ગુજરાતના હવામાનને લઈને હવામાન વિભાગે મહત્વની આગાહી કરી છે. રાજ્યમાં હવે ધીમે ધીમે ઉનાળાનો મિજાજ જોવા મળશે અને ગરમીના પારામાં વધારો થશે. આગામી સાત દિવસ દરમિયાન સમગ્ર રાજ્ય સહિત કેન્દ્રશાસિત પ્રદેશોમાં વાતાવરણ સંપૂર્ણપણે સૂકું રહેવાની શક્યતા છે.
વેસ્ટર્ન ડિસ્ટર્બન્સની ગેરહાજરી અને વધતું તાપમાન :&nbsp;
હવામાન વિભાગના જણાવ્યા અનુસાર, હાલમાં કોઈ સક્રિય વેસ્ટર્ન ડિસ્ટર્બન્સ જોવા મળી રહ્યું નથી, જેના કારણે રાજ્યમાં વરસાદ પડવાની કોઈ જ શક્યતા નથી. પાકિસ્તાન પર સર્જાયેલા સાયક્લોનિક સર્ક્યુલેશનની અસર પણ ગુજરાત પર જોવા મળશે નહીં. પરિણામે, આગામી બે દિવસમાં મહત્તમ તાપમાનમાં 2થી 3 ડિગ્રી સેલ્સિયસનો વધારો નોંધાઈ શકે છે. ત્યારપછી તાપમાન સ્થિર રહેશે, પરંતુ બપોરના સમયે ગરમીનો અહેસાસ વધુ થશે.
અમદાવાદ અને ગાંધીનગરમાં કેવું રહેશે વાતાવરણ ?
રાજ્યના મુખ્ય શહેરો એવા અમદાવાદ અને ગાંધીનગરમાં આકાશ આંશિક વાદળછાયું રહેવાની સંભાવના છે. જોકે, વાદળછાયા વાતાવરણ છતાં ગરમીમાં કોઈ મોટો ઘટાડો થશે નહીં. અમદાવાદમાં મહત્તમ તાપમાન 37 ડિગ્રીની આસપાસ અને લઘુત્તમ તાપમાન 23 થી 24 ડિગ્રીની વચ્ચે રહેવાનું અનુમાન છે. લઘુત્તમ તાપમાનમાં આગામી એક સપ્તાહ સુધી કોઈ મોટા ફેરફાર થવાના સંકેતો નથી.
રાજ્યના તાપમાનના આંકડા અને પવનની સ્થિતિ :&nbsp;
હાલમાં રાજ્યમાં સૌથી વધુ ગરમી કેશોદમાં અનુભવાઈ રહી છે, જ્યાં તાપમાન 37.9 ડિગ્રી નોંધાયું છે. જ્યારે દીવમાં સૌથી ઓછું 20.1 ડિગ્રી તાપમાન રહ્યું છે. પવનની વાત કરીએ તો, ઉત્તર અને દક્ષિણ ગુજરાતના દરિયાકાંઠાના વિસ્તારોમાં 15 થી 20 નોટ્સની ઝડપે સામાન્ય પવન ફૂંકાઈ રહ્યો છે. હાલમાં માછીમારો માટે કોઈ વિશેષ ચેતવણી જાહેર કરવામાં આવી નથી.
માર્ચ મહિનાના અંતિમ દિવસોમાં રાજ્યવાસીઓએ ગરમી માટે તૈયાર રહેવું પડશે. સારી વાત એ છે કે આ સમયગાળા દરમિયાન કમોસમી વરસાદ એટલે કે માવઠાની કોઈ જ સંભાવના નથી, જેનાથી ખેડૂતોને રાહત મળી શકે છે.&nbsp;

ગુજરાત હવામાન સમાચાર ગરમી વધશે

રાજ્યમાં માવઠાની કોઈ જ શક્યતા નથી, પાકિસ્તાન તરફના સાયક્લોનિક સર્ક્યુલેશનની અસર નહિવત

March 25, 2026 | 12:25 IST