે પૈકી પાંચ જેટલા ખાતામાં અલગ-અલગ રાજ્યોમાં નોંધાયેલા સાયબર ક્રાઇમના ગુના દ્વારા છેતરપિંડીથી મેળવેલા ₹35.70 લાખનું ટ્રાન્ઝેક્શન થયું હોવાનું બહાર આવ્યું.

વધુ તપાસમાં, કુલ સાત જેટલી ફરિયાદો જોતા, અલગ-અલગ રાજ્યોના ભોગ બનેલા વ્યક્તિઓ સાથે સાયબર પોલીસ અને ટેલિકોમ રેગ્યુલેટરી ઓથોરિટી તરીકેની ખોટી ઓળખ ઉભી કરી, તેમજ ઓનલાઇન જોબ અને ઇન્વેસ્ટમેન્ટની લોભામણી જાહેરાતો આપીને છેતરપિંડી આચરવામાં આવી હતી. આનાથી લોકોમાં ભય અને લાલચ ઉભી કરીને ભોગ બનેલાના એકાઉન્ટમાંથી આ પાંચ બેન્ક ખાતામાં ₹35.70 લાખ ટ્રાન્સફર કરાવવામાં આવ્યા હતા. આ 14 બેન્ક ખાતા ટૂંકાગાળામાં ખોલવામાં આવ્યા હતા અને તેમાંથી 10 જેટલા ખાતાનું સરનામું એકસરખું જ "સૂરજ પેલેસ, ઝવેરી બંગલો, વીરસાવરકર માર્ગ" હોવાનું બહાર આવ્યું, જે હિરલબા જાડેજાનું નિવાસસ્થાન છે.

બેન્ક કર્મચારીનું નિવેદન અને નાણાકીય હેરાફેરી...

કોટક મહિન્દ્રા બેન્કના પોરબંદર (Porbandar) શાખાના ઓપરેશન મેનેજર ચેતનભાઈ ખાણધરે પોલીસને આપેલા નિવેદનમાં જણાવ્યું કે, 28-5-24 ના રોજ હિરલબા જાડેજાએ તેમને ફોન કરીને ઘરે બોલાવ્યા હતા. ત્યાં આઠ-દસ જેટલા ગ્રાહકો હાજર હતા અને પાંચ લોકોના ડોક્યુમેન્ટ બરાબર હોવાથી તેમના બચત ખાતા ખોલવામાં આવ્યા. હિરલબા જાડેજાના કહેવાથી તમામ ગ્રાહકોનું કોમ્યુનિકેશન એડ્રેસ સૂરજ પેલેસ દર્શાવેલું હતું. ત્યારબાદ, 30-5-24 થી 7-6-24 સુધીમાં વધુ નવ ખાતા ખોલવામાં આવ્યા. બેન્કના 14 ખાતા ખોલાવ્યા બાદ હિરલબા જાડેજા અવારનવાર ફોન કરીને ખાતામાં રૂપિયાની પૂછપરછ કરતા અને તેમના માણસો કેશ વિથડ્રોલ માટે બેન્કે આવતા.

પોલીસે ખાતાધારકોની પૂછપરછ કરતા ચોંકાવનારા ખુલાસા થયા. જયેશ ઢાંકેચાએ જણાવ્યું કે, હિતેશ ઓડેદરાએ તેને બીજું ખાતું ખોલાવવા કહ્યું હતું, જેનાથી સિબિલ સુધરશે અને ભવિષ્યમાં લોન મળશે. ત્યારબાદ બેન્કમાં ટ્રાન્સફર થયેલી રકમ ચેકમાં સહી કરાવીને ઉપાડી લેવામાં આવતી હતી. અન્ય ખાતાધારક કમલેશ દાસાએ જણાવ્યું કે, હિરલબાના ડ્રાઇવર રાજુએ ખાતું ખોલાવવાનું કહ્યું હતું. તેણે ના પાડી છતાં, હિરલબાએ કાગળો લઈને બંગલે બોલાવીને ખાતું ખોલાવી નાખ્યું અને કોરા ચેકમાં સહી કરાવીને રૂપિયા ઉપાડી લેવામાં આવતા હતા, કમલેશને એક પણ રૂપિયો મળ્યો ન હતો.

પાંચ રાજ્યોમાં સાયબર ફ્રોડ અને ચાલી રહેલી તપાસ...

પી.એસ.આઇ. વી.આર. ચાવડાએ નોંધેલી ફરિયાદમાં જણાવાયું છે કે, કર્ણાટકમાંથી ₹5 લાખ, ₹12 લાખ અને ₹2.80 લાખ, ઉત્તરપ્રદેશના ₹9 લાખ, આંધ્રપ્રદેશના ₹1 લાખ, ગુજરાતના ₹77 હજાર અને તમિલનાડુના ₹4.80 લાખ મળી કુલ ₹35.70 લાખનું સાઇબર ફ્રોડ થયું હતું.

જિલ્લા પોલીસવડા ભગીરથસિંહ જાડેજાએ પ્રેસ કોન્ફરન્સમાં માહિતી આપતા જણાવ્યું કે, અલગ-અલગ રાજ્યોમાં ડિજિટલ એરેસ્ટ કરીને કરોડો રૂપિયા પડાવવામાં આવ્યા છે. આ ખાતાઓમાં પૈસા જમા થતાની સાથે જ તે જ દિવસે હિરલબાના મળતીયાઓ મારફતે ઉપાડી લેવામાં આવતા હતા.

હાલમાં હિરલબા જાડેજા જેલમાં છે અને તેમના સાગરીતો પૈકી હિતેશ ભીમા ઓડેદરા સામે પણ આ ગુનો નોંધાયો હોવાથી, પોલીસ દ્વારા વધુ ધરપકડ સહિતની કડક કાર્યવાહીની અપેક્ષા છે. આ કેસમાં વધુ કયા મોટા ખુલાસા થાય છે તે જોવું રસપ્રદ રહેશે.