પીધેલાઓને પકડવા પોલીસની નવી તરકિબ, સફેદ લાઇન પર ચલાવે છે...

રાજ્યમાં 31મી ડિસેમ્બરની ઉજવણી માટે યુવા વર્ગમાં ઉત્સાહ છે અને વિવિધ સ્થળે ન્યુ યર સેલિબ્રેશન પાર્ટીનું આયોજન કરાયું છે. નવા વર્ષે યુવા વર્ગ નશો ના કરે તે માટે ગુજરાત પોલીસ પણ એલર્ટ છે અને તમામ શહેરોમાં પોલીસ રસ્તા પર જોવા મળે છે. જો કે વડોદરા પોલીસે પીધેલાઓને પકડવા માટે નવી ટેકનિક અપનાવી છે.

વડોદરામાં દારૂડિયાઓને પકડવા પોલીસની ગજબની ટેકનિક જોવા મળી છે. રસ્તા પર ચેકિંગ કરી રહેલી પોલીસ દરેક વાહન ચાલકની તપાસ કરી રહી છે. વડોદરાના ડીસીપી અભય સોનીએ પીધેલાઓને પકડવા માટે એક નવી તરકીબ શોધી છે. 

વડોદરા પોલીસ આજકાલ રસ્તા પર લોકોને સફેદ લાઇન પર ચલાવી રહી છે. જો આ સફેદ લાઇનની બહાર કોઇ વ્યક્તિનો પગ ગયો તો સમજો ભરાઇ ગયો. ડીસીપી અભય સોની અને તેમની ટીમે અકોટા બ્રિજ પર લોકોને આ સફેદ લાઇન પર ચલાવી રહી છે. જો સફેદ લાઇનની બહાર પગ ગયો અને લથડીયા ખાતો કોઇ ચાલે તો તેની તપાસ કરવામાં આવે છે અને ત્યારબાદ બ્રેથ એનલાઇઝરનો ઉપયોગ કરીને જે તે વ્યક્તિએ નશો કર્યો છે કે કેમ તેની તપાસ કરવામાં આવે છે. પોલીસ અધિકારીની આ તરકિબથી લોકો પણ માથું ખંજવાળવા લાગ્યા છે.