ગુજરાતમાં વડાપ્રધાનના કાર્યક્રમમાં હવે QR કોડ વિના પ્રવેશ નહીં!

વડોદરામાં વિકાસ કાર્યોના ખાતમુહૂર્ત અને લોકાર્પણ કાર્યક્રમમાં હરણી બોટ દુર્ઘટનાના પીડિતોએ પૂછેલા પ્રશ્નો બાદ ગુજરાતનું તંત્ર એલર્ટ થઈ ગયુ છે. આ ઘટનાના કારણે વડાપ્રધાન નરેન્દ્ર મોદીના કાર્યક્રમ દરમિયાન ખાસ તકેદારી રાખવામાં આવી રહી છે. વડાપ્રધાનના કાર્યક્રમમાં હાજર રહેનારાઓને QR કોડ સ્કેન કરાયા બાદ પ્રવેશ આપવામાં આવનાર હોવાનું સૂત્રો દ્વારા જાણવા મળ્યુ છે. ભાજપના નેતાઓમાં QR કોડ આધારિત પ્રવેશ ચર્ચાનો વિષય બન્યો છે.

વડાપ્રધાન નરેન્દ્ર મોદી ઓપરેશન સિંદૂર પછી પ્રથમ વખત ગુજરાતની મુલાકાતે આવી રહ્યા છે. 26 અને 27મેના રોજ ગાંધીનગર, કચ્છ અને દાહોદ ત્રણ જિલ્લાના કાર્યક્રમમાં હાજરી આપશે. કચ્છના ભુજમાં મિરઝાપર રોડ પર જાહેર સભા બાદ તેઓ માતાના મઢ આશાપુરા મંદિરના દર્શન કરશે. દાહોદ ખાતે 20 હજાર કરોડના ખર્ચે રેલ્વે પ્રોડક્શન યુનિટનું નિર્માણ થયું છે. જેમાં નિર્માણ થયેલા 9 હજાર એચપીના પ્રથમ લોકોમોટિવ એન્જિનનું વડાપ્રધાનના હસ્તે લોકાર્પણ કરવામાં આવશે. આ ઉપરાંત તેઓ અમદાવાદ ખાતે એક રોડ શો કરે તેવી શક્યતા છે.

વડાપ્રધાનના બે દિવસના કાર્યક્રમ દરમિયાન વડાપ્રધાન વર્ચ્યુઅલી સુરત મહાનગપાલિકાના 500 કરોડથી વધુના વિકાસ કામોનું લોકાર્પણ અને ખાત મુર્હૂત કરશે. જેમાં 150 કરોડના બાયોડાયવર્સિટી પાર્કનો સમાવેશ થાય છે. વડાપ્રધાનના કાર્યક્રમમાં સુરતથી ભાજપના હોદ્દેદારો જાય તેવી શક્યતા છે. આ કાર્યક્રમમાં ભાજપના કોર્પોરેટરો, હોદ્દેદારો, વોર્ડના પ્રમુખ, પૂર્વ પ્રમુખ સાથે શહેરના એનજીઓના સભ્યો  હાજર રહે તે માટેની કવાયત શરૂ કરવામાં આવી છે. PMના કાર્યક્રમમાં જવા માટે અપેક્ષિત હોદ્દેદારોના QR કોડ જનરેટ કરવામાં આવી રહ્યાં છે. ભાજપના ગૃપમાં QR કોડ માટે સૂચના આપવામાં આવી છે. જેમનું રજિસ્ટ્રેશન થાય છે પરંતુ QR કોડ જનરેટ નથી થતો તેવા લોકો માટે ટેકનિકલ સર્પોટ આપવામાં આવી રહ્યો છે. 

ભાજપના હોદ્દેદારો અને કાર્યકરોમાં ચર્ચા ચાલી રહી છે કે, વડાપ્રધાનના કાર્યક્રમમાં જનમેદની ભેગી કરવા બસ અને અન્ય વાહનોનો ઉપયોગ થતો હોય છે. તેમાં કોણ આવે છે તે જોવામાં આવતું નથી. ઓપરેશન સિંદૂર અને વડોદરામાં મુખ્યમંત્રી સાથેની ઘટના બાદ પ્રથમ વખત ભાજપના કોર્પોરટેરો, હોદ્દેદારોની સાથે પ્રતિષ્ઠિત નાગરિકોને QR કોડ આપવામાં આવી રહ્યાં છે. જેનો QR કોડ સ્કેન થશે તેમને કાર્યક્રમ સ્થળે પ્રવેશ મળે તેવી વ્યવસ્થા કરાઈ છે. તેથી QR કોડ જનરેટ કરાવવા દોડધામ થઈ રહી છે. 

વડોદરામાં હરણી બોટ દુર્ઘટના કાંડમાં જીવ ગુમાવનાર બાળકોના વાલીઓએ ન્યાય માટે મુખ્યમંત્રીના કાર્યક્રમ દરમિયાન ઉભા થઈને પ્રશ્નો પૂછ્યા હતા. તેના કારણે સ્થાનિક તંત્ર સહિત ભાજપના નેતાઓ ડઘાઈ ગયા હતા. બાદમાં ભાજપના એક કાઉન્સિલરને સસ્પેન્ડ પણ કરવામાં આવ્યા હતા. આ ઘટના બાદ ભાજપના કાર્યકરો સિવાય કાર્યક્રમમાં આવનાર લોકો માટે QR કોડની સાથે પોલીસ વેરીફિકેશન પણ કરવામાં આવી શકે છે. મુખ્યમંત્રીના વડોદરાની સભામાં હરણીકાંડના પીડિત પરિવારોના આક્રોશ બાદ વડાપ્રધાનના કાર્યક્રમમાં વધુ તકેદારી રાખવામાં આવી રહી હોવાની ચર્ચા શરૂ થઈ છે.