ISISની વિચારધારા ફેલાવનાર લોડાઈનો શખ્સ ઝડપાયો

SOG Arrests ISIS Ideology Promoter: સરહદી જિલ્લા કચ્છમાં સોશિયલ મીડિયાના માધ્યમથી દેશની સુરક્ષા અને અખંડિતતા જોખમાય તેવી પ્રવૃત્તિ કરનારા તત્વો સામે પશ્ચિમ કચ્છ પોલીસે આકરૂ વલણ અપનાવ્યું છે. ભુજ તાલુકાના લોડાઈ ગામના એક શખસ વિરુદ્ધ પ્રતિબંધિત આતંકવાદી સંગઠન ISISની વિચારધારાનો પ્રચાર કરવા અને ધાર્મિક ઉશ્કેરણીજનક સામગ્રી સોશિયલ મીડિયા પર શેર કરવા બદલ ગંભીર ગુનો દાખલ કરવામાં આવ્યો છે.

SOGની સતર્કતાથી પકડાયું નેટવર્ક
આ સમગ્ર મામલાની વિગતો મુજબ, પશ્ચિમ કચ્છ સ્પેશિયલ ઓપરેશન ગ્રુપ (SOG)ની ટીમ સોશિયલ મીડિયા પર બાજ નજર રાખી રહી હતી. આ દરમિયાન ટીમને ચોક્કસ બાતમી મળી હતી કે લોડાઈ ગામનો રહેવાસી ફકીરમામદ ઈસા ગગડા નામનો શખસ ડિજિટલ પ્લેટફોર્મ પર શંકાસ્પદ અને રાષ્ટ્રવિરોધી પ્રવૃત્તિઓ ચલાવી રહ્યો છે. આ બાતમીના આધારે પોલીસે ઊંડાણપૂર્વકની તપાસ શરૂ કરી હતી.

4 વર્ષથી ચાલતો હતો ઝેરી પ્રચાર
પોલીસ તપાસમાં જે વિગતો બહાર આવી છે તે અત્યંત ચોંકાવનારી છે. આરોપી ફકીરમામદ છેલ્લા ચાર વર્ષથી સતત સોશિયલ મીડિયા પર ઉશ્કેરણીજનક પોસ્ટ્સ મૂકી રહ્યો હતો. તે ખાસ કરીને ઇસ્લામિક યુદ્ધ, ખિલાફત સ્થાપવા અને જિહાદ માટે લોકોને એકઠા કરવાના હેતુથી પોસ્ટ્સ શેર કરતો હતો. આ શખસ આતંકવાદી સંગઠન ISISની કટ્ટરપંથી વિચારધારાથી પ્રભાવિત થઈને તે પ્રકારનું કન્ટેન્ટ ફેલાવી દેશની એકતાને નુકસાન પહોંચાડવાનો પ્રયાસ કરી રહ્યો હતો.

પધ્ધર પોલીસ સ્ટેશનમાં ફરિયાદ અને કાયદેસરની કાર્યવાહી
પશ્ચિમ કચ્છ SOG દ્વારા આ ગંભીર ગુના બદલ આરોપી વિરુદ્ધ પધ્ધર પોલીસ સ્ટેશનમાં કાયદેસરની ફરિયાદ નોંધાવવામાં આવી છે. આરોપી પર દેશવિરોધી પ્રવૃત્તિઓ કરવા અને સમાજમાં વૈમનસ્ય ફેલાવવાના આરોપો હેઠળ ગુનો દાખલ કરાયો છે. હાલ પોલીસ એ દિશામાં તપાસ કરી રહી છે કે આ શખ્સ કયા અન્ય શંકાસ્પદ લોકોના સંપર્કમાં હતો અને શું તેને કોઈ સંગઠન તરફથી આદેશો મળી રહ્યા હતા.

ડિજિટલ પુરાવાઓની તપાસ અને પોલીસની ચેતવણી
પોલીસે આરોપીના તમામ ડિજિટલ ઉપકરણો જેમ કે મોબાઈલ ફોન અને લેપટોપ કબજે કરીને ફોરેન્સિક તપાસ માટે મોકલવાની તજવીજ હાથ ધરી છે. તેના સોશિયલ મીડિયા એકાઉન્ટ્સની ઝીણવટભરી તપાસ દ્વારા અન્ય કડીઓ મેળવવામાં આવી રહી છે. આ ઘટના બાદ પશ્ચિમ કચ્છ પોલીસે નાગરિકોને કડક શબ્દોમાં ચેતવણી આપી છે. પોલીસ તંત્રએ જણાવ્યું છે કે સરહદી જિલ્લાની શાંતિ ડહોળવાનો પ્રયાસ કરનાર કોઈપણ વ્યક્તિને બક્ષવામાં આવશે નહીં. સોશિયલ મીડિયા પર રાષ્ટ્રવિરોધી કે ઉશ્કેરણીજનક પોસ્ટ લાઈક, શેર કે કોમેન્ટ કરનારાઓ પર પોલીસની સાયબર વિંગ સતત વોચ રાખી રહી છે. લોકોએ કોઈપણ ગેરમાર્ગે દોરતી પોસ્ટ શેર ન કરવા અપીલ કરવામાં આવી છે.