PM મોદી બે દિવસ ગુજરાતમાં, જાણો સંપૂર્ણ કાર્યક્રમ.

વડાપ્રધાન નરેન્દ્ર મોદી આવતીકાલ, 30 અને 31 ઓક્ટોબર, 2025ના રોજ બે દિવસ માટે ગુજરાતની મુલાકાત લેવાના છે. આ પ્રવાસ દરમિયાન તેઓ નર્મદા જિલ્લાના એકતા નગર (કેવડિયા) ખાતે વિવિધ વિકાસ કાર્યોનું લોકાર્પણ અને શિલાન્યાસ કરશે. આ વર્ષે દેશ સરદાર વલ્લભભાઈ પટેલની 150મી જન્મજયંતિની ઉજવણી કરી રહ્યો છે, ત્યારે PM મોદીનો આ પ્રવાસ ખાસ મહત્ત્વ ધરાવે છે.

પ્રથમ દિવસ (30 ઓક્ટોબર): વિકાસ પ્રોજેક્ટ્સની ભેટ

વડાપ્રધાન 30 ઓક્ટોબરે સાંજે એકતા નગરમાં 25 નવી ઈ-બસોને લીલી ઝંડી આપશે. આ સાથે એકતા નગરમાં પ્રવાસીઓ માટે મફત મુસાફરી કરતી ઈ-બસોની કુલ સંખ્યા 55 થશે, જે આ વિસ્તારને દેશનું પ્રથમ ઈ-સિટી બનાવવાની દિશામાં એક મહત્ત્વપૂર્ણ પગલું છે.

ત્યારબાદ, PM મોદી ₹1140 કરોડથી વધુના માળખાગત અને વિકાસ પ્રોજેક્ટ્સનું ઉદ્ઘાટન અને શિલાન્યાસ કરશે. આ પ્રોજેક્ટ્સમાં રાજપીપળાની બિરસા મુંડા ટ્રાઇબલ યુનિવર્સિટી, હોસ્પિટાલિટી ડિસ્ટ્રિક્ટ, વામન વૃક્ષ વાટિકા અને અન્ય પર્યાવરણ-મૈત્રીપૂર્ણ સુવિધાઓનો સમાવેશ થાય છે, જે પ્રવાસનને પ્રોત્સાહન આપશે.

બીજો દિવસ (31 ઓક્ટોબર): રાષ્ટ્રીય એકતા દિવસની ઉજવણી

31 ઓક્ટોબરના રોજ, વડાપ્રધાન સવારે 08.00 વાગ્યે સ્ટેચ્યુ ઓફ યુનિટી પર પુષ્પાંજલિ અર્પણ કરીને રાષ્ટ્રીય એકતા દિવસની ઉજવણીમાં ભાગ લેશે. આ પ્રસંગે તેઓ એકતા દિવસની પ્રતિજ્ઞા લેવડાવશે અને ભવ્ય એકતા દિવસ પરેડનું નિરીક્ષણ કરશે. આ પરેડમાં BSF, CRPF, CISF, ITBP અને વિવિધ રાજ્ય પોલીસ દળોના જવાનો તેમજ પ્રથમ વખત ભારતીય નસ્લના શ્વાનોની ટુકડી પણ સામેલ થશે. PM મોદી આ પ્રસંગે સરદાર પટેલની 150મી જન્મજયંતિની યાદમાં ₹150નો સ્મારક સિક્કો અને ટપાલ ટિકિટ પણ બહાર પાડશે.

એકતા દિવસની ઉજવણી પછી, વડાપ્રધાન  'આરંભ 7.0' કાર્યક્રમમાં 100માં કોમન ફાઉન્ડેશન કોર્સના અધિકારી તાલીમાર્થીઓ સાથે સંવાદ કરશે. આ વર્ષની આરંભની થીમ "શાસનની પુનઃકલ્પના" છે, જેમાં 16 ભારતીય અને 3 ભૂટાન સિવિલ સર્વિસીસના 660 અધિકારીઓ ભાગ લઈ રહ્યા છે.

PM મોદીનો આ પ્રવાસ ગુજરાત અને દેશમાં એકતા, વિકાસ અને પર્યાવરણ જાળવણીનો મજબૂત સંદેશો આપશે.