Bhavnagar - Dhandhuka હાઈવે બંધ, શેત્રુંજી નદી બે કાંઠે, 60 લોકો ફસાયા, અનેક માર્ગો તૂટ્યા!

ભાવનગર (Bhavnagar) જિલ્લામાં મેઘરાજાએ રીતસરનું તાંડવ મચાવ્યું છે. અનરાધાર વરસાદને કારણે જિલ્લાના અનેક વિસ્તારો જળબંબાકાર બન્યા છે, જેના પરિણામે જનજીવન અસ્તવ્યસ્ત થઈ ગયું છે. ભાવનગર (Bhavnagar)-ધંધુકા હાઈવે બંધ કરી દેવાયો છે, અને શેત્રુંજી નદી બે કાંઠે વહેતી થતા અનેક ગામડાઓ સંપર્કવિહોણા બન્યા છે. પરિસ્થિતિ એટલી ગંભીર છે કે, ભાવનગર (Bhavnagar) શહેરમાં આવતીકાલે શાળાઓમાં રજા જાહેર કરવી પડી છે.

મુખ્ય માર્ગો બંધ અને વાહનવ્યવહાર ખોરવાયો...

ભારે વરસાદના કારણે ભાવનગર (Bhavnagar)-ધંધુકા હાઈવે પર પાણી ભરાઈ જતા તેને વાહનવ્યવહાર માટે બંધ કરી દેવાની ફરજ પડી છે. અનેક ટ્રકો પાણીમાં ફસાઈ જતા માર્ગ પર અટવાઈ ગઈ છે. આ ઉપરાંત, પાલીતાણા-ઉંદરકાને જોડતો મુખ્ય માર્ગ પણ પાણીમાં ગરકાવ થઈ ગયો છે, જેનાથી 10-12 ગામોનો સંપર્ક તૂટી ગયો છે. 12 ઇંચથી વધુ વરસાદ નોંધાતા આ વિસ્તારોમાં ભયાવહ સ્થિતિ સર્જાઈ છે.

શેત્રુંજી નદીનો રોદ્ર અવતાર અને કોઝવે તૂટ્યો...

પાલીતાણા પંથકમાં અનરાધાર વરસાદને કારણે શેત્રુંજી નદી સંપૂર્ણપણે ઉફાન પર છે. નદીના ધસમસતા પ્રવાહને કારણે ભૂતિયા ગામ નજીકનો કોઝવે સંપૂર્ણપણે તૂટી પડ્યો છે, જે શેત્રુંજી ડેમ સાથેના મુખ્ય માર્ગને જોડે છે. આના કારણે માત્ર વાહનવ્યવહાર જ ખોરવાયો નથી, પરંતુ પાઇપલાઇનને પણ નુકસાન થતા પાણી પુરવઠા પર અસર થવાની ભીતિ સેવાઈ રહી છે.

આ પણ વાંચો : Rain : સૌરાષ્ટ્રમાં ચોમાસાનો ધમાકેદાર પ્રારંભ, 22 ડેમોમાં નવા નીર, ખેડૂતોમાં ખુશીની લહેર!

થાપનાથ ગામ બેટમાં ફેરવાયું, NDRF રેસ્ક્યુ કરશે...

સૌથી ચિંતાજનક સમાચાર થાપનાથ ગામમાંથી આવ્યા છે. કાળુભાર નદીના ધસમસતા પાણી ગામમાં ફરી વળતા થાપનાથ ગામ બેટમાં ફેરવાઈ ગયું છે, અને ગામના 60 જેટલા લોકો પાણીમાં ફસાયા હોવાનું જાણવા મળ્યું છે. તેમને સુરક્ષિત બહાર કાઢવા માટે NDRF (નેશનલ ડિઝાસ્ટર રિસ્પોન્સ ફોર્સ) ની ટીમને બોલાવવામાં આવી છે અને તેઓ ટૂંક સમયમાં બચાવ કામગીરી હાથ ધરશે.

આ પણ વાંચો : Ahmedabad : દરિયાપુરમાં એક જ લાઇનમાં ત્રણ ભૂવા: AMC ની ડ્રેનેજ લાઇનના નબળા કામોનો ભાંડો ફૂટ્યો!

તંત્રની તૈયારીઓ પર સવાલ...

ભાવનગર (Bhavnagar)માં આટલો ભારે વરસાદ અને તેના કારણે સર્જાયેલી સ્થિતિ તંત્રની પ્રી-મોન્સૂન કામગીરી અને ડિઝાસ્ટર મેનેજમેન્ટની તૈયારીઓ પર ગંભીર સવાલ ઉભા કરે છે. આટલા મોટા પાયે પાણી ભરાવાની અને માર્ગો બંધ થવાની ઘટનાઓ દર્શાવે છે કે, વરસાદ પહેલાં પૂરતી વ્યવસ્થા કરવામાં આવી નહોતી. ભાવનગર (Bhavnagar) જિલ્લામાં વરસાદે સર્જેલી આ વિકટ પરિસ્થિતિમાં તંત્રએ યુદ્ધના ધોરણે રાહત અને બચાવ કામગીરી હાથ ધરવી પડશે. ફસાયેલા લોકોને સુરક્ષિત બહાર કાઢવા, માર્ગો પૂર્વવત કરવા અને અસરગ્રસ્તોને જરૂરી મદદ પૂરી પાડવી એ સમયની તાતી જરૂરિયાત છે. નાગરિકોને પણ સાવચેત રહેવા અને તંત્ર દ્વારા અપાતી સૂચનાઓનું પાલન કરવા વિનંતી છે.

આ પણ વાંચો : Ahmedabad : દરિયાપુરમાં એક જ લાઇનમાં ત્રણ ભૂવા: AMC ની ડ્રેનેજ લાઇનના નબળા કામોનો ભાંડો ફૂટ્યો!