ગાંધીનગરમાં નવરાત્રિના બીજા દિવસે ગરબામાં બબાલ, પોલીસે લાઠીચાર્જ કર્યો

ગાંધીનગર: પવિત્ર તહેવાર નવરાત્રીની શરૂઆત થઈ ચૂકી છે. ત્યારે દેશભરમાં નવરાત્રિની રંગેચંગે ઉજવણી કરવામાં આવી રહી છે. આ પાવન અવસરે સનાતન સંકૃતિની ગરિમા જળવાય તે હેતુથી હિંદુ સંગઠનો ગરબા આયોજનો પર ચાંપતી નજર રહીને બેઠાં છે.

નવરાત્રી પહેલાં જ ઘણા સ્થળો પર જાહેર કરવામાં આવ્યું હતું કે, ગરબામાં બિનહિંદુઓ ન આવે અને શક્ય બને તો તિલક કરીને જ પ્રવેશ આપવામાં આવે. 

આ જ ઉપક્રમના ભાગરૂપે ગાંધીનગરમાં બજરંગ દળ કાર્યકર્તાઓ ગરબા આયોજનના સ્થળે તિલક લગાવવા માટે પહોંચ્યા હતા, પરંતુ અહીં પોલીસ સાથે તેમનું ઘર્ષણ થયું હતું.

આ ઘટનાનો વીડિયો હાલ સોશિયલ મીડિયામાં વાઇરલ થઈ રહ્યો છે. આ સમયે પોલીસ દ્વારા લાઠીચાર્જ પણ કરવામાં આવ્યો હોવાનું જાણવા મળ્યું છે. જોકે, આ સમગ્ર મામલે ગાંધીનગર પોલીસ અને જિલ્લા પોલીસ વડા દ્વારા કોઈ સ્પષ્ટતા કરવામાં આવી નથી.