સત્તાથી અભિમાન ન વધવું જોઈએ, સન્માન કમાવવું પડે: નીતિન ગડકરીનો તીખો સંદેશ

કેન્દ્રીય માર્ગ પરિવહન અને હાઈવે મંત્રી નીતિન ગડકરી ફરી એકવાર તેમના સ્પષ્ટ અને નિડર વિચારોને લઈને ચર્ચામાં છે. નાગપુર ખાતે આયોજિત એક શૈક્ષણિક સંમેલનમાં આચાર્યો અને શિક્ષકોને સંબોધતાં તેમણે જણાવ્યું કે, સત્તા, ધન, જ્ઞાન અને સૌંદર્ય પ્રાપ્ત કર્યા પછી માણસોમાં ઘણીવાર અભિમાન આવી જાય છે.

તેમણે કહ્યું કે, "જ્યારે કોઈને લાગવા લાગે કે હું સૌથી બુદ્ધિમાન છું ત્યારે તે દૃઢતા પછીથી દમન અને શોષણમાં બદલાઈ જાય છે." ગડકરીએ વધુમાં ઉમેર્યું કે, "કોઈ પણ વ્યક્તિ પોતાના વિચારો બીજાઓ પર થોપીને મહાન નથી બની શકતી. મહાનતાનો સાર તમારા વર્તન અને સંસ્કારથી માપવામાં આવે છે."

તેમણે કહ્યું કે, "સન્માન માંગવાથી નહિ મળે, તેને કમાવું પડે છે." નેતૃત્વમાં અભિમાન કેવી રીતે નુકસાન કરે છે તે પણ તેમણે સ્પષ્ટ કર્યું. "હું સાહેબ છું, મને બધું આવે છે, બીજાને મહત્વ આપવાનું નહિ - આ અભિમાન ખરું નેતૃત્વ નબળું પાડે છે."

શિક્ષણ વિભાગમાં ભ્રષ્ટાચાર શરમજનક

ગડકરીએ શિક્ષણ ક્ષેત્રમાં ભ્રષ્ટાચાર માટે ગંભીર ચિંતા વ્યક્ત કરી. તેમણે કહ્યું કે, "મને ખબર છે કે શિક્ષકની નિમણૂક માટે પણ લાંચ લેવાય છે, જે બહુ જ શરમજનક છે. ભ્રષ્ટ તંત્રના કારણે પ્રગતિ થતી અટકે છે. કેટલાય લોકો તકોનો લાભ લે છે જ્યારે કેટલાય તેને બગાડી નાખે છે."

ગધેડાને ઘોડો નહીં બનાવી શકાય: સરકારી તંત્ર પર વ્યંગ

સરકારી કર્મચારીઓની ફરજ પ્રત્યેની બેદરકારી અંગે પણ ગડકરીએ તીખા પ્રહાર કર્યા. તેમણે કહ્યું કે, "તમે નોકરી મેળવ્યા પછી કામ કરો. શું તમે ગધેડાને ઘોડો બનાવી શકો? જો તમારાથી સુધારાઓ નહિ થાય તો પછી તમને શા માટે મૂકવામાં આવ્યા?"

વિપક્ષની ટિપ્પણી: ભાજપની અંદરથી આવતી ચેતવણી

ગડકરીના આ નિવેદનોને કોંગ્રેસના નેતા નીતિન રાઉતે ભાજપ પર આંતરિક પ્રહાર ગણાવ્યો. તેમણે કહ્યું કે, "ગડકરીનું નિવેદન પાર્ટીમાં પ્રવર્તતા અભિમાન અને પોતાનાવાદ પર સીધો આરોપ છે."