બનાસકાંઠાના 2 કટકાનો વિરોધ યથાવત, ભાજપના નેતાએ લખ્યો CMને પત્ર

બનાસકાંઠા જિલ્લાના વિભાજનને થયેલો વિવાદ યથાવત રહ્યો છે. છેલ્લા 2 દિવસથી કાંકરેજ તાલુકામાં વિભાજનના મુદ્દે ઉગ્ર વિરોધ ચાલી રહ્યો છે ત્યારે  કાંકરેજ વિસ્તારને થરાદમાં સમાવેશ કરતા કાંકરેજના ભાજપના નેતા અને એપીએમસીના પૂર્વ ચેરમેન અણદાભાઈ પટેલે મુખ્યમંત્રીને પત્ર લખ્યો છે.

અણદાભાઇએ  મુખ્યમંત્રીને પત્ર લખી કાંકરેજ તાલુકાને બનાસકાંઠા જિલ્લામાં યથાવાત રાખવા માગ કરી છે. તેમણે લખ્યું હતું કે બનાસકાંઠા જિલ્લો સારી નામના ધરાવે છે તેને નાનો કરીને થરાદ જિલ્લાને મોટો શા માટે બનાવવામાં આવી રહ્યો છે તે સમજણની બહાર છે.કાંકરેજ તાલુકાના અમુક ગામડાઓને થરાદ સુધી જવામાં 100 કિલોમીટરનું અંતર થાય છે.

તેમણે એમ પણ લખ્યું છે કે  બેંક,ડેરી અને જિલ્લાની સંસ્થાઓ પાલનપુરમાં આવેલી હોવાથી કાંકરેજ તાલુકાને બનાસકાંઠા જિલ્લામાં જ રાખવો જોઇએ. તેમણે  ઊલટું બનાસકાંઠા જિલ્લાને નાનો કરી થરાદ વાવને મોટો કરવામાં આવ્યો હોવાની ફરિયાદ કરી હતી. 

બીજી તરફ શિહોરી બાદ થરા પણ આજે સજ્જડ બંધ રહ્યું હતું. કાંકરેજ તાલુકાનો વાવ-થરાદમાં સમાવેશ કરાતા કાંકરેજ પંથકમાં ઉગ્ર વિરોધ થઇ રહ્યો  છે. કાંકરેજ વિસ્તારના લોકો નવા જિલ્લાના વિભાજનનો સતત વિરોધ કરી રહ્યાં છે. કાંકરેજને બનાસકાંઠામાં જ રાખવાની માંગ કરવામાં આવી છે. આજે થરા બહુચર માતાના મંદિરે બેઠક મળી હતી. આ સાથે  બનાસકાંઠા જિલ્લાના વિભાજન બાદ આ મામલો સોશિયલ મીડિયામાં પણ ચગી રહ્યો છે. સ્થાનિક લોકોએ રમુજી વીડિયો વાયરલ કર્યા. જિલ્લાના બે ભાગ થતા લોકો રમુજ કરી રહ્યાં છે. પોટલા બાંધી લોકો થરાદ જતા હોય તેવો વીડિયો બનાવીને વાયરલ કર્યાં છે