ખોડલધામમાં સત્તા પરિવર્તન!

Naresh Patel Hints Retirement: ગુજરાતના પાટીદાર સમાજ અને સર્વ સમાજની આસ્થાના કેન્દ્ર સમાન કાગવડ સ્થિત શ્રી ખોડલધામ મંદિરની પ્રાણ પ્રતિષ્ઠા મહોત્સવને આગામી જાન્યુઆરી 2027માં 10 વર્ષ પૂર્ણ થઈ રહ્યા છે. આ ઐતિહાસિક અવસરને યાદગાર બનાવવા માટે શ્રી ખોડલધામ ટ્રસ્ટ દ્વારા ભવ્યાતિભવ્ય ’દશાબ્દી મહોત્સવ 2027’નું આયોજન કરવામાં આવ્યું છે. મહોત્સવના આયોજનના ભાગરૂપે આજે, 23 મે ના રોજ ખોડલધામ ટ્રસ્ટના ચેરમેન નરેશ પટેલે સર્વ સમાજને ભાવભર્યું આમંત્રણ આપવા માટે માતાજીના અલગ-અલગ ત્રણ રથને રાજકોટથી લીલી ઝંડી આપી પ્રસ્થાન કરાવ્યું છે. આ રથ સમગ્ર ગુજરાતના ખૂણે-ખૂણામાં ફરીને લોકોને આ મહોત્સવને સફળ બનાવવા માટે સાક્ષાત આમંત્રણ પાઠવશે.

 

          View this post on Instagram                      

A post shared by Benefit News (@benefitnews)

 

રથ પ્રસ્થાન સાથે ચેરમેન નરેશ પટેલના નિવૃત્તિના સંકેતો
રથ પ્રસ્થાનના આ મહાઅવસરે ખોડલધામ ટ્રસ્ટના ચેરમેન નરેશ પટેલે પોતાના પદ પરથી નિવૃત્તિ લેવાના સ્પષ્ટ સંકેતો આપ્યા છે. તેમણે જણાવ્યું હતું કે, વર્ષ 2027માં તેઓ સક્રિય ભૂમિકામાંથી નિવૃત્તિ લઈ શકે છે. નરેશ પટેલે પોતાની નિવૃત્તિ અંગે વાત કરતા ગર્વ સાથે ઉમેર્યું કે, "અમારી ટીમ હવે સંપૂર્ણપણે સક્ષમ અને મજબૂત થઈ ગઈ છે. હું લાંબા સમયથી કાર્યરત છું અને હવે આરામ કરવા માંગુ છું. સાથે જ હું સમાજને એ પણ ખાતરી આપું છું કે મારી જગ્યાએ ક્યારેય પણ મારા પરિવારમાંથી કોઈ સભ્ય ટ્રસ્ટના ટોચના પદ પર નહીં આવે." રાજકીય અને સામાજિક વિશ્લેષકોના મતે, નરેશ પટેલની નિવૃત્તિ બાદ ખોડલધામ ટ્રસ્ટનું નેતૃત્વ ગુજરાતના પૂર્વ મુખ્યમંત્રી આનંદીબેન પટેલના પુત્રી અનાર પટેલ સંભાળે તો નવાઈ નહીં, જેઓ છેલ્લા કેટલાક સમયથી ટ્રસ્ટમાં ખૂબ જ સક્રિય ભૂમિકા ભજવી રહ્યા છે.

પત્રિકા નહીં, સાક્ષાત માતાજી રથ સ્વરૂપે આપશે આમંત્રણ
ખોડલધામ ટ્રસ્ટના ચેરમેન નરેશ પટેલે કાર્યક્રમની રૂપરેખા આપતા જણાવ્યું કે, આગામી તારીખ 19, 20 અને 21 જાન્યુઆરી 2027 દરમિયાન દશાબ્દી મહોત્સવ ખૂબ જ સુંદર અને દિવ્ય રીતે ઉજવવામાં આવશે. 10 વર્ષ પહેલાં યોજાયેલા પ્રાણપ્રતિષ્ઠા મહોત્સવમાં જે રીતે લાખો લોકો સ્વયંભૂ જોડાયા હતા, તે જ રીતે આ દશાબ્દી મહોત્સવમાં પણ જનમેદની ઉમટી પડશે. ખોડલધામ ટ્રસ્ટની પરંપરા રહી છે કે તેઓ ક્યારેય કોઈ આમંત્રણ પત્રિકા છપાવતા નથી, પરંતુ ખુદ મા ખોડલ સાક્ષાત આમંત્રણ આપવા ભક્તોના આંગણે પહોંચે છે. આ આસ્થા સાથે અલગ-અલગ ત્રણ ઝોન (ઉત્તર, મધ્ય અને દક્ષિણ ગુજરાત) માટે માતાજીના વિશેષ રથ તૈયાર કરાયા છે, જે સર્વ સમાજને કાગવડ પધારવા નોતરું આપશે.

નરેશ પટેલે જૂની યાદો તાજા કરી
નરેશ પટેલે જૂની યાદો તાજી કરતા કહ્યું કે, "અહીંયા ઉપસ્થિત ઘણા લોકો 2011 અને 2017થી મારી સાથે ખભેખભો મિલાવીને ઉભા છે. આજે 10 વર્ષના સફળ વહાણા વાઈ ગયા બાદ પણ આટલા બધા લોકોનો સાથ છે, એ જ ખોડલધામની સૌથી મોટી સફળતા છે. જ્યારે આટલી સક્ષમ ટીમ આપણી પાસે હોય, ત્યારે હવે હું આરામ કરું તો પણ સંસ્થાના કામમાં કોઈ આંચ નહીં આવે."

'મારા માટે આ પહેલો કાર્યક્રમ છે અને યુવાનોનો ઉત્સાહ અદભુત છે': અનાર પટેલ
ખોડલધામના અગ્રણી ટ્રસ્ટી અનારબેન પટેલે રથ પ્રસ્થાન પ્રસંગે પોતાના વિચારો વ્યક્ત કરતા કહ્યું કે, "રથ હવે જિલ્લા અને તાલુકા સ્તરે પહોંચી રહ્યો છે, જેની સાથે આપણું સંગઠન ગામડા સુધી મજબૂત બની રહ્યું છે. ખોડલધામ ટ્રસ્ટના એક ભાગ તરીકે મારા માટે આ પહેલો મોટો કાર્યક્રમ છે. ગઈકાલ રાતથી જ યુવાનો, ભાઈઓ અને બહેનો જે રીતે મોડી રાત સુધી એક થઈને તનતોડ મહેનત કરી રહ્યા છે, તે જોતાં આ અવસર ઇતિહાસ રચશે તેમાં કોઈ શંકા નથી." તેમણે વધુમાં ઉમેર્યું કે, નરેશભાઈના પવિત્ર વિચારોથી આખા પાટીદાર સમાજની વિચારસરણી વૈશ્વિક અને સેવાભાવી બની છે. આ દશાબ્દી મહોત્સવના માધ્યમથી અમે સમાજના અંતરિયાળ વિસ્તારના નાનામાં નાના પરિવાર સુધી પહોંચીશું અને આગામી સમયમાં સમાજને કયા ક્ષેત્રમાં આપણી જરૂર છે તેનો ચોક્કસ સર્વે કરીશું.

કોણ છે અનાર પટેલ? 
ગુજરાતમાં પાટીદાર સમાજનું સામાજિક અને રાજકીય કદ ખૂબ મોટું છે. ઉત્તરપ્રદેશના રાજ્યપાલ આનંદીબેન પટેલના પુત્રી અને પદ્મશ્રી ઈશ્વરભાઈ પટેલના પુત્રવધૂ અનાર પટેલ ત્રણ વર્ષ પહેલાં ખોડલધામ ટ્રસ્ટમાં ટ્રસ્ટી તરીકે જોડાયા હતા. અનાર પટેલ શૈક્ષણિક રીતે B.Sc. અને નિરમા યુનિવર્સિટીમાંથી MBA ની પદવી ધરાવે છે અને છેલ્લા 34 વર્ષથી સામાજિક સેવાકાર્યોમાં સક્રિય છે. તેમણે કુટુંબના સહયોગથી 'માનવ સાધના ટ્રસ્ટ' ની સ્થાપના કરી છે, જે હાલ 7000થી વધુ ગરીબ લાભાર્થીઓને મદદ કરે છે. આ ઉપરાંત હસ્તકલા અને મહિલા સશક્તીકરણ માટે તેમણે "ગ્રામશ્રી" અને "ક્રાફ્ટરૂટ્સ" જેવી સંસ્થાઓ સ્થાપી છે, જે દેશના 21 રાજ્યોના 35,000થી વધુ કારીગરોને રોજગારી પૂરી પાડે છે. અગાઉ વડોદરાની માંજલપુર બેઠક પરથી તેમની ચૂંટણી લડવાની ચર્ચાઓ હતી, પરંતુ તેમણે રાજકારણના બદલે ખોડલધામના માધ્યમથી સામાજિક મંચ પસંદ કર્યો છે, જેને ગુજરાતના ભવિષ્યના રાજકારણ સાથે પણ જોડીને જોવામાં આવે છે.

'દશાબ્દી મહોત્સવ 2027' નો સંપૂર્ણ ત્રિદિવસીય કાર્યક્રમ
શ્રી ખોડલધામ મંદિરે 19 થી 21 જાન્યુઆરી 2027 દરમિયાન યોજાનારા ભવ્ય કાર્યક્રમોની વિગત નીચે મુજબ છે:
દિવસ 1 (19 જાન્યુઆરી 2027, મંગળવાર): દશાબ્દી મહોત્સવનો મંગલ પ્રારંભ થશે. સવારે શાસ્ત્રોક્ત વિધિ સાથે 1008 કુંડી મહાયજ્ઞ શરૂ કરાશે. ગુજરાતની ચારેય દિશાઓમાંથી નીકળેલી ભવ્ય શોભાયાત્રાઓ કાગવડ મંદિરે પહોંચશે, જ્યાં તેમનું પરંપરાગત સામૈયું અને પુષ્પવર્ષા સાથે સ્વાગત કરાશે. બપોર પછી લોક કલાકારોની હાજરીમાં ભવ્ય સાંસ્કૃતિક લોક ડાયરો યોજાશે.
દિવસ 2 (20 જાન્યુઆરી 2027, બુધવાર): સવારના સત્રમાં મહાયજ્ઞની આહુતિઓ અપાશે. બપોર બાદ મેદાન પર વિરાટ મહારાસ નું આયોજન કરવામાં આવ્યું છે. જેમાં ગુજરાતના દરેક જિલ્લા, તાલુકા અને ગામડેથી આવેલા હજારો ભાઈઓ-બહેનો પરંપરાગત ગુજરાતી વસ્ત્રોમાં સજ્જ થઈને માતાજીના ગરબે ઘુમશે.
દિવસ 3 (21 જાન્યુઆરી 2027, ગુરુવાર): મહોત્સવના અંતિમ દિવસે 1008 કુંડી મહાયજ્ઞની પૂર્ણાહૂતિ થશે અને શાસ્ત્રોક્ત વિધિથી બીડું હોમવામાં આવશે. મા ખોડલને ભવ્ય અન્નકૂટ ધરાવાશે, ત્યારબાદ સામૂહિક મહાઆરતી અને ધ્વજારોહણ થશે. અંતમાં વિરાટ ધર્મસભા યોજાશે, જેમાં ચેરમેન નરેશભાઈ પટેલ પોતાનું ઐતિહાસિક ઉદબોધન આપી સમાજ જોગ વિશેષ સંદેશ પાઠવશે અને મહોત્સવ સંપન્ન થશે. ત્રણેય દિવસ દરમિયાન શ્રદ્ધાળુઓ માટે ખોડલધામની 10 વર્ષની ગૌરવશાળી યાત્રાનું વિશેષ પ્રદર્શન (Exhibition) યોજાશે. સાથે જ પધારનાર લાખો ભક્તો માટે રોજ સવારે અલ્પાહાર, બપોરે ભોજન (ફરાળની વ્યવસ્થા સાથે) અને સાંજના ભોજનની ટ્રસ્ટ દ્વારા સુવ્યવસ્થિત વ્યવસ્થા કરવામાં આવી છે.

આવતીકાલથી ત્રણેય ઝોનમાં આમંત્રણ રથની સફર શરૂ
રાજકોટથી પ્રસ્થાન થયેલા ત્રણેય રથ આવતીકાલથી ગુજરાતના અલગ-અલગ ઝોનમાં પરિભ્રમણ શરૂ કરશે:
દક્ષિણ ગુજરાત: રથ આવતીકાલે વલસાડ જિલ્લામાં પ્રવેશશે. સાંજે 5 વાગ્યે વાપીના ગુંજન ચોકડીથી ભવ્ય બાઇક રેલી નીકળશે જે સાંજે 6 વાગ્યે પટેલ સમાજ વાપી પહોંચશે, જ્યાં મહાઆરતી, પ્રસાદ અને રાસ ગરબા યોજાશે.
મધ્ય ગુજરાત: રથ દાહોદ જિલ્લામાં ફરશે. સવારે 9 વાગ્યે ઝાલોદ મુવાડા, 11 વાગ્યે નાન સલાઈ, 12 વાગ્યે વરોડ, 1.30 વાગ્યે લીમડી, 2.30 વાગ્યે રણીયાર, 3.30 વાગ્યે લીલવા અને સાંજે 4.30 વાગ્યે દુધિયા ગામે ભક્તો રથનું સ્વાગત કરશે.
ઉત્તર ગુજરાત: રથ બનાસકાંઠા જિલ્લામાં સવારે 9 વાગ્યે સાસમ, 10.30 વાગ્યે પટોસણ, 12 વાગ્યે ખસા, બપોરે 1 વાગ્યે સરીપડા અને ટાકરવાડા, 3 વાગ્યે સલેમપુરા અને સાંજે 4 વાગ્યે ગઢ ગામે પહોંચી ધર્મસભામાં ફેરવાશે. ખોડલધામની આ ભવ્ય સંગઠન શક્તિ અને નરેશ પટેલના આ સંકેતોએ અત્યારથી જ સમગ્ર ગુજરાતના સામાજિક વાતાવરણમાં ભારે આકર્ષણ જમાવ્યું છે.