Patan માં હૃદય કંપાવનારી ઘટના, તળાવે કપડાં ધોવા ગયેલી બે બાળકીઓ ડૂબી, પરિવારમાં શોક...

પાટણ (Patan) જિલ્લાના શંખેશ્વર તાલુકાના લોલાડા ગામમાં એક હૃદય કંપાવનારી ઘટના બની છે. અહીં એક જ પરિવારની બે માસૂમ બાળકીઓ તળાવમાં ડૂબી જવાથી મૃત્યુ પામી છે. આ કરુણ ઘટનાથી સમગ્ર ગામમાં શોકનું મોજું ફરી વળ્યું છે.

પ્રાથમિક માહિતી અનુસાર, નાયક સમાજની આ બંને બહેનો તેમના પરિવારના સભ્યો સાથે ગામના તળાવે કપડાં ધોવા ગઈ હતી. કપડાં ધોવાઈ રહ્યા હતા ત્યારે બંને બાળકીઓ તળાવમાં નહાવા પડી હતી. જોકે, અજાણતાં જ તેઓ તળાવના ઊંડા ભાગમાં જતી રહી અને પાણીમાં ગરકાવ થઈ ગઈ.

પરિવાર અને ગામમાં શોક...

બાળકીઓ ડૂબી રહી હોવાનું ધ્યાને આવતા પરિવારજનો અને આસપાસના લોકો તેમને બચાવવા દોડ્યા હતા, પરંતુ તેમને બચાવવામાં સફળતા મળી ન હતી. બંને દીકરીઓના આ કરૂણ અને અકાળે થયેલા મોતથી પરિવાર પર આભ તૂટી પડ્યું છે. આ બનાવના પગલે લોલાડા ગામમાં શોકનો માહોલ છવાઈ ગયો છે અને લોકોમાં ગમગીની વ્યાપી ગઈ છે.

પોલીસ કાર્યવાહી...

ઘટનાની જાણ થતાં જ શંખેશ્વર પોલીસ ઘટનાસ્થળે પહોંચી હતી. પોલીસે બંને મૃતદેહોને બહાર કાઢી, પોસ્ટમોર્ટમ માટે મોકલી આપ્યા છે. આ મામલે પોલીસે અકસ્માત મોતનો ગુનો નોંધીને વધુ તપાસ હાથ ધરી છે. આ ઘટનાએ ફરી એકવાર જળસ્ત્રોતો નજીક બાળકોની સુરક્ષા અને દેખરેખ રાખવાની આવશ્યકતા પર ભાર મૂક્યો છે.