માંગરોળના રઈજ ગામ પાસે શ્રદ્ધાળુઓની બસ પલટી

Mangrol Bus Accident: ગુજરાતના હાઈ-વે પર અકસ્માતોનો સિલસિલો થંભવાનું નામ નથી લઈ રહ્યો. સોમનાથ-દ્વારકા હાઈ-વે પર માંગરોળ તાલુકાના રઈજ ગામ નજીક શ્રદ્ધાળુઓથી ભરેલી એક ખાનગી ટ્રાવેલ્સ બસ પલટી મારી જતાં ગંભીર દુર્ઘટના સર્જાઈ છે. આ અકસ્માતમાં બે શ્રદ્ધાળુઓના ઘટનાસ્થળે જ કરુણ મોત નીપજ્યા છે, જ્યારે અન્ય મુસાફરોને નાની-મોટી ઈજાઓ પહોંચતા હાઈ-વે પર મરણચીસો ગુંજી ઉઠી હતી.

રોઝડું આડું ઉતરતા સર્જાયો અકસ્માત
મળતી વિગતો અનુસાર, આ ખાનગી બસમાં 40થી વધુ શ્રદ્ધાળુઓ સવાર હતા. આ તમામ મુસાફરો ભાવનગર પંથકના રહેવાસી હતા અને દ્વારકાધીશના દર્શન કરીને સોમનાથ મહાદેવના શરણે જઈ રહ્યા હતા. બસ જ્યારે માંગરોળના રઈજ ગામ પાસે પસાર થઈ રહી હતી, ત્યારે અચાનક હાઈ-વે પર એક રોઝડું (નીલગાય) આડું ઉતર્યું હતું. પૂરઝડપે જતી બસની સામે પશુ આવી જતાં ચાલકે તેને બચાવવા જતાં સ્ટીયરીંગ પરથી કાબુ ગુમાવ્યો હતો. જેના કારણે બસે ગુલાંટ ખાધી હતી અને પલટી મારી ગઈ હતી.

સ્થાનિકોએ હાથ ધરી બચાવ કામગીરી
અકસ્માત એટલો ભીષણ હતો કે બસ પલટી મારતા જ અંદર સવાર શ્રદ્ધાળુઓમાં ચીસાચીસ મચી ગઈ હતી. અકસ્માતનો ધડાકો સાંભળીને આસપાસના ગ્રામજનો અને રસ્તે પસાર થતા વાહનચાલકો તાત્કાલિક મદદ માટે દોડી આવ્યા હતા. લોકોએ બસના કાચ તોડીને અંદર ફસાયેલા મુસાફરોને બહાર કાઢવાની કામગીરી શરૂ કરી હતી. ઘટનાની જાણ થતાં જ 108 એમ્બ્યુલન્સની અનેક ગાડીઓ સ્થળ પર પહોંચી હતી અને ઈજાગ્રસ્તોને પ્રાથમિક સારવાર આપી વધુ સારવાર માટે કેશોદ અને જૂનાગઢની હોસ્પિટલોમાં ખસેડવામાં આવ્યા હતા.

પોલીસ કાર્યવાહી અને ટ્રાફિક જામ
દુર્ઘટનાને પગલે સોમનાથ-દ્વારકા હાઈ-વે પર વાહનોની લાંબી કતારો લાગી ગઈ હતી. માંગરોળ પોલીસનો કાફલો તાત્કાલિક સ્થળ પર દોડી આવ્યો હતો અને ક્રેનની મદદથી પલટી ગયેલી બસને હટાવી રસ્તો ખુલ્લો કરવાની તજવીજ હાથ ધરી હતી. પોલીસે બંને મૃતકોના શબને પોસ્ટમોર્ટમ માટે હોસ્પિટલ ખસેડ્યા છે અને અકસ્માતનો ગુનો નોંધી વધુ તપાસ હાથ ધરી છે. ભાવનગરથી ઉત્સાહભેર ધાર્મિક યાત્રાએ નીકળેલા શ્રદ્ધાળુઓ માટે આ સફર અંતિમ સફર સાબિત થતા પંથકમાં ઘેરા શોકની લાગણી ફરી વળી છે.