આગામી સપ્તાહમાં રાજ્યમાં ભારેથી અતિભારે વરસાદની આગાહી, 21 જળાશયો હાઇએલર્ટ!

ગત 16 જૂનથી રાજ્યમાં થયેલી ચોમાસાની એન્ટ્રી બાદ એકદંરે તમામ જિલ્લામાં મેઘરાજાએ હાજરી પુરાવી છે. મેઘરાજા ક્યાંક ધોધમાર તો ક્યાંક ધીમી ધારે હેત વરસાવી રહ્યા છે. હાલ દક્ષિણ ગુજરાતમાં અપર એર સાઇક્લોનિક સર્ક્યુલેશન સક્રિય હોવાને કારણે વરસાદ વરસી રહ્યો છે. હવામાન વિભાગે રાજ્યમાં 7 જુલાઈ સુધી ભારે વરસાદની આગાહી કરી છે. આજે 6 જિલ્લામાં ઓરેન્જ એલર્ટ અને 12 જિલ્લામાં યલો એલર્ટ આપવામાં આવ્યું છે. તેમજ રાજ્યમાં આગામી સપ્તાહથી ભારેથી અતિભારે વરસાદની સંભાવના વ્યક્ત કરાઈ છે.

છેલ્લા 24 કલાકમાં વલસાડના કપરાડામાં સૌથી વધુ 4 ઇંચ વરસાદ :

છેલ્લા 24 કલાકમાં રાજ્યના 89 તાલુકામાં વરસાદ વરસ્યો છે.વલસાડના કપરાડામાં 4 ઇંચ,તાપીના ડોલવણમાં બે ઇંચ,ડાંગના સુબીરમાં વલસાડના ઉમરગામ, ધરમપુર તેમજ વાપીમાં એક ઇંચ વરસાદ વરસ્યો હતો.આ ઉપરાંત અન્ય તાલુકામાં હળવો વરસાદ વરસ્યો હતો.

ગઈકાલે સ્ટેટ ઈમરજન્સી ઓપરેશન સેન્ટર-ગાંધીનગર (SEOC) ખાતે વેધર વોચ ગ્રુપની બેઠક યોજાઈ હતી.જેમાં રાજ્યમાં ચોમાસાની સ્થિતિ અને તે માટે સંબંધિત વિભાગોની તૈયારી અંગે સમીક્ષા હાથ ધરાઈ હતી.રાજ્યના વિવિધ સ્થળે NDRF-SDRFની 32 ટીમો તૈનાત કરાઈ છે.આ ઉપરાંત 2 ટીમને સ્ટેન્ડબાય રાખવામાં આવી છે.રાજ્યના 206 જળાશયો પૈકી 21 જળાશયો હાઇએલર્ટ, 12 જળાશયો એલર્ટ પર તથા 19 જળાશયો વોર્નિંગ પર છે.માર્ગ અને મકાન વિભાગના અધિકારીએ જણાવ્યું હતું કે,હાલ રાજ્યમાં ઓવર ટોપીંગ અને પાણી ભરાવાના કારણે 94 રસ્તા બંધ છે. જે પાણી ઉતરતા પૂર્વવત કરવામાં આવશે.

અનેક રાજ્યોમાં વરસાદની ધમાકેદાર બેટિંગ જોવા મળી છે. ગુજરાત તેમજ અનેક જિલ્લાઓમાં વરસાદ  પડ્યો છે. દક્ષિણ ગુજરાતનાં સુરત જિલ્લામાં વધારે વરસાદ નોંધાયો હતો જેના કારણે સ્થાનિક લોકોનું જન જીવન ઠપ થઈ ગયું હતું વરસાદને કારણે અનેક જગ્યા પાણી પણ ભરાઈ ગયા હતા. સ્થાનિક લોકોના ઘરની અંદર પાણી ભરાઈ ગયું હતું, ભારે વરસાદને કારણે લોકોને હાલાકી પણ પહોંચી હતી. 

આજે આ જિલ્લામાં વરસાદની આગાહી:

ઓરેન્જ એલર્ટ- બનાસકાંઠા, અરવલ્લી, મહિસાગર, દાહોદ, નવસારી, વલસાડ, દમણ, દાદરા અને નગર હવેલી
યલો એલર્ટ- અમરેલી, ભાવનગર, ભરૂચ, સુરત, તાપી, ડાંગ, નર્મદા, છોટા ઉદેપુર, વડોદરા, પંચમહાલ, મહેસાણા, બનાસકાંઠા

3 જુલાઈના રોજ આ જિલ્લામાં વરસાદની આગાહી:

ઓરેન્જ એલર્ટ-બનાસકાંઠા, સાબરકાંઠા

યલો એલર્ટ- કચ્છ, પાટણ, મહેસાણા, ગાંધીનગર, અરવલ્લી, ખેડા, મહિસાગર, દાહોદ, પંચમહાલ, સુરત, તાપી, ડાગ, નવસારી, વલસાડ, દમણ અને દાદરાનગર હવેલી, ગીર સોમનાથ, અમરેલી, ભાવનગર

4 જુલાઈના રોજ આ જિલ્લામાં વરસાદની આગાહી: 

યલો એલર્ટ- ગીર સોમનાથ, અમરેલી, ભાવનગર, નવસારી, વલસાડ, દમણ, દાદરા નગર હવેલી, સાબરકાંઠા, અરવલ્લી, મહીસાગર, દાહોદ

5 જુલાઈના રોજ આ જિલ્લામાં વરસાદની આગાહી: 

ઓરેન્જ એલર્ટ- અરવલ્લી, મહીસાગર, દાહોદ
યલો એલર્ટ- ગીર સોમનાથ, અમરેલી, ભાવનગર, કચ્છ, પાટણ, બનાસકાંઠા, સાબરકાંઠ, મહેસાણા, પંચમહાલ, છોટા ઉદેપુર, નવસારી, વલસાડ, દમણ અને દાદર નગર હવેલી

6 જુલાઈના રોજ આ જિલ્લામાં વરસાદની આગહી: 

ઓરેન્જ એલર્ટ- બનાસકાંઠા, સાબરકાંઠા, અરવલ્લી, નવસારી, વલસાડ, દમણ અને દાદરા નગર હવેલી
યલો એલર્ટ- ગીર સોમનાથ, અમરેલી, ભાવનગર, ભરૂચ, સુરત, તાપી, નર્મદા, ડાંગ, છોટાઉદેપૂર, વડોદરા, આણંદ, ખડા, પંચમહાલ, દાહોદ, મહિસાગર, અમદાવાદ, ગાંધીનગર, મહેસાણા, પાટણ, કચ્છ

7 જુલાઈના રોજ આ જિલ્લામાં વરસાદની આગાહી: 

ઓરેન્જ એલર્ટ- બનાસકાંઠા, સાબરકાંઠા
યલો એલર્ટ- દેવભૂમિ દ્વારકા, જામનગર, પોરબંદર, કચ્છ, પાટણ, મહેસાણા, અરવલ્લી, સુરત, નવસારી, વલસાડ, દમણ અને દાદરા નગર હવેલી

રાજ્યમાં જૂન મહિનામાં 110 મિમીની જરૂરિયાત સામે 288 મિમી વરસાદ: 
સામાન્ય રીતે ગુજરાતમાં જૂન મહિનામાં સરેરાશ 110.8 મિમી (4.43 ઇંચ) વરસાદની જરૂરિયાત હોય છે. એની સામે 288.7 મિમી (11.55 ઇંચ) વરસાદ મળ્યો છે. જરૂરિયાત કરતાં 161% વધુ વરસાદે 44 વર્ષનો રેકોર્ડ તોડ્યો છે. 125 વર્ષના ઇતિહાસમાં જૂન મહિનામાં સૌથી વધુ 298.3 મિમી (11.93 ઇંચ) વરસાદ 1980 માં નોંધાયો હતો, એટલે કે આ વખતે 44 વર્ષ બાદ સૌથી વધુ વરસાદ સાથે 125 વર્ષનો બીજો સૌથી વધુ વરસાદનો રેકોર્ડ બન્યો છે. 2024માં જૂનમાં રાજ્યમાં મેઘરાજાની 9 દિવસની હાજરી સામે ચાલુ સિઝનમાં જૂનના 16 દિવસની હાજરી આપી છે. રાજ્યના 5 ઝોનમાં દક્ષિણ ગુજરાતમાં સૌથી વધુ 19 દિવસ અને કચ્છમાં સૌથી ઓછા 8 દિવસ મેઘરાજા વરસ્યા છે. ઉલ્લેખનીય છે કે સામાન્ય રીતે જે દિવસે 2.5 મિમી કે તેથી વધુ વરસાદ વરસે એને વરસાદનો 1 દિવસ ગણવામાં આવે છે.

રાજ્યમાં હાલ ચોમાસુ નબળુ પડ્યું છે. જોકે,તેમ છતાં કેટલાય જિલ્લામાં ગતરોજ વરસાદ વરસ્યો હતો.ખાસ કરીને તાપી જિલ્લામાં ધોધમાર વરસાદ વરસ્યો હતો.જેથી તાપી જિલ્લાના છેવાડાના તાલુકાના અને મહારાષ્ટ્ર બોર્ડરને અડીને આવેલા કુકરમુંડા ગામથી 10 કિલોમીટરના અંતરે સાતપુડાની ગિરિમાળામાં આવેલો વાલ્હેરી ધોધ સક્રિય થયો હતો.તેમજ કચ્છ જિલ્લામાં પાલર ધુના,કડિયા ધ્રુવ સહિતના ધોધ જીવંત થયા છે