શિરડીથી પરત ફરતા શ્રદ્ધાળુઓની કાર પલટતા 3ના મોત

મહારાષ્ટ્રના નાસિક જિલ્લામાં સુરતના શ્રદ્ધાળુઓની ફોર્ચ્યુનર કારને અકસ્માત નડ્યો છે. સુરતના 7 યુવાનોનું એક ગ્રુપ મંગળવારે રાત્રે શિરડી સાંઈબાબાના દર્શન કરવા માટે નીકળ્યું હતું. જોકે, દર્શન કરીને પરત વતન સુરત ફરી રહ્યા હતા તે દરમિયાન, નાસિક-છત્રપતિ સંભાજી મહારાજ હાઇવે પર યેવલા તાલુકાના એરંડગાંવ રાયતે શિવર વિસ્તારમાં ફોર્ચ્યુનર કારના ચાલકે કાબૂ ગુમાવતા કાર પલટી મારીને ડિવાઇડર સાથે અથડાઈ હતી. આ ભયાનક અકસ્માતની ઘટનામાં 3 લોકોના મોત થયા હતા, જ્યારે 4 વ્યક્તિ ગંભીર રીતે ઈજાગ્રસ્ત થયા છે.

અકસ્માતમાં પ્રણવ દેસાઈ અને પલક કાપડિયાનું મોત

પ્રાથમિક માહિતી મુજબ, કાર ચાલક વિક્રમ ઓસ્વાલ સ્કૂલ બસના કોન્ટ્રાક્ટર હતા. અકસ્માતમાં પ્રણવ દેસાઈ અને મિત્ર પલક કાપડિયાનું ઘટનાસ્થળે જ મોત થયું હતું, જ્યારે અન્ય 1 ઈજાગ્રસ્ત, સ્ટાફના સભ્ય સુરેશ સાહુનું નાસિક હોસ્પિટલ લઈ જતી વખતે રસ્તામાં મોત થયું હતું, જેના કારણે કુલ મૃત્યુઆંક 3ના મોત પર પહોંચ્યો હતો. કારમાં વિક્રમ ઓસ્વાલના અન્ય મિત્રો વિપીન રાણા, 1 એકાઉન્ટન્ટ સહિત સ્ટાફના અન્ય સભ્યો પણ હતા.

આ પણ વાંચો: હોંગકોંગમાં કાર્ગો વિમાનને નડ્યો અકસ્માત: 2ના મોત

4 ઈજાગ્રસ્તોને નાસિકમાં દાખલ કરાયા

વિક્રમ ઓસ્વાલને માથા અને પગના ભાગે ગંભીર ઈજાઓ થતાં તેમને તાત્કાલિક સારવાર માટે મુંબઈની હોસ્પિટલ ખાતે ખસેડવામાં આવ્યા છે. અન્ય 4 ઈજાગ્રસ્ત વ્યક્તિઓને નાસિકની ખાનગી હોસ્પિટલમાં દાખલ કરવામાં આવ્યા છે, જેમાંથી 2ની હાલત ગંભીર હોવાનું જાણવા મળ્યું છે. સ્થાનિક લોકોએ તાત્કાલિક ઘટનાસ્થળે દોડી આવીને ઈજાગ્રસ્તોને બહાર કાઢીને પોલીસને જાણ કરી હતી. અકસ્માતના કારણે વાહનનો આગળનો ભાગ સંપૂર્ણપણે તૂટી ગયો હતો.

ડ્રાઈવરે કાબૂ ગુમાવતા થયો અકસ્માત 

સ્થાનિક પોલીસે પ્રાથમિક શક્યતા વ્યક્ત કરી છે કે, કાર પૂરપાટ ઝડપે હતી અને ડ્રાઈવરે કાબૂ ગુમાવતા આ અકસ્માત સર્જાયો હોવો જોઈએ. પોલીસે જણાવ્યું કે, અકસ્માતનું ચોક્કસ કારણ નક્કી કરવા માટે CCTV ફૂટેજ મંગાવવામાં આવશે અને વાહનની ટેક્નિકલ તપાસ પણ કરવામાં આવશે. પોલીસે અકસ્માતની નોંધ લઈને કાયદેસરની કાર્યવાહી શરૂ કરી અને મૃતદેહોને પોસ્ટમોર્ટમ માટે મોકલી આપ્યા છે. સ્કૂલ બસ કોન્ટ્રાક્ટના વ્યવસાય સાથે જોડાયેલા યુવાનોના આ અકસ્માતથી સુરતમાં તેમના પરિવારજનો અને મિત્રોમાં શોકની લાગણી છવાઈ ગઈ છે.