ઘોડદોડ રોડના બંગલામાં ચોરી કરનાર મોડેલ ગેંગ ઝડપાઈ

સુરત શહેરના અત્યંત વીઆઈપી ગણાતા ઘોડદોડ રોડ વિસ્તારમાં આવેલા એક બંધ બંગલાને નિશાન બનાવી લાખોની મત્તાની ચોરી કરનાર કુખ્યાત ટોળકી આખરે પોલીસના સકંજામાં આવી ગઈ છે. સુરત ક્રાઈમ બ્રાન્ચે ટેકનિકલ સર્વેલન્સ અને હ્યુમન ઇન્ટેલિજન્સના આધારે મોડેલ ગેંગના મુખ્ય સૂત્રધાર સહિત બે સાગરીતોની ધરપકડ કરી છે. પકડાયેલા તસ્કરો પાસેથી ચોરી કરેલી ચાંદીની વસ્તુઓ અને ગુનામાં વપરાયેલી મોપેડ મળી કુલ 1.69 લાખનો મુદ્દામાલ રિકવર કરવામાં આવ્યો છે.

સુભાષનગર સોસાયટીના બંગલામાં મધરાતે મચાવ્યો હતો આતંક : 

ચોરીની આ ઘટના ગત 22 માર્ચ, 2026ના રોજ ઉમરા પોલીસ સ્ટેશનની હદમાં બની હતી. ઘોડદોડ રોડ પર સેન્ટ ઝેવિયર્સ સ્કૂલની પાછળ આવેલી સુભાષનગર સોસાયટીના બંગલા નંબર 51માં તસ્કરોએ ખાતર પાડ્યું હતું. રાત્રિના સમયે બંગલાનો મુખ્ય દરવાજો તોડી અંદર પ્રવેશેલા ત્રણ અજાણ્યા શખ્સોએ પલંગના ખાનામાં રાખેલી ચાંદીની ટ્રે, સિક્કા અને અન્ય ઘરેણાંની ચોરી કરી હતી. સીસીટીવી ફૂટેજમાં કેદ થયેલા આ શખ્સો આશરે 1.74 લાખની મત્તા લઈને ફરાર થઈ ગયા હતા.

લાલ દરવાજા વિસ્તારમાં વોચ ગોઠવી આરોપીઓને ઝડપ્યા : 

આ ઘટનાની ગંભીરતાને જોતા સુરત ક્રાઈમ બ્રાન્ચની અલગ-અલગ ટીમો તપાસમાં જોડાઈ હતી. પોલીસને ચોક્કસ બાતમી મળી હતી કે આ ચોરીમાં અગાઉ અનેક ગુનાઓમાં સંડોવાયેલો રોહિત ઉર્ફે મોડેલ સામેલ છે. બાતમીના આધારે લાલ દરવાજા વિસ્તારમાં ટ્રેપ ગોઠવીને પોલીસે બે શખ્સોની અટકાયત કરી હતી.

ઝડપાયેલા આરોપીઓની વિગત:

રોહિત ઉર્ફે મોડેલ અશોક દેવીપૂજક (ઉં.વ. 25): મૂળ પાટણનો વતની અને હાલ દિલ્હી ગેટ બ્રિજ નીચે રહેતો મુખ્ય સૂત્રધાર.

કરણ ઉર્ફે કાળીયો વિનુભાઈ દેવીપૂજક (ઉં.વ. 20): મૂળ નડિયાદનો વતની અને હાલ રોહિત સાથે રહેતો સાગરીત.

લાખોની ચાંદી અને મોપેડ જપ્ત : 

પોલીસે આરોપીઓની તલાશી લેતા તેમની પાસેથી ચોરીનો મુદ્દામાલ મળી આવ્યો હતો. જેમાં 349 ગ્રામ વજનની ચાંદીની ટ્રે, પાયલ, કડા, હાર, લોકેટ અને ચાંદીના 87 સિક્કાઓનો સમાવેશ થાય છે. આ ચાંદીની કિંમત આશરે 1.19 લાખ રૂપિયા આંકવામાં આવી છે. આ ઉપરાંત, ચોરી કરવા માટે વપરાયેલી 50 હજારની કિંમતની એપ્રિલિયા મોપેડ (GJ-05-SR-5179) પણ પોલીસે કબજે કરી છે.

મોડેલ ગેંગની મોડસ ઓપરેન્ડી: બંધ બંગલાની રેકી

પૂછપરછ દરમિયાન આરોપીઓએ જણાવ્યું કે તેઓ ત્રીજા સાગરીત સંજુ ઉર્ફે કાલીયા સાથે મળીને શહેરના પોશ વિસ્તારોમાં મોપેડ પર ફરતા હતા. જે બંગલામાં રાત્રે લાઈટ બંધ હોય અથવા બહાર તાળું મારેલું દેખાય તેને તેઓ ટાર્ગેટ કરતા હતા. સળિયા વડે દરવાજો તોડીને માત્ર રોકડ અને ઘરેણાંની જ ચોરી કરતા હતા જેથી ભાગવામાં સરળતા રહે.

મુખ્ય આરોપીનો ડરામણો ગુનાહિત ઇતિહાસ : 

પોલીસ તપાસમાં બહાર આવ્યું છે કે રોહિત ઉર્ફે મોડેલ શહેરનો રીઢો ગુનેગાર છે. તેની વિરુદ્ધ સુરતના ઉમરા, અડાજણ, પાલ, રાંદેર, વેસુ અને જહાંગીરપુરા જેવા વિવિધ પોલીસ મથકોમાં 25 થી વધુ ઘરફોડ ચોરીના ગુના નોંધાઈ ચૂક્યા છે. તેની ગુનાહિત પ્રવૃત્તિઓ ડામવા માટે સુરત પોલીસે અગાઉ 2020 અને 2021માં તેની સામે પાસા (PASA) હેઠળ કાર્યવાહી કરી તેને જેલના સળિયા પાછળ ધકેલી દીધો હતો, તેમ છતાં જેલમાંથી બહાર આવીને તેણે ફરી ચોરીના રસ્તે પ્રયાણ કર્યું હતું.