વડોદરામાં પતંગનો દોરો બન્યો જીવલેણ, યુવકનું ગળું ચીરાતા આઇસીયુમાં ખસેડાયો 

રાજ્યમાં ચાઇનિઝ દોરા પર પ્રતિબંધ હોવા છતાં બેરોકટોકપણે તેનું વેચાણ થઇ રહ્યું છે અને લોકો પણ તેનો ઉપયોગ કરી રહ્યા છે. તાજેતરમાં ગુજરાત હાઇકોર્ટે પતંગની દોરીને કાચથી માંજતા લોકો સામે પણ કડક કાર્યવાહી કરવા સરકારને સુચના આપી છે આમ છતાં ઉત્તરાયણ પહેલાથી જ પતંગની દોરીથી ઇજા પામવાના બનાવો બહાર આવી રહ્યા છે. વડોદરામાં પણ આવો જ એક ચોંકાવનારો બનાવ બહાર આવ્યો છે જેમાં એક યુવકનું પતંગના દોરાથી ગળું કપાઇ ગયું છે. આ યુવકને તત્કાળ સારવાર માટે હોસ્પિટલમાં દાખલ કરાયો છે . તેની આઇસીયુમાં સારવાર ચાલી રહી છે. 

મળેલી માહિતી મુજબ શહેરના નાગરવાડા વિસ્તારમાં રહેતો હિતેશ ચાવડા નામનો યુવક બાઇક ઉપર સુપર બેકરીથી ગધેડા માર્કેટ તરફ જઇ રહ્યો હતો ત્યારે પતંગનો દોરો તેના ગળામાં ભરાઇ ગયો હતો અને તે કંઇ સમજે તે પહેલાં જ દોરાના કારણે તેના ગળામાં મોટો ચીરો પડી ગયો હતો અને તે લોહીલુહાણ થઇ ગયો હતો. 

આ ઘટના જોતાં જ સ્થાનિક લોકો તેને બચાવવા દોડી આવ્યા હતા અને તેના ગળામાંથી જીવલેણ દોરો કાઢીને તત્કાળ સારવાર માટે હોસ્પિટલમાં મોકલ્યો હતો. તેને હોસ્પિટલમાં આઇસીયુમાં ખસેડવામાં આવ્યો હતો. 

ઉલ્લેખનિય છે કે વડોદરામાં તાજેતરમાં પણ એક આધેડના પગમાં દોરી ફસાઇ જતા તે પણ ઘાટલ થયા હતા અને તેને જમનાબાઇ હોસ્પિટલમાં ખસેડવામાં આવ્યા હતા. ઉત્તરાયણ પહેલાં જ પતંગના દોરાના કારણે લોકોને ઇજા થઇ હોવાના બનાવો બન્યા છે ત્યારે હજું ઉત્તરાયણ અને વાસી ઉતરાયણનું પર્વ આવી રહ્યું છે ત્યારે લોકોને સાવચેત રહેવું જરુરી છે.