ગુજરાતમાં મેઘરાજાનું આગમન: ધોધમાર વરસાદથી શહેરો જળમગ્ન

રાજ્યમાં ચોમાસાની સત્તાવાર એન્ટ્રી થઈ ગઈ છે. જેના પગલે સમગ્ર ગુજરાતમાં મેઘરાજાએ જમાવટ કરી છે. ખાસ કરીને અમદાવાદમાં મોડી રાતે ધોધમાર વરસાદ પડતાં અનેક વિસ્તારોમાં પાણી ભરાઈ ગયા છે. નિકોલ, સાબરમતી, બોપલ, ઘુમા અને મેઘાણીનગર જેવા વિસ્તારો ખાસ અસરગ્રસ્ત રહ્યા છે.  

અમદાવાદમાં વરસાદ

મધરાતે 1 વાગ્યા પછી ભારે વરસાદ શરૂ થયો હતો જે સવારે 4 વાગ્યા સુધી ચાલુ રહ્યો હતો. સતત વરસાદના કારણે અંડરબ્રિજ જેવી જગ્યાઓમાં પાણી ભરાતા વાહન વ્યવહાર બંધ કરવો પડ્યો હતો. અખબારનગર અને સાબરમતી ડીકેબીન અંડરપાસ બંધ કરાયા હતા. નિકોલના મધુમાલતી આવાસમાં 3 ફૂટથી વધુ પાણી ભરાયું હતું. બોપલની સ્ટર્લિંગ સિટીમાં પણ 1થી 2 ફૂટ પાણી ભરાઈ ગયા છે, જ્યાં વિદ્યાર્થીઓ માટે પરીક્ષા કેન્દ્ર આવેલું છે, જેને લીધે વિદ્યાર્થીઓને ભારે હાલાકીનો સામનો કરવો પડ્યો.  

અન્ય શહેરો અને જિલ્લામાં સ્થિતિ

સુરત, વડોદરા, દાહોદ, નવસારી સહિતના જિલ્લાઓમાં વહેલી સવારથી સતત વરસાદ વરસી રહ્યો છે. નવસારીના વાંસદા તાલુકામાં 160 મિમી (6.66 ઇંચ), ખેરગામમાં 121 મિમી, ચીખલીએ 75 મિમી વરસાદ નોંધાયો. ચીખલીમાં માત્ર 4 કલાકમાં દોઢ ઇંચ વરસાદ નોંધાયો.