અમરેલીમાં સિંહણ માનવભક્ષી બની, બાળકને ફાડી ખાધો

સિંહ પરિવાર ક્યારેય માણસ ઉપર હુમલો કરતો નથી અને માણસનો શિકાર પણ કરતો નથી. પરંતુ, ક્યારેક તે માનવભક્ષી બની જતો હોય છે. અમરેલી જિલ્લામાં એક સિંહણ માનવ ભક્ષી બની ગઈ છે. બગસરાના હામાપુર ગામની વાડીમાં રહેતાં ખેત મજૂર પરિવારના બાળકને સિંહણે ફાડી ખાધો હતો. પાણીની કુંડી પાસે રમી રહેલા બાળકને સિંહણ ખેતરમાં ઉઠાવી ગઈ હતી. 

બગસરા તાલુકાના હામાપુર ગામમાં સિંહણે મંગળવારે 5 વર્ષના બાળકને ફાડી ખાવાની ઘટના બની હતી. હામાપુર ગામના રમેશભાઈ નાનજીભાઈ સોજીત્રાની વાડીમાં ભાગીયા તરીકે ખેતી કામ કરતાં પરપ્રાંતિય મજૂર પરિવાર રહે છે. આ પરિવારનું બાળક વાડીમાં પાણીની કુંડી પાસે રમતો હતો તે સમયે સિંહણ બાળકને ઉઠાવીને તુવેરના પાકમાં લઈ ગઈ હતી. કનક વિનોદભાઈ નામના બાળકને સિંહણે ફાડી ખાતા તેનું મોત થયું હતું.

સિંહણની માનવબક્ષી બનવાની ઘટના બાદ અમરેલી વિસ્તરણ વિભાગના ACF તેમજ RFO સહિત વન વિભાગનો સ્ટાફ ઘટના સ્થળ ઉપર દોડી ગયો હતો. વન વિભાગે માનવભક્ષી સિંહણને પકડવા રેસ્ક્યૂ કામગીરી હાથ ધરી હતી. વન વિભાગે મેગા રેસ્ક્યુ ઓપરેશન હાથ ધરીને મોડી સાંજે સિંહણ અને ચાર સિંહબાળને પાંજરે પૂર્યા હતા. માનવ ભક્ષી સિંહણ પાંજરે પુરાઈ જતા ગ્રામજનોએ રાહત અનુભવી છે. રેસ્ક્યુ કરેલી સિંહણ અને ચાર સિંહ બાળને પકડીને જૂનાગઢ સકરબાગ ઝૂ માં લઈ જવાયા છે.

બીજા દિવસે ખાંભાના ગીદરડી ગામે એક યુવક ઉપર સિંહણના હુમલાની ઘટના બની છે. ગીદરડી ગામમાં સિંહણે વાડીમાં ભાગીયા તરીકે કામ કરતાં યુવક પર હુમલો કર્યો હતો. ગીદરડી ગામના મુકેશભાઈ લખુભાઈ સોલંકી વાડીમા પાણી વાળતા હતા તે સમયે અચાનક સિંહણે હુમલો કરી દીધો હતો. ઈજાગસ્ત યુવકને કમર અને પીઠના ભાગે ઇજાઓ થતાં સારવાર અર્થે ખાંભામાં પ્રાથમિક સારવાર આપીને અમરેલી હોસ્પિટલ ખાતે ખસેડાયો હતો.  

અમરેલી જિલ્લામાં બે દિવસમાં સિંહણ દ્વારા હુમલાની બે ઘટના બની છે. બગસરાના હામાપુરમાં બાળકને ફાડી ખાધા બાદ ખાંભાના ગીદરડીમાં યુવક ઉપર હુમલો કર્યો હતો. છેલ્લા એક મહિનામાં ગીદરડી ગામમાં સિંહણ દ્વારા માનવ હુમલાની બીજી ઘટના બનતા લોકોમાં ફફડાટ ફેલાયો છે.