Gujarat Rain: સાબરકાંઠાના વડાલીમાં 24 કલાકમાં 12 ઇંચ વરસાદ

રાજ્યમાં હવામાન વિભાગ દ્વારા આગામી સાત દિવસ સુધી વરસાદને લઇને આગાહી કરી છે. ત્યારે આજે રાજ્યના 6 જિલ્લામાં ઓરેન્જ એલર્ટ આપવામાં આવ્યું છે. જ્યારે 15 જિલ્લામાં યલો એલર્ટ આપવામાં આવ્યું છે. ઓરેન્જ એલર્ટના પગલે મધરાતે બનાસકાંઠા જિલ્લાના કેટલાક વિસ્તારોમાં વરસાદ પડ્યો છે. 

અમીરગઢ પંથકમાં ભારે વરસાદ પડતા ખેતરો બેટમાં ફેરવાયા છે. જ્યારે અમીરગઢના ઈકબાલગઢ હાઇવેથી બજારમાં આવતા રોડ પર ઘૂંટણસમા પાણી ભરાતા વાહન ચાલકોને હાલાકી ભોગવવી પડી રહી છે. જ્યારે ઈકબાલગઢના મુખ્ય માર્ગ પર આવેલા રેલવે અંડરબ્રિજમાં 11 ફૂટ જેટલા ભરાયા પાણી ભરાઇ જતા રાહદારીઓ અટવાઇ ગયા છે.

વરસાદની આગાહીને પગલે સાબરકાંઠાના વડાલીમાં 24 કલાકમાં 12 ઇંચ તો ખેડબ્રહ્મામાં 10 ઇંચ વરસાદ ખાબક્યો છે. ભારે વરસાદના કારણે હરણાવ નદી બે કાંઠે વહી રહી છે. બનાસકાંઠા, પાટણ અને મહેસાણામાં વરસાદને લઈને રેડ એલર્ટ આપ્યું છે તો કચ્છ, સુરેન્દ્રનગર, સાબરકાંઠા, અરવલ્લી, દેવભૂમિ દ્વારકા, જામનગર, મોરબી, રાજકોટ, મહિસાગર, દાહોદ, વલસાડ, દમણ, દાદર અને નગરહવેલીમાં હળવાથી મધ્યમ વરસાદને લઈને ઓરેન્જ એલર્ટ આપ્યું છે. બનાસકાંઠાના અમીરગઢ, ઈકબાલગઢ પંથકમાં સવારથી જ વરસાદ વરસી રહ્યો છે.

બનાસકાંઠામાં ઉપરવાસમાં ભારે વરસાદના પગલે બાલારામ નદી બે કાંઠે વહેતી થઈ છે. સિઝનના પહેલા જ વરસાદમાં બનાસકાંઠા જિલ્લાની નદીઓ છલકાઈ ગઈ છે. નદીનું પાણી દાંતીવાડા ડેમમાં પહોંચતા ખેડૂતોને આવનાર સિઝનમાં ફાયદો થશે.