નાયકા ડેમ છલકાયો, 19 દરવાજા 8 ફૂટ ખોલાયા, ભોગાવો નદી બે કાંઠે, Surendranagar માં એલર્ટ!

સુરેન્દ્રનગર (Surendranagar) જિલ્લામાં મેઘરાજાએ મહેર વરસાવતા જળસ્ત્રોતો છલકાઈ ઉઠ્યા છે. મુળી-ચોટીલા પંથકમાં ધોધમાર વરસાદના કારણે નાયકા ડેમ ઓવરફ્લો થઈ ગયો છે. ડેમમાં પાણીની ભરપૂર આવક થતા, તંત્ર દ્વારા ડેમના 19 દરવાજા 8 ફૂટ સુધી ખોલવાનો નિર્ણય લેવાયો છે, જેના કારણે નીચાણવાળા વિસ્તારો અને ભોગાવો નદી કાંઠે આવેલા ગામો માટે એલર્ટ જાહેર કરવામાં આવ્યું છે.

ભોગાવો નદીમાં જળસ્તર વધશે, જોરાવરનગર અને વઢવાણ માટે એલર્ટ...

નાયકા ડેમમાંથી અંદાજે 30,000 ક્યુસેક પાણી છોડવામાં આવી રહ્યું છે. આ વિશાળ જળપ્રવાહ સીધો ભોગાવો નદીમાં ભળશે, જેના કારણે નદીનું જળસ્તર ઝડપથી વધી શકે છે. ભોગાવો નદી કાંઠે આવેલા જોરાવરનગર અને વઢવાણ શહેરો માટે વિશેષ એલર્ટ જાહેર કરાયું છે. સ્થાનિક પ્રશાસને લોકોને નદી કિનારે ન જવા અને સાવચેતી રાખવા સૂચના આપી છે.

શહેરના કોઝવે પર 6 થી 7 ફૂટ પાણી ભરાવાની શક્યતા...

ડેમમાંથી છોડવામાં આવતા પાણીના કારણે સુરેન્દ્રનગર (Surendranagar) શહેરના કોઝવે પર 6 થી 7 ફૂટ સુધી પાણી ભરાઈ શકે છે. આના કારણે વાહનવ્યવહારને અસર થશે અને લોકોને વૈકલ્પિક માર્ગોનો ઉપયોગ કરવાની ફરજ પડી શકે છે. તંત્ર દ્વારા કોઝવે પરથી પસાર થતી વખતે વિશેષ તકેદારી રાખવાની સૂચના પણ આપવામાં આવી છે.

આ પણ વાંચો : IMD Alert : સાવધાન! હવામાન વિભાગની કડક ચેતવણી, આખા ગુજરાતમાં ધોધમાર વરસાદ પડશે...

નીચાણવાળા વિસ્તારોમાં તકેદારી રાખવા સૂચના...

નાયકા ડેમમાંથી પાણી છોડવામાં આવતા, ભોગાવો નદીના પ્રવાહમાં વધારો થવાથી નદી કાંઠાના અને નીચાણવાળા વિસ્તારોમાં પાણી ફરી વળવાની શક્યતા છે. આથી, સંબંધિત ગ્રામ પંચાયતો અને સ્થાનિક વહીવટી તંત્રને તકેદારીના ભાગરૂપે તમામ જરૂરી પગલાં લેવા અને લોકોને સુરક્ષિત સ્થળે ખસેડવા માટે સૂચનાઓ આપી દેવામાં આવી છે. સુરેન્દ્રનગર (Surendranagar) જિલ્લામાં મેઘરાજાની મહેરબાની ખેડૂતો અને જળાશયો માટે રાહતરૂપ છે, પરંતુ ડેમમાંથી પાણી છોડવાના કારણે નીચાણવાળા વિસ્તારો માટે સાવચેતી રાખવી અનિવાર્ય છે. તંત્ર દ્વારા પરિસ્થિતિ પર સતત નજર રાખવામાં આવી રહી છે અને કોઈ પણ કટોકટીની સ્થિતિને પહોંચી વળવા માટે તૈયારીઓ કરવામાં આવી છે. નાગરિકોને પણ સંયમ રાખવા અને પ્રશાસન દ્વારા અપાતી સૂચનાઓનું પાલન કરવા વિનંતી છે.

આ પણ વાંચો : Bhavnagar - Dhandhuka હાઈવે બંધ, શેત્રુંજી નદી બે કાંઠે, 60 લોકો ફસાયા, અનેક માર્ગો તૂટ્યા!