હે ભગવાન..તે મને કેમ બચાવ્યો...વિશ્વાસ કુમારનું આક્રંદ

12 જૂને અમદાવાદથી લંડન જતું એર ઈન્ડિયાનું વિમાન તૂટી પડતાં સમગ્ર દેશમાં શોકની લહેર ફેલાઈ છે. વિમાનમાં સવાર 242 મુસાફરોમાંથી 241 લોકોનાં દુર્ભાગ્યવશ મોત થયા હતા. આ ભયાનક દુર્ઘટનામાં માત્ર એક યાત્રી, વિશ્વાસ કુમાર, જીવંત બચી ગયો હતો. તેની હાલત ગંભીર હતી, પણ સારવાર પછી હવે તે સંપૂર્ણ સ્વસ્થ છે અને પોતાના વતન દીવ પાછો ફર્યો છે.

વિશ્વાસ કુમારના જીવનમાં ચમત્કારિક બચાવ થયો હોવા છતાં, આ ક્ષણ આનંદની નહિ, દુઃખની બની રહી. કારણ કે તેની સાથે જ લંડન જતી ફ્લાઇટમાં તેના મોટા ભાઈ અજય કુમાર પણ સવાર હતા, જેમનું આ દુર્ઘટનામાં નિધન થયું હતું.

 

18 જૂન, બુધવારના દિવસે વિશ્વાસ દીવમાં તેના ભાઈ અજય કુમારની અંતિમ વિધિમાં હાજર રહ્યો. તે સમયે ભાવુક દ્રશ્યો સર્જાયા હતા. જીવ બચ્યા પછી પરિવારને વિશ્વાસ મળ્યો ખરો પણ તેનો મોટો ભાઇ તે સમયે ન હતો.  પોતાના ભાઈને કાંધ આપતી વખતે વિશ્વાસ રડી પડ્યો હતો. પરિવારજનો અને ગામલોકો પણ તેની સાથે સહાનુભૂતિ વ્યક્ત કરતા જોવા મળ્યા હતા.

વિશ્વાસ કુમાર માટે આ દુર્ઘટના માત્ર શારીરિક નહિ, માનસિક ઘા પણ બની છે. તેનું કહેવું છે કે, "મારો જીવ બચી ગયો, પણ ભાઈને ગુમાવવાનું દુઃખ ક્યારેય ઓછું નહીં થાય."

 

પોતાની તબિયત સારી ના હોવા છતાં વિશ્વાસ કુમારે સ્મશાનમાં જવાની જીદ કરી હતી પણ પરિવારે તેને સ્મશાનમાં આવવાની ના પાડી દીધી હતી. વિશ્વાસ કુમાર સતત આક્રંદ કરી રહ્યો હતો કે હે ભગવાન તે મને કેમ બચાવ્યો...મારા ભાઇને કેમ લઇ લીધો...

વિમાની આ દુર્ઘટનાની તપાસ DGCA અને અન્ય અધિકારીઓ દ્વારા ચાલુ છે. રાજ્ય અને કેન્દ્ર સરકાર પણ ઘટનાને ગંભીરતાથી લઈ રહી છે.

આ પણ વાંચો--- Plane Crash : બચી ગયેલા વિશ્વાસ કુમાર ક્યાં ...?