Surendranagar : મુળીમાં ખનીજ માફિયાઓ પર તવાઈ, લાખોના કાર્બોસેલનો ગેરકાયદેસર જથ્થો ઝડપાયો!

મુળી સહિતના તાલુકાઓમાં ગેરકાયદેસર ખનીજ ખનન અને વહન અંગે લાંબા સમયથી ઉઠી રહેલી ફરિયાદોને પગલે તંત્ર સક્રિય બન્યું છે. તાજેતરમાં, મુળીના આસુંદ્રાળી ગામની સીમમાં આવેલી સરકારી જમીન પર કરવામાં આવેલા સરપ્રાઈઝ ચેકિંગ દરમિયાન મોટા પાયે ગેરકાયદેસર પ્રવૃત્તિ ઝડપાઈ હતી.

કાર્બોસેલના ગેરકાયદેસર ખનનનો પર્દાફાશ...

પ્રાપ્ત માહિતી અનુસાર, તંત્ર દ્વારા આસુંદ્રાળી ગામની સીમમાં રાત્રિના સમયે ઓચિંતું નિરીક્ષણ કરવામાં આવ્યું હતું. આ દરમિયાન, 12 કુવાઓ પર કાર્બોસેલનું ગેરકાયદેસર ખનન કરતા કેટલાક શખ્સોને રંગે હાથે ઝડપી પાડવાનો પ્રયાસ કરાયો હતો. જોકે, તંત્રની ગાડીઓ જોઈને આ ખનીજ માફિયાઓ અંધારાનો લાભ લઈને નાસી છૂટ્યા હતા.

સ્થળ પરથી રૂ. 13 લાખનો મુદ્દામાલ જપ્ત...

નાસી છૂટેલા શખ્સોની ધરપકડ ભલે ન થઈ શકી હોય, પરંતુ તંત્ર દ્વારા સ્થળ પરથી લાખો રૂપિયાનો મુદ્દામાલ જપ્ત કરવામાં આવ્યો હતો. જેમાં આશરે 200 મેટ્રિક ટન કાર્બોસેલ, 7 બકેટ, 8 ચરખી, અને 1 બાઈક સહિત કુલ રૂપિયા 13 લાખનો મુદ્દામાલ શામેલ છે. આ સમગ્ર મુદ્દામાલને થાણ મામલતદાર કચેરી ખાતે સુરક્ષિત રીતે ખસેડવામાં આવ્યો છે.

ભૂમાફિયાઓ સામે કડક કાર્યવાહીના સંકેત...

આ પ્રકરણમાં ઝડપાયેલા બાઈકના માલિકની ઓળખ કરીને તેમજ સંડોવાયેલા અન્ય ભૂમાફિયાઓ સામે કડક કાયદેસર કાર્યવાહી કરવાની તજવીજ હાથ ધરવામાં આવી છે. તંત્ર દ્વારા આવા ગેરકાયદેસર ખનન પ્રવૃત્તિઓને ડામી દેવા માટે કટિબદ્ધતા દર્શાવવામાં આવી છે, જેથી કુદરતી સંસાધનોનું સંરક્ષણ થઈ શકે અને કાયદાનું શાસન જળવાઈ રહે.