Sanand : આતંકવાદનો સફાયો, અમિત શાહના નેતૃત્વમાં 'તિરંગા યાત્રા'નો પ્રારંભ...

કેન્દ્રીય ગૃહ મંત્રી અમિત શાહના નેતૃત્વમાં રવિવારે અમદાવાદના સાણંદ ખાતે 'ઓપરેશન સિંદૂર'ની ઐતિહાસિક સફળતા બાદ ભારતીય સશસ્ત્ર દળોના સન્માનમાં ભવ્ય 'તિરંગા યાત્રા'નું આયોજન કરવામાં આવ્યું હતું. આ પ્રસંગે અમિત શાહે દેશના વીર સપૂતોની બહાદુરીને બિરદાવતા X (અગાઉ ટ્વિટર) પર એક પોસ્ટ દ્વારા ગૌરવ વ્યક્ત કર્યું.

આતંકવાદ સામેની જડબાતોડ કાર્યવાહી...

અમિત શાહે જણાવ્યું કે, દેશના બહાદુર સૈનિકોએ પોતાની વીરતાથી 'ઓપરેશન સિંદૂર'ને આતંકવાદના સંપૂર્ણ નાબૂદીનો પર્યાય બનાવી દીધું છે. આ ઐતિહાસિક સફળતા બદલ સૈનિકોનું સન્માન કરવા માટે ગાંધીનગર લોકસભા મતવિસ્તારમાં આ 'તિરંગા યાત્રા'નું આયોજન કરવામાં આવ્યું છે.

પહલગામ હુમલાનો વળતો જવાબ...

ભાજપે 'ઓપરેશન સિંદૂર'ની સફળતાની ઉજવણીમાં 13 થી 23 મે સુધી 'તિરંગા યાત્રા' શરૂ કરવાની ઘોષણા કરી છે. આ યાત્રા પહલગામમાં થયેલા આતંકવાદી હુમલાના વળતા જવાબમાં શરૂ કરવામાં આવી છે, જેમાં 26 લોકો શહીદ થયા હતા. PM નરેન્દ્ર મોદીના દાવા મુજબ, આ ઓપરેશન દરમિયાન સુરક્ષા દળોએ પાકિસ્તાન અને પાકિસ્તાન અધિકૃત કાશ્મીરમાં આતંકવાદી ઠેકાણાઓને નિશાન બનાવ્યા હતા અને લગભગ 100 આતંકવાદીઓને ઠાર માર્યા હતા.

દેશભરમાં ભાજપની 'તિરંગા યાત્રા...'

આ પહેલનું સંકલન ભાજપના વરિષ્ઠ નેતાઓ સંબિત પાત્રા, ભાજપ મહાસચિવ વિનોદ તાવડે અને તરુણ ચુઘ દ્વારા કરવામાં આવી રહ્યું છે. દેશના વિવિધ વિસ્તારોમાં યોજાનારી આ યાત્રાઓનું નેતૃત્વ મુખ્ય કેન્દ્રીય મંત્રીઓ, ભાજપ શાસિત રાજ્યોના મુખ્યમંત્રીઓ અને પાર્ટીના શીર્ષ નેતાઓ કરશે તેવી અપેક્ષા છે. આ અભિયાનના ભાગરૂપે, ભાજપ દેશભરના નાગરિકો સાથે જોડાઈને 'ઓપરેશન સિંદૂર'નું મહત્વ અને દેશની સુરક્ષા અને સાર્વભૌમત્વને મજબૂત કરવામાં તેની ભૂમિકાને ઉજાગર કરી રહી છે. આ યાત્રા દેશભક્તિ અને આતંકવાદ સામેની પ્રતિબદ્ધતાનું પ્રતીક બની રહેશે.