ઊંઝા-ઉનાવામાં ભેળસેળવાળી વરિયાળીનો મોટો જથ્થો જપ્ત

Adulterated fennel seized in Unjha: ગુજરાત સરકારના ખોરાક અને ઔષધ નિયમન તંત્રે મહેસાણા જિલ્લાના ઊંઝા નજીક ઉનાવામાં ભેળસેળયુક્ત વરિયાળી સામે મોટી કાર્યવાહી હાથ ધરી છે. ફ્લાઈંગ સ્કોડે દરોડા દરમિયાન અંદાજે રૂ. 19.6 લાખની કિંમતનો 26 ટનથી વધુ વરિયાળીનો જથ્થો જપ્ત કર્યો છે. પ્રાથમિક તપાસમાં વરિયાળીને વધુ લીલી અને આકર્ષક દેખાડવા માટે કેમિકલયુક્ત અખાદ્ય કલરનો ઉપયોગ કરવામાં આવતો હોવાની શંકા વ્યક્ત કરવામાં આવી છે.

બે સ્થળોએ એકસાથે કાર્યવાહી
તપાસ દરમિયાન અધિકારીઓએ ઉનાવામાં અલગ-અલગ સ્થળોએ દરોડા પાડ્યા હતા. જેમાં ભાર્ગવ પ્રવિણભાઈ પટેલના ગોડાઉન અને રાકેશ તલસીભાઈ પટેલની પેઢીમાં તપાસ હાથ ધરી હતી. તપાસ દરમિયાન બંને સ્થળોએ ફૂડ સેફ્ટી સંબંધિત જરૂરી લાઇસન્સ વિના કામગીરી થતી હોવાની વિગતો સામે આવી હોવાનું તંત્રએ જણાવ્યું છે.

લેબોરેટરી તપાસ માટે નમૂનાઓ મોકલાયા
ફૂડ સેફ્ટી અધિકારીઓએ શંકાસ્પદ વરિયાળીના ત્રણ નમૂનાઓ નિયમ મુજબ એકત્ર કરીને વધુ તપાસ માટે લેબોરેટરીમાં મોકલી આપ્યા છે. લેબોરેટરીના રિપોર્ટ બાદ કાયદાકીય જોગવાઈ મુજબ આગળની કાર્યવાહી કરવામાં આવશે. હાલ સમગ્ર જથ્થો સીઝ કરીને સુરક્ષિત રાખવામાં આવ્યો છે.

 

#Mehsana
ઊંઝા પંથકમાં જીરૂ-વરીયાળીમાં ભેળસેળ કરતાં તત્વો બેફામ

ઉનાવામાં અલગ-અલગ બે સ્થળો પરથી વરીયાળીમાં ભેળસેળનું કૌભાંડ ઝડપાયું

ફૂડ વિભાગે દરોડા પાડી 19.6 લાખની 26 ટન ભેળસેળવાળી વરીયાળીનો જથ્થો પકડ્યો

ભાર્ગવ પ્રવિણભાઈ પટેલ અને રાકેશ તુલસીભાઈ પટેલની પેઢીમાં ચાલી રહી હતી… pic.twitter.com/Lo9R94hQkz

— Benefit News 24 (@BenefitNews24) July 10, 2026

 

રૂ. 19.6 લાખનો જથ્થો સીઝ
તપાસ દરમિયાન સ્થળ પરથી અંદાજે 26 ટન જેટલો વરિયાળીનો જથ્થો કબજે કરવામાં આવ્યો છે. આ જથ્થાની બજાર કિંમત અંદાજે રૂ. 19.6 લાખ હોવાનું જણાવવામાં આવ્યું છે. અધિકારીઓએ સમગ્ર માલ જપ્ત કરીને જવાબદાર વ્યક્તિઓ સામે કાયદેસરની કાર્યવાહી શરૂ કરી છે.

ભેળસેળ સામે 'ઝીરો ટોલરન્સ'ની નીતિ
આરોગ્ય રાજ્ય મંત્રી પ્રફુલ પાનશેરીયાએ જણાવ્યું કે, રાજ્ય સરકાર નાગરિકોના આરોગ્યની સુરક્ષા માટે પ્રતિબદ્ધ છે. ભેળસેળ સામે 'ઝીરો ટોલરન્સ'ની નીતિ હેઠળ કાર્યવાહી કરવામાં આવી રહી છે. રાજ્યભરમાં ખાદ્ય પદાર્થોમાં ભેળસેળ કરનારા તત્વો સામે સતત ચેકિંગ અભિયાન ચાલુ રહેશે.

આગામી સમયમાં વધુ કડક ચેકિંગ
મંત્રીએ જણાવ્યું કે, ફૂડ એન્ડ ડ્રગ્સ વિભાગ સતત સતર્ક છે અને આવનારા સમયમાં પણ ભેળસેળ કરનારાઓ સામે વધુ સઘન તપાસ અને કડક કાર્યવાહી હાથ ધરવામાં આવશે. જાહેર આરોગ્ય સાથે કોઈપણ પ્રકારની બેદરકારી સહન કરવામાં આવશે નહીં. તેવી સ્પષ્ટ ચેતવણી પણ આપવામાં આવી છે.