રાહુલ ગાંધીની રેલીથી ગેરહાજરી ભારે પડી! 24 જિલ્લા પ્રમુખ સહિત ગુજરાત યુથ કોંગ્રેસના 49 હોદ્દેદારો સસ્પેન્ડ

Gujarat Youth Congress 49 Office Bearers Suspended: ગુજરાત કોંગ્રેસના યુવા સંગઠનમાં મોટો આંતરિક વિવાદ સામે આવ્યો છે. દિલ્હીમાં રાહુલ ગાંધીના નેતૃત્વમાં યોજાયેલી ‘વોટ ચોરી’ મુદ્દાની રેલીમાં ગેરહાજર રહેવું ગુજરાત યુથ કોંગ્રેસના 49 હોદ્દેદારોને ભારે પડ્યું છે. ઈન્ડિયન યુથ કોંગ્રેસે 24 જિલ્લા પ્રમુખ સહિત કુલ 49 હોદ્દેદારોને તાત્કાલિક અસરથી સસ્પેન્ડ કરી દીધા છે. આગામી સૂચના ન મળે ત્યાં સુધી તેમને સંગઠનનાં પદ પરથી દૂર રાખવાનો નિર્ણય લેવાયો છે. આ કાર્યવાહી બાદ ગુજરાત કોંગ્રેસના યુવા સંગઠનમાં ચર્ચા તેજ બની છે. સવાલ એ છે કે દિલ્હીની એક રેલીમાં ગેરહાજરીના કારણે આટલી મોટી સંખ્યામાં હોદ્દેદારો સામે કાર્યવાહી કેમ કરવામાં આવી?

દિલ્હીની રેલીમાં હાજર રહેવા અપાઈ હતી ફરજિયાત સૂચના
1 નવેમ્બરે દિલ્હીમાં રાહુલ ગાંધીના નેતૃત્વમાં ‘વોટ ચોરી’ના મુદ્દે મોટી રેલી યોજાઈ હતી. આ કાર્યક્રમમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી હતી. ગુજરાત કોંગ્રેસ, મહિલા કોંગ્રેસ, યુથ કોંગ્રેસ અને NSUIના કાર્યકર્તાઓને પણ દિલ્હીમાં હાજર રહેવા સૂચના આપવામાં આવી હતી. કોંગ્રેસ દ્વારા કાર્યકર્તાઓને દિલ્હી લઈ જવા અને પરત લાવવાની વ્યવસ્થા પણ કરવામાં આવી હતી. ઈન્ડિયન યુથ કોંગ્રેસે બેઠક યોજીને હોદ્દેદારોને રેલીમાં ફરજિયાત હાજર રહેવા જણાવ્યું હતું. તેમ છતાં ગુજરાત યુથ કોંગ્રેસના 49 હોદ્દેદારો રેલીમાં પહોંચ્યા નહોતા. ખાસ વાત એ છે કે આ હોદ્દેદારોએ ગેરહાજર રહેવા અંગે અગાઉથી સંગઠનને જાણ પણ કરી નહોતી.

પ્રદેશ પ્રમુખ પ્રવીણસિંહ વણોલે શું કહ્યું?
ગુજરાત પ્રદેશ યુથ કોંગ્રેસના પ્રમુખ પ્રવીણસિંહ વણોલના જણાવ્યા અનુસાર, આ પ્રકારની કાર્યવાહી માત્ર ગુજરાતમાં જ નહીં, પરંતુ અન્ય રાજ્યોમાં પણ કરવામાં આવી છે. દિલ્હી આવવા માટે સૂચના આપવામાં આવી હોવા છતાં જે હોદ્દેદારો હાજર રહ્યા નહોતા, તેમની સામે કાર્યવાહી કરાઈ છે. તેમણે જણાવ્યું કે દિલ્હીની રેલી બાદ ઓનલાઈન બેઠક યોજવામાં આવી હતી, જેમાં 49 હોદ્દેદારોને સસ્પેન્ડ કરવાનો નિર્ણય લેવાયો હતો. હવે સંગઠન તરફથી એક ફોર્મ બહાર પાડવામાં આવશે, જેમાં ગેરહાજરીનું કારણ પૂછવામાં આવશે. જે હોદ્દેદારો સક્રિય રીતે સંગઠન સાથે જોડાવા ઇચ્છશે અને યોગ્ય કારણ રજૂ કરશે, તેમને ફરીથી સંગઠનમાં સામેલ કરવાની શક્યતા રહેશે.

પાટણના ધારાસભ્ય કિરીટ પટેલ રેલીમાં કેમ ન ગયા?
આ કાર્યવાહી અંગે પાટણના ધારાસભ્ય કિરીટ પટેલે જણાવ્યું હતું કે તેઓ દિલ્હીમાં યોજાયેલી રેલીમાં હાજર રહી શક્યા નહોતા. તેમના મતવિસ્તારમાં મુખ્યમંત્રીનો કાર્યક્રમ હોવાથી તેઓ દિલ્હીની રેલીમાં જઈ શક્યા ન હોવાનું તેમણે સ્પષ્ટ કર્યું હતું.

'ટિકિટ પણ કરાવી હતી, પરંતુ બીમારીના કારણે ન જઈ શક્યો'
અમદાવાદ મ્યુનિસિપલ કોર્પોરેશનની ચૂંટણીમાં ભાઈપુરા-હાટકેશ્વર વોર્ડમાંથી ચૂંટણી લડેલા યુથ કોંગ્રેસના પૂર્વ જનરલ સેક્રેટરી ગૌરાંગ મકવાણાએ પણ પોતાની ગેરહાજરીનું કારણ આપ્યું છે. તેમના જણાવ્યા મુજબ, તેમણે દિલ્હી જવા માટે ટિકિટ પણ કરાવી હતી અને બેઠક દરમિયાન તે ટિકિટ પ્રમુખને મોકલી હતી. જોકે, તબિયત ખરાબ થઈ જતાં તેઓ રેલીમાં હાજર રહી શક્યા નહોતા. સંગઠન દ્વારા કરવામાં આવેલી કાર્યવાહી અંગે તેઓ પુનર્વિચારણા કરવાની રજૂઆત કરશે.

24 જિલ્લા પ્રમુખ સહિત કયા હોદ્દેદારો સામે કાર્યવાહી?
ઈન્ડિયન યુથ કોંગ્રેસની કાર્યવાહી હેઠળ અમદાવાદ ગ્રામ્ય, અમરેલી, આણંદ, અરવલ્લી, બનાસકાંઠા, ભરૂચ, ડાંગ, દેવભૂમિ દ્વારકા, ગાંધીનગર શહેર, ગાંધીનગર ગ્રામ્ય, ગીર સોમનાથ, જૂનાગઢ શહેર અને ગ્રામ્ય, મહીસાગર, મહેસાણા, નર્મદા, નવસારી, પંચમહાલ, પાટણ, પોરબંદર, રાજકોટ શહેર, સાબરકાંઠા, વડોદરા શહેર અને સુરેન્દ્રનગર સહિતના જિલ્લાના યુથ કોંગ્રેસ પ્રમુખોને પદ પરથી દૂર કરવામાં આવ્યા છે.

ગુજરાત કોંગ્રેસના યુવા સંગઠનમાં હવે આગળ શું?
દિલ્હીની ‘વોટ ચોરી’ રેલીમાં ગેરહાજરી બાદ ગુજરાત યુથ કોંગ્રેસના 49 હોદ્દેદારોને સસ્પેન્ડ કરવાનો નિર્ણય સંગઠન માટે મોટો ફેરફાર માનવામાં આવી રહ્યો છે. એક તરફ સંગઠન શિસ્ત અને સક્રિયતાનો મુદ્દો ઉઠાવી રહ્યું છે, તો બીજી તરફ કેટલાક હોદ્દેદારો તબિયત અને સ્થાનિક કાર્યક્રમોના કારણે હાજર ન રહી શક્યા હોવાનો બચાવ કરી રહ્યા છે. હવે સંગઠન દ્વારા કારણદર્શક ફોર્મ ભરાવ્યા બાદ કોને ફરી તક આપવામાં આવે છે અને કોનું સસ્પેન્શન યથાવત્ રહે છે, તેના પર સૌની નજર રહેશે. ગુજરાત કોંગ્રેસના યુવા સંગઠનમાં આ કાર્યવાહી બાદ આગળ કેવા ફેરફારો થાય છે તે જોવું મહત્વપૂર્ણ રહેશે.