માંજલપુરના MLA યોગેશ પટેલનું નિધન, વિધાનસભા ખંડિત

વડોદરાના વરિષ્ઠ ધારાસભ્ય યોગેશ પટેલનું નિધન

વડોદરાના માંજલપુર વિધાનસભા ક્ષેત્રના ધારાસભ્ય અને ગુજરાતના વરિષ્ઠ રાજકીય નેતા યોગેશ પટેલનું અવસાન થતાં સમગ્ર રાજ્યમાં શોકની લાગણી પ્રસરી ગઈ છે. છેલ્લા કેટલાક સમયથી તેઓ હૃદય સંબંધિત તકલીફોથી પીડાઈ રહ્યા હતા અને વડોદરાની હોસ્પિટલમાં સારવાર હેઠળ હતા. તેમના નિધનથી ગુજરાત વિધાનસભાની વધુ એક બેઠક ખાલી પડી છે.

36 વર્ષની રાજકીય સફરનો અંત

યોગેશ પટેલ ગુજરાતના એવા નેતાઓમાં સામેલ હતા જેમણે સતત લોકસમર્થન મેળવ્યું હતું. તેઓ કુલ 8 વખત ધારાસભ્ય તરીકે ચૂંટાઈ આવ્યા હતા. શરૂઆતમાં રાવપુરા બેઠક પરથી વિજય મેળવ્યા બાદ તેમણે વિસ્તારના વિકાસ માટે મહત્વપૂર્ણ કામગીરી કરી હતી. સીમાંકન બાદ તેઓ માંજલપુર બેઠક પરથી ચૂંટણી લડ્યા અને ત્યાં પણ સતત જીતનો સિલસિલો જાળવી રાખ્યો હતો.

‘કાકા’ તરીકે લોકપ્રિય બન્યા

વડોદરાના લોકો તેમને ‘કાકા’ કહી સંબોધતા હતા. સામાન્ય નાગરિકો માટે હંમેશા ઉપલબ્ધ રહેતા યોગેશ પટેલ સ્થાનિક પ્રશ્નોને લઈને ખૂબ જ સક્રિય હતા. રસ્તા, પાણી, ગટર અને નાગરિક સુવિધાઓ જેવા મુદ્દાઓ પર તેઓ સતત અવાજ ઉઠાવતા રહેતા હતા.

રાજ્ય સરકારમાં સંભાળી મહત્વની જવાબદારી

યોગેશ પટેલે માત્ર ધારાસભ્ય તરીકે જ નહીં પરંતુ રાજ્ય સરકારમાં પણ મહત્વની ભૂમિકા ભજવી હતી. તેઓ રાજ્ય કક્ષાના નર્મદા વિકાસ અને ગૃહ નિર્માણ વિભાગના મંત્રી તરીકે સેવા આપી ચૂક્યા હતા. તેમના કાર્યકાળ દરમિયાન મધ્ય ગુજરાતના અનેક વિકાસ કાર્યોને ગતિ મળી હતી.

આંદોલનોથી રાજકારણ સુધીની સફર

વિદ્યાર્થી જીવનથી જ તેઓ જાહેર જીવનમાં સક્રિય રહ્યા હતા. દૂધના ભાવવધારા, મોંઘવારી અને શિક્ષણ ફી વધારા સામે તેમણે અનેક આંદોલનોનું નેતૃત્વ કર્યું હતું. વિદ્યાર્થી હિતરક્ષક સમિતિ દ્વારા કરાયેલા આંદોલનોના પડઘા દિલ્હી સુધી પહોંચ્યા હતા. જેના કારણે શિક્ષણ ક્ષેત્રે નીતિગત ફેરફારો કરવાની જરૂરિયાત ઉભી થઈ હતી.

જનતા પાર્ટીથી ભાજપ સુધીનો રાજકીય પ્રવાસ

યોગેશ પટેલે 1990માં જનતા પાર્ટીની ટિકિટ પર પ્રથમ વખત વિધાનસભાની ચૂંટણી જીતી હતી. બાદમાં 1995માં તેઓ ભાજપમાં જોડાયા અને પક્ષના મજબૂત નેતા તરીકે ઉભરી આવ્યા. ભાજપમાં જોડાયા પછી પણ તેમણે સતત જનસંપર્ક અને વિકાસના મુદ્દાઓને પ્રાથમિકતા આપી હતી.

સાંસ્કૃતિક અને સામાજિક ક્ષેત્રે નોંધપાત્ર યોગદાન

રાજકારણ સિવાય યોગેશ પટેલ વડોદરાના સાંસ્કૃતિક જીવન સાથે પણ ગાઢ રીતે જોડાયેલા હતા. નવરાત્રી, ગણેશોત્સવ અને શિવજી કી સવારી જેવા ધાર્મિક-સાંસ્કૃતિક કાર્યક્રમોમાં તેમની સક્રિય ભાગીદારી રહી હતી. વડોદરાની ઓળખ સાથે જોડાયેલા અનેક કાર્યક્રમોને તેમણે પ્રોત્સાહન આપ્યું હતું.

મેનકા ગાંધી સાથેનો વિશેષ સંબંધ

રાજકીય જીવન દરમિયાન યોગેશ પટેલના દેશના અનેક રાષ્ટ્રીય નેતાઓ સાથે નજીકના સંબંધો રહ્યા હતા. ખાસ કરીને મેનકા ગાંધી સાથે તેમનો પારિવારિક સ્નેહભર્યો સંબંધ ચર્ચામાં રહ્યો હતો. વર્ષો સુધી બંને વચ્ચે ભાઈ-બહેન જેવો આત્મીય સંબંધ જળવાયો હતો.

રાજકીય જગતમાં શોકની લાગણી

યોગેશ પટેલના અવસાનથી વડોદરા જ નહીં પરંતુ સમગ્ર ગુજરાતના રાજકીય વર્તુળોમાં શોકનું મોજું ફરી વળ્યું છે. તેમની લાંબી રાજકીય કારકિર્દી, વિકાસલક્ષી અભિગમ અને જનતા સાથેનું જીવંત જોડાણ તેમને ગુજરાતના સૌથી પ્રભાવશાળી નેતાઓમાં સ્થાન અપાવે છે.

ગુજરાત વિધાનસભા ફરી ખંડિત

યોગેશ પટેલના નિધનથી ગુજરાત વિધાનસભા ફરી ખંડિત થઈ છે. યોગેશ પટેલ પહેલાં ઉમરેઠના ધારાસભ્ય ગોવિંદ પરમારનું 6 માર્ચ, 2026ના રોજ અવસાન થયું હતું. તેથી વિધાનસભાની એક બેઠક ખાલી પડી હતી. ઉમરેઠની પેટાચૂંટણીમાં ગોવિંદ પરમારના પુત્ર હર્ષદ પરમારની જીત થઈ હતી. હવે યોગેશ પટેલનુ નિધન થતાં ગુજરાત વિધાનસભામાં ધારાસભ્યોની સંખ્યા ઘટીને 181 થઈ ગઈ છે.