ફોન કરીને મહાદેવ ભારતીએ કહ્યું, મને લઈ જાઓ

ગિરનારના પવિત્ર ભવનાથ ક્ષેત્રમાં આવેલા શ્રી ભારતી આશ્રમમાંથી લઘુમહંત ૧૦૦૮ મહામંડલેશ્વર મહાદેવ ભારતીજી ૨ નવેમ્બરની વહેલી સવારે ૩:૪૭ વાગ્યે ૫ પાનાની સુસાઇડ નોટ લખી અચાનક ગુમ થયા છે. આશ્રમના સંચાલકોએ સવારે ૮ વાગ્યે ભવનાથ પોલીસને જાણ કરી, જે બાદ પોલીસની અલગ-અલગ ટીમો ગિરનાર જંગલ, CCTV ફૂટેજ અને મોબાઈલ લોકેશનના આધારે શોધખોળમાં લાગી ગઈ છે.

સુસાઇડ નોટમાં શું લખ્યું?

મહાદેવ ભારતીએ પોતાની નોટમાં હિતેશ ઝડફિયા, કૃણાલ હરિયાણી અને પરમેશ્વર ભારતી પર છેલ્લા ત્રણ વર્ષથી માનસિક ત્રાસ આપવાનો આરોપ મૂક્યો છે. તેમણે લખ્યું:

• "છેલ્લા ત્રણ વર્ષથી માનસિક ટોર્ચરિંગ ચાલે છે, છેલ્લા પાંચ મહિનાથી તો વધુ વકર્યું."
• "આ ત્રણેયના ત્રાસથી હું જીવન પૂરું કરું છું. ગિરનારના જંગલમાં સાનિધ્યમાં જીવન સમાપ્ત કરીશ."
• પરમેશ્વર ભારતીને સુરતના પરેશ તરીકે ઓળખાવ્યા, જેને ફેસબુકથી સંપર્ક થયો અને બાપુએ દીક્ષા આપી આશ્રમમાં રાખ્યો, પણ પછી તેમણે જ વિરોધ કર્યો.

નોટમાં વિસ્તારથી વર્ણન છે કે હિતેશ અને કૃણાલને વહીવટમાં રાખ્યા, પણ પરેશ (પરમેશ્વર) આવ્યા પછી વિવાદ વધ્યો. મહાદેવ ભારતીને ગોરા, ઉદાલી, ખડિયા જેવા અન્ય આશ્રમોમાં મોકલવામાં આવ્યા, પણ ત્યાં પણ ત્રાસ ચાલુ રહ્યો. તેમણે રાજકોટમાં માનસિક સારવાર પણ લીધી હતી.

મોડીરાત્રે ટ્રસ્ટીને ફોન: "મને જટાશંકરથી લઈ જાઓ, ભૂલ થઈ ગઈ!"

આશ્રમમાંથી નીકળ્યા પછી મહાદેવ ભારતીએ રાત્રે ૩:૩૦ વાગ્યે ટ્રસ્ટીને ફોન કરી કહ્યું, "હું જટાશંકર છું, મને લઈ જાઓ. મારી ભૂલ થઈ, ફરી આશ્રમે આવવા માંગુ છું." ટ્રસ્ટીઓએ તુરત પોલીસને જાણ કરી, સેવકો અને પોલીસ જટાશંકર પહોંચ્યા, પણ ત્યાંથી પણ બાપુ ગાયબ! મોબાઈલ લોકેશનથી વહેલી સવાર સુધી શોધ ચાલી.

CCTVમાં બાપુ આશ્રમમાંથી નીકળતા દેખાયા

આશ્રમના CCTVમાં સ્પષ્ટ દેખાય છે કે વહેલી સવારે ૩:૪૭ વાગ્યે મહાદેવ ભારતી મોબાઈલ સાથે આશ્રમમાંથી નીકળી ગયા. પોલીસે ૮:૩૦ વાગ્યે આશ્રમે પહોંચી પૂછપરછ કરી, ફૂટેજ તપાસ્યા.

પોલીસનું નિવેદન

ભવનાથ પોલીસ સ્ટેશનના PI હુંબલે કહ્યું: "સુસાઇડ નોટમાં અંગત મનદુ:ખના કારણો જણાવ્યા છે. અલગ-અલગ ટીમો ગિરનાર જંગલમાં શોધખોળ કરી રહી છે. મોબાઈલ લોકેશન અને CCTV પર તપાસ ચાલુ છે."

ગુરુભાઈ ઈશ્વરાનંદ બાપુની અપીલ

ગુરુ હરિહરાનંદ બાપુના ગુરુભાઈ ઈશ્વરાનંદ ભારતીએ કહ્યું: "આ ઘટનાથી ગુરુજી આઘાતમાં છે, તબિયત લથડી છે. ભાવિકોને અપીલ છે કે ખોટી અફવા ન ફેલાવો. પોલીસ પર વિશ્વાસ રાખો, વહેલી તકે બાપુ સુરક્ષિત મળી આવશે."

પૂર્વ વિવાદ: ૫૦૦ કરોડની મિલકતની લડત

ભારતી આશ્રમ ટ્રસ્ટની ગુજરાતમાં ચાર જગ્યાએ આશ્રમો છે, કુલ મિલકત અંદાજે ૫૦૦ કરોડની. ૨૦૨૨માં મહંત હરિહરાનંદ ગુમ થયા ત્યારે પણ સત્તા-મિલકતનો વિવાદ ચર્ચામાં આવ્યો હતો. આ કેસમાં પણ તે જ ત્રણેય નામોનો ઉલ્લેખ છે, જે આંતરિક કલહ તરફ ઈશારો કરે છે.

પોલીસે તમામ આરોપીઓની પૂછપરછ શરૂ કરી છે. ગિરનારના જંગલમાં ડ્રોન અને ડોગ સ્ક્વોડની મદદ લેવાઈ રહી છે. ભાવિકોમાં ચિંતા વધી છે, પ્રાર્થનાઓ ચાલુ છે.