Surat Illegal Pregnancy Tests: ડાયમંડ સિટી સુરતમાં માનવતાને શરમાવે તેવી ઘટના ફરી એકવાર પ્રકાશમાં આવી છે. શહેરના વરાછા વિસ્તારમાં ગેરકાયદે ગર્ભપરીક્ષણ અને ભ્રૂણ હત્યાનું મસમોટું નેટવર્ક ધમધમતું હોવાનો સનસનીખેજ ખુલાસો થયો છે. સુરત જિલ્લા આરોગ્ય વિભાગ અને વરાછા પોલીસે સંયુક્ત રીતે 'મમતા મલ્ટિ-સ્પેશિયાલિટી હોસ્પિટલ' પર ત્રાટકીને આ કાળા કારોબારનો પર્દાફાશ કર્યો છે. આ સમગ્ર રેકેટનો મુખ્ય સૂત્રધાર કોઈ ક્વોલિફાઇડ ડોક્ટર નહીં, પરંતુ જેલની હવા ખાઈ ચૂકેલો એક રીઢો ફાર્માસિસ્ટ હોવાનું બહાર આવ્યું છે.
ફાર્માસિસ્ટ બન્યો 'ડોક્ટર' આ સમગ્ર કેસની સૌથી ચોંકાવનારી વિગત એ છે કે, જે હોસ્પિટલમાં ગર્ભપાતના જટિલ ઓપરેશનો થતા હતા, તેનો સંચાલક રામગોપાલ કિશન ખંડેલવાલ માત્ર એક ફાર્માસિસ્ટ છે. તબીબી જ્ઞાનના નામે માત્ર દવાઓની જાણકારી ધરાવતો આ શખ્સ પોતે જ ડોક્ટર બનીને સગર્ભા મહિલાઓના ગર્ભપાત કરતો હતો. મેડિકલ પ્રોટોકોલ અને કાયદાના લીરેલીરા ઉડાવીને તે લાંબા સમયથી આ ગોરખધંધો ચલાવી રહ્યો હતો. બાતમી મળતા જ મુખ્ય જિલ્લા આરોગ્ય અધિકારી ડો. અનિલ પટેલે ટીમ બનાવી વરાછાના લાભેશ્વર ચાર રસ્તા પાસે આવેલી હોસ્પિટલ પર ઓચિંતો દરોડો પાડ્યો હતો.
સફાઈ કામદાર મહિલાએ ખોલી પોલ આરોગ્ય વિભાગની ટીમ જ્યારે હોસ્પિટલના પહેલા અને બીજા માળે પહોંચી ત્યારે ત્યાં અફરાતફરીનો માહોલ સર્જાયો હતો. તપાસ દરમિયાન હોસ્પિટલના બેડ પર ત્રણ સગર્ભા મહિલાઓ મળી આવી હતી, જેઓ ગેરકાયદે ગર્ભપાત કરાવવા માટે અહીં આવી હતી. અધિકારીઓએ જ્યારે હોસ્પિટલમાં કચરા-પોતું કરતી મહિલા કર્મચારીની કડકાઈથી પૂછપરછ કરી, ત્યારે તેણે રામગોપાલના તમામ પાપોનો ઘડો ફોડી નાખ્યો હતો. મહિલાએ કબૂલાત કરી હતી કે રામગોપાલ ખંડેલવાલ પોતે જ અહીં આવતી મહિલાઓના ઓપરેશનો કરતો હતો અને કોઈ ક્વોલિફાઇડ ગાયનેકોલોજિસ્ટ અહીં આવતા નહોતા.
પોલીસ અને આરોગ્ય વિભાગની કડક કાર્યવાહી દરોડા દરમિયાન જે ત્રણ મહિલાઓ મળી આવી હતી, તેમાં એક મહિલા વ્યારાની અને એક મહારાષ્ટ્રના શિરપુરની હોવાનું ખુલ્યું છે. આ મહિલાઓએ સ્વીકાર્યું હતું કે તેઓ ભ્રૂણ હત્યાના ઈરાદે જ અહીં આવી હતી. આ મહિલાઓને વધુ તપાસ માટે સિવિલ હોસ્પિટલ ખસેડવા 108 એમ્બ્યુલન્સ બોલાવવામાં આવી હતી. જોકે, આ હોબાળાનો લાભ ઉઠાવીને વ્યારાની 24 વર્ષીય ગર્ભવતી મહિલા તક જોઈને હોસ્પિટલમાંથી ભાગી છૂટી હતી. બાકીની બે મહિલાઓને પોલીસ બંદોબસ્ત હેઠળ સિવિલમાં દાખલ કરવામાં આવી છે.
જેલમાંથી છૂટતા જ ફરી એ જ કાળો ધંધો રામગોપાલ ખંડેલવાલ કોઈ નવો નિશાળિયો નથી, પરંતુ કાયદાથી જરાય ન ડરતો રીઢો ગુનેગાર છે. વર્ષ 2025માં પણ તે વરાછામાં 'શિવાય હોસ્પિટલ' નામે આવું જ રેકેટ ચલાવતા ઝડપાયો હતો. તે સમયે તેની સાથે ડો. મિતેશ ધોરાજીયા અને નર્સ કલ્પના પવારની પણ ધરપકડ થઈ હતી. જેલમાંથી જામીન પર છૂટ્યાના થોડા જ સમયમાં તેણે સુધરવાને બદલે હોસ્પિટલનું નામ બદલી 'મમતા હોસ્પિટલ' રાખી દીધું અને ફરીથી એ જ વિસ્તારમાં ભ્રૂણ હત્યાની હાટડી ખોલી દીધી હતી.
સૂત્રધાર ફરાર મુખ્ય જિલ્લા આરોગ્ય અધિકારી ડો. અનિલ પટેલની ફરિયાદના આધારે વરાછા પોલીસે રામગોપાલ ખંડેલવાલ વિરુદ્ધ 'પ્રી-કન્સપ્શન એન્ડ પ્રી-નેટલ ડાયગ્નોસ્ટિક ટેકનિક (PC-PNDT) એક્ટ' હેઠળ ગુનો દાખલ કર્યો છે. હાલમાં હોસ્પિટલને તંત્ર દ્વારા સીલ મારી દેવામાં આવ્યું છે. દરોડાની ગંધ આવી જતાં મુખ્ય સૂત્રધાર રામગોપાલ સ્થળ પરથી ફરાર થઈ ગયો છે, જેને પકડવા માટે પોલીસે અલગ-અલગ ટીમો બનાવી છે. પોલીસ હવે એ દિશામાં તપાસ કરી રહી છે કે, આ ફાર્માસિસ્ટને ગર્ભપરીક્ષણ માટે પોર્ટેબલ સોનોગ્રાફી મશીન કોણ પૂરું પાડતું હતું? અને આ રેકેટમાં શહેરના અન્ય કયા ડોક્ટરો કે વચેટીયાઓ સામેલ છે? સુરત જેવા વિકસિત શહેરમાં શિક્ષિત લોકો દ્વારા હજુ પણ દીકરા-દીકરીના ભેદભાવ રાખીને આવા ગેરકાયદે કૃત્યોને પ્રોત્સાહન આપવામાં આવે છે તે સમાજ માટે લાલબત્તી સમાન કિસ્સો છે.

સુરત ભ્રૂણ હત્યા રેકેટનો મુખ્ય સૂત્રધાર

રીઢા ગુનેગાર ફાર્માસિસ્ટની હોસ્પિટલ પર આરોગ્ય વિભાગના દરોડા

May 6, 2026 | 12:18 IST