ગુજરાતમાં ભારે વરસાદ સાથે વાવાઝોડાની આગાહી, 24થી 28 મે દરમિયાન તોફાની માહોલ

ગુજરાતમાં વધી રહેલી ગરમીના માહોલ વચ્ચે હવે રાજ્યના અનેક વિસ્તારોમાં વરસાદ અને વાવાઝોડાની આગાહી હવામાન વિભાગ અને હવામાન નિષ્ણાત અંબાલાલ પટેલ દ્વારા કરવામાં આવી છે. આગામી દિવસોમાં રાજ્યના દક્ષિણ, સૌરાષ્ટ્ર અને મધ્ય ગુજરાતના વિસ્તારોમાં ગાજવીજ સાથે ભારે વરસાદ પડે તેવી શક્યતા છે.

હવામાન નિષ્ણાત અંબાલાલ પટેલના જણાવ્યા મુજબ, 21 મેના રોજ એક નવી વેધર સિસ્ટમ સક્રિય થશે. ત્યારબાદ 24થી 25 મે દરમિયાન મુંબઈ અને ગોવા વચ્ચે દરિયાઈ વિસ્તારોમાં વધુ એક મજબૂત સિસ્ટમ સર્જાઈ શકે છે. આ સિસ્ટમ વાવાઝોડામાં પરિવર્તિત થઈ શકે છે અને તેના પવનની ઝડપ 100થી 150 કિમી પ્રતિ કલાક સુધી પહોંચી શકે છે. આ વાવાઝોડું ગુજરાતના દક્ષિણ અને સૌરાષ્ટ્રના દરિયાકાંઠા વિસ્તારોને અસર કરી શકે છે.

ગુજરાતના ક્યા ક્યા જિલ્લાઓમાં આ પ્રભાવ દેખાઈ શકે છે તેનો ઉલ્લેખ કરતા અંબાલાલ પટેલે જણાવ્યું છે કે સુરત, નવસારી, વલસાડ, જૂનાગઢ, અમરેલી અને ભાવનગરના વિસ્તારોમાં ભારેથી અતિભારે વરસાદ પડવાની શક્યતા છે.આ સાથે જ કચ્છ અને ઉત્તર ગુજરાતના અમુક વિસ્તારોમાં પણ સામાન્યથી મધ્યમ વરસાદ પડવાની આગાહી છે.

ભારતીય હવામાન વિભાગ (IMD) દ્વારા 19થી 24 મે દરમિયાન રોજબરોજના વિસ્તૃત વરસાદી વિસ્તારની આગાહી કરવામાં આવી છે. જેમાં બોટાદ, રાજકોટ, ગીર સોમનાથ, સાબરકાંઠા, દાહોદ, પંચમહાલ, ખેડા, આણંદ, વડોદરા, છોટાઉદેપુર, ભરૂચ, નર્મદા, તાપી, ડાંગ, દમણ, દાદરા નગર હવેલી જેવા જિલ્લાઓમાં પણ વરસાદી માહોલ જોવા મળી શકે છે.

આ સાથે 40થી 50 કિલોમીટર પ્રતિ કલાકની ઝડપે પવન ફૂંકાવાની પણ શક્યતા છે. રાજ્યના ખેડૂતો, માછીમારો અને સામાન્ય નાગરિકોને સતર્ક રહેવાની સલાહ આપવામાં આવી છે.