કન્નડ સાહિત્યના ઈતિહાસમાં સૌપ્રથમ બાનુ મુશ્તાકનું 'હાર્ટ લેમ્પ' ઇન્ટરનેશનલ બુકરનું બન્યું વિજેતા

ભારતીય કન્નડ લેખિકા, વકીલ અને સામાજિક કાર્યકર બાનુ મુશ્તાકે તેમના શોર્ટ સ્ટોરી કલેક્શન હાર્ટ લેમ્પ માટે ઇન્ટરનેશનલ બુકર પ્રાઈઝ જીતીને ઇતિહાસ રચ્યો છે. આ એવોર્ડ મેળવતું હાર્ટ લેમ્પ કન્નડ ભાષાનું પ્રથમ શોર્ટ સ્ટોરી કલેક્શન છે. આનું અંગ્રેજીમાં અનુવાદ દીપા ભષ્ઠીએ કર્યું છે, જેઓ આ એવોર્ડ મેળવનાર પ્રથમ ભારતીય અનુવાદક બન્યા છે.

હાર્ટ લેમ્પને વૈશ્વિક સ્તરે પસંદ થયેલા 6 શ્રેષ્ઠ પુસ્તકોમાંથી પસંદ કરવામાં આવ્યું હતું. લંડનના ટેટ મોડર્નમાં આયોજિત સમારંભ કાર્યક્રમમાં બાનુ મુશ્તાક અને દીપા ભષ્ઠીએ સંયુક્ત રીતે એવોર્ડ સ્વીકાર્યો હતો. તેઓને  50,000પાઉન્ડનો પુરસ્કાર મેળવ્યો હતો, જે બંને વચ્ચે સમાન રીતે વહેંચવામાં આવશે.

આ કૃતિમાં દક્ષિણ ભારતીય મુસ્લિમ મહિલાઓના જીવનની કઠણાઈઓને મર્મસ્પર્શી રીતે રજૂ કરવામાં આવી છે. પિતૃસત્તાત્મક સમાજમાં તેમના દ્વારા અનુભવવામાં આવતી લાગણીઓ, લડાઈઓ અને સંઘર્ષોની અસરકારક રજૂઆત ‘હાર્ટ લેમ્પ’ની વિશેષતા છે. બાનુ મુશ્તાકે 1990થી 2023 દરમિયાન કુલ 50 કહાણીઓ લખી હતી. દીપા ભષ્ઠીએ તેમાંથી પસંદ કરેલી 12 કહાણીઓનો અનુવાદ કરીને આ પુસ્તક બનાવ્યું છે.