આગામી 2 દિવસ ભારે પવન અને વરસાદનું ‘ઓરેન્જ એલર્ટ’

Gujarat Pre Monsoon Storm: સમગ્ર ગુજરાતમાં પ્રી-મોન્સૂન એક્ટિવિટીએ અત્યંત રૌદ્ર અને તોફાની સ્વરૂપ ધારણ કર્યું છે. હવામાન વિભાગની આગાહી વચ્ચે 1 જૂનની રાત્રે અને 2 જૂનની વહેલી સવારે અમદાવાદ સહિત રાજ્યના અનેક જિલ્લાઓમાં 50 થી 60 કિમી પ્રતિ કલાકની ઝડપે ફૂંકાતા તોફાની પવન, ધૂળની ડમરીઓ અને વીજળીના કડાકા-ભડાકા સાથે મેઘરાજાની ધમાકેદાર એન્ટ્રી થઈ છે. આ અચાનક આવેલા મિની વાવાઝોડા અને વરસાદને કારણે સામાન્ય જનજીવન અસ્તવ્યસ્ત થઈ ગયું છે. લાંબા સમયથી અસહ્ય ઉકળાટ અને બફારાથી ત્રસ્ત નાગરિકોને ગરમીથી મોટી રાહત તો મળી છે, પરંતુ અનેક સ્થળોએ ભારે વિનાશના દ્રશ્યો પણ સામે આવ્યા છે. કુદરતી આફતના કારણે રાજ્યભરમાં 7 લોકોના મોત નીપજ્યા છે, જ્યારે ખેતીવાડી અને વીજ માળખાને વ્યાપક નુકસાન પહોંચ્યું છે.

હવામાન વિભાગની ચેતવણી: રાજ્યમાં બે દિવસ 'ઓરેન્જ એલર્ટ'
હવામાન વિભાગના જણાવ્યા અનુસાર, હાલમાં વાતાવરણમાં એકસાથે ત્રણ મોટી સિસ્ટમ સક્રિય થઈ છે, જેના કારણે આ અસ્થિરતા જોવા મળી રહી છે. આ સિસ્ટમોમાં બે સાયકલોનિક સર્ક્યુલેશન (Cyclonic Circulation) અને એક વેસ્ટર્ન ડિસ્ટર્બન્સનો (Western Disturbance) સમાવેશ થાય છે. આ અસરોને પગલે હવામાન વિભાગે 2 થી 5 જૂન સુધી ગુજરાતના વિવિધ વિસ્તારોમાં ગાજવીજ સાથે ભારે વરસાદ પડવાની સંભાવના વ્યક્ત કરી છે. ખાસ કરીને આજે અને આવતીકાલે (2 અને 3 જૂન) સમગ્ર ગુજરાતમાં 'ઓરેન્જ એલર્ટ' જાહેર કરવામાં આવ્યું છે.

પવનની ગતિ પ્રતિ કલાક 50 થી 60 કિમી સુધી પહોંચી શકે
આ સમયગાળા દરમિયાન પવનની ગતિ પ્રતિ કલાક 50 થી 60 કિમી સુધી પહોંચી શકે છે, જેથી લોકોને બિનજરૂરી બહાર ન નીકળવા અને સાવચેત રહેવાની સલાહ આપવામાં આવી છે. અમદાવાદ અને ગાંધીનગરમાં ગાજવીજ સાથે મધ્યમ વરસાદી સ્પેલની આગાહી છે, જ્યાં મહત્તમ તાપમાન 39 ડિગ્રી સેલ્સિયસ આસપાસ રહેશે. દક્ષિણ ભારતમાં પણ નૈઋત્યનું ચોમાસું સાનુકૂળ ગતિએ આગળ વધી રહ્યું છે અને કેરળમાં 4 જૂનથી ચોમાસાનું સત્તાવાર આગમન થવાની શક્યતા છે.

દાહોદમાં સાઈન બોર્ડ ધરાશાયી થતાં ત્રણના મોત, નર્મદામાં બાળકીનું મોત
આ તોફાની પવન સમગ્ર રાજ્ય માટે આફત લઈને આવ્યો છે. દાહોદ જિલ્લામાં સોમવારે સાંજે આવેલા ભયાનક વાવાઝોડા દરમિયાન ગરબાડા ચોકડી નજીક સ્માર્ટ સિટી પ્રોજેક્ટ અંતર્ગત લગાવવામાં આવેલું એક મહાકાય લોખંડી સાઈન બોર્ડ તેજ પવનના કારણે હવામાં ફંગોળાઈને રસ્તા પર ધરાશાયી થયું હતું. આ દુર્ઘટનામાં ઉસારવણ ગામના ડુંગર ફળિયાના રહેવાસી 60 વર્ષીય શક્કરિયા નિનામાનું ઘટનાસ્થળે જ દબાઈ જવાથી મોત નીપજ્યું હતું, જ્યારે અન્ય બે ગંભીર ઈજાગ્રસ્ત નાગરિકોએ હોસ્પિટલમાં સારવાર દરમિયાન દમ તોડ્યો હતો. આ સિવાય બે દિવસ પહેલાં નર્મદામાં પણ મકાન ધરાશાયી થવાને કારણે એક 11 વર્ષની માસૂમ બાળકીનું મોત થયું હતું. આમ, છેલ્લા ત્રણ દિવસમાં પ્રી-મોન્સૂન વાવાઝોડાના કારણે કુલ 4 લોકોએ પોતાના જીવ ગુમાવ્યા છે.

બનાસકાંઠા: ઉનાળુ બાજરીનો કચ્ચરઘાણ, પશુપાલકો આર્થિક સંકટમાં
બનાસકાંઠા જિલ્લાના ડીસા અને કાંકરેજ તાલુકામાં વાવાઝોડાએ જગતના તાતની કમર તોડી નાખી છે. ડીસા તાલુકાના થેરવાડા સહિતના સરહદી વિસ્તારોમાં અત્યારે ઉનાળુ બાજરીની લણણી (કાપણી) ની કામગીરી અંતિમ તબક્કામાં ચાલી રહી હતી, ત્યારે જ કુદરતે કહેર વર્તાવ્યો હતો. તીવ્ર પવન અને વરસાદને કારણે ખેતરોમાં કાપીને રાખવામાં આવેલી બાજરીનો કચ્ચરઘાણ નીકળી ગયો છે. આ ઉપરાંત, કાંકરેજ તાલુકાના આકોલી ગામે પશુઓના આશ્રયસ્થાન માટે બનાવેલા શેડ (ઢાળિયા) ના પતરાં ઊડી ગયા હતા અને કુદરતી આફત વચ્ચે એક ખેડૂતના ખેતરમાં આકાશી વીજળી ત્રાટકતાં એક ભેંસનું ઘટનાસ્થળે જ મોત નીપજ્યું હતું. પીડિત ખેડૂતોએ તંત્ર પાસે તાત્કાલિક સર્વે કરી આર્થિક વળતર આપવાની માંગ કરી છે.

અમદાવાદમાં મધ્યરાત્રે તોફાન
અમદાવાદમાં 1 જૂનની મોડી રાત્રે 10:00 વાગ્યા બાદ અને ત્યારબાદ મધરાતે 02:30 વાગ્યે બે અલગ-અલગ સ્પેલમાં તોફાની પવન સાથે ધોધમાર વરસાદ તૂટી પડ્યો હતો. શહેરમાં સરેરાશ 1.5 ઇંચ વરસાદ નોંધાયો છે. પશ્ચિમ અમદાવાદના પાલડી, સરખેજ, જુહાપુરા, બોપલ, એસ.જી. હાઇવે, વાસણા, આશ્રમરોડ, ગોતા અને બોડકદેવમાં અડધાથી એક ઇંચ વરસાદ પડ્યો હતો, જ્યારે પૂર્વ વિસ્તારના રામોલ, જશોદાનગર, ઓઢવ અને નરોડામાં અડધો ઇંચ કે તેથી ઓછો વરસાદ નોંધાયો હતો.

ફ્લાઇટ્સ ડાયવર્ટ, વૃક્ષો પડવાની 15 ફરિયાદો
ભારે વાવાઝોડા અને ખરાબ વિઝિબિલિટીના કારણે અમદાવાદ એરપોર્ટ પર ઉતરાણ કરનારી 7 ફ્લાઇટ્સને તાત્કાલિક ધોરણે સુરત એરપોર્ટ ખાતે ડાયવર્ટ કરવાની ફરજ પડી હતી. અમદાવાદ ફાયર બ્રિગેડને મોડી રાતથી સવાર સુધીમાં શાહઆલમ, બોડકદેવ, નવરંગપુરા, ઘાટલોડિયા અને મીઠાખળી સહિતના 15 વિસ્તારોમાંથી વૃક્ષો ધરાશાયી થવાની ફરિયાદો મળી હતી. સેટેલાઇટ રોડ પર એક લક્ઝરી કાર પર ભારેખમ ઝાડ પડતાં મોટું નુકસાન થયું હતું, જેના કારણે સવારે વાહનોને બીઆરટીએસ (BRTS) કોરિડોરમાંથી પસાર કરવા પડ્યા હતા. બાપુનગર અનિલ સ્ટાર્ચ રોડ પર સ્ટ્રીટ લાઈટનો પોલ પણ ધરાશાયી થયો હતો, જોકે સદનસીબે કોઈ જાનહાનિ થઈ નથી.

વડોદરામાં સોલાર પેનલો હવામાં ઊડી 
પ્રી-મોન્સૂન પવનોની તીવ્રતા એટલી વધારે હતી કે વડોદરાના વાસણા-ભાયલી રોડ પર આવેલી ‘અર્થ આર્ટિકા સોસાયટી’માં ધાબા પર ફિટ કરવામાં આવેલી ભારેભમ સોલાર પેનલો મૂળમાંથી ઉખડીને હવામાં પતંગની જેમ ઊડીને નીચે કમ્પાઉન્ડમાં ખાબકી હતી. આ અકસ્માતમાં ભારે આર્થિક નુકસાન થયું છે, પરંતુ તમામ રહીશોનો આબાદ બચાવ થયો હતો.

ગોધરામાં બાયપાસ રસ્તો ધોવાયો
બીજી તરફ, પંચમહાલ જિલ્લાના મુખ્ય મથક ગોધરામાં રાત્રિ દરમિયાન વરસેલા ધોધમાર વરસાદને કારણે પ્રી-મોન્સૂન આયોજનની પોલ ખુલી ગઈ છે. ગોધરાના આનંદનગર વિસ્તારમાં નિર્માણાધીન પૂલ નજીક બનાવવામાં આવેલો કામચલાઉ ડાયવર્ઝન રોડ મોટાપાયે ધોવાઈ ગયો છે. માટી વહી જતાં રસ્તો અત્યંત જોખમી બન્યો હોવાથી તંત્ર દ્વારા નાગરિકોને આનંદનગર-કનેલાવ રોડનો ઉપયોગ ન કરવા અને તેના બદલે આઈટીઆઈ (ITI) તથા શામળાજી કોલેજવાળા વૈકલ્પિક રૂટ પરથી પસાર થવા કડક સૂચના આપવામાં આવી છે.

રાધનપુરમાં તંત્ર સામે જનઆક્રોશ અને પ્રી-મોન્સૂન કામગીરીની પોલ ખુલી
પાટણ જિલ્લાના રાધનપુર પંથકમાં 1 ઇંચ વરસાદની સાથે ફૂંકાયેલા તોફાની પવનના કારણે બાદરપુરા ગામમાં વ્યાપક તબાહી મચી છે. ગામમાં 15 થી વધુ પરિવારોના કાચા ઘરોના પતરાં હવામાં ઊડી ગયા હતા અને તેઓ ખુલ્લા આકાશ નીચે આવી ગયા છે. વીજ વાયરો તૂટી પડવાના કારણે સમગ્ર ગામમાં વીજ પુરવઠો સંપૂર્ણપણે ગુલ થઈ ગયો છે. સ્થાનિક રહીશોમાં પ્રશાસન સામે ભારે રોષ જોવા મળી રહ્યો છે, કારણ કે આ હોનારતના કલાકો વીતી ગયા હોવા છતાં આપત્તિ વ્યવસ્થાપન કે મહેસૂલ વિભાગના કોઈ પણ સરકારી અધિકારીએ હજુ સુધી ગામની મુલાકાત લીધી નથી. મહીસાગર જિલ્લાના મુખ્ય મથક લુણાવાડા સહિત ગ્રામ્ય વિસ્તારોમાં પણ વીજ વ્યવસ્થા સંપૂર્ણ ખોરવાઈ ગઈ છે. સ્થાનિક નાગરિકો આક્રોશ વ્યક્ત કરી રહ્યા છે કે એમજીવીસીએલ (MGVCL) કંપની દર મંગળવારે પ્રી-મોન્સૂન મેન્ટેનન્સના નામે આખો દિવસ પાવર કાપ કરે છે, છતાં મોસમના પ્રથમ સામાન્ય વાવાઝોડામાં જ આખું નેટવર્ક ધ્વસ્ત થઈ ગયું છે.

દક્ષિણ ગુજરાત અને સૌરાષ્ટ્રમાં મિની વાવાઝોડાનો અનુભવ
નવસારી માં વહેલી સવારે 03:00 વાગ્યાની આસપાસ તોફાની પવન સાથે વરસાદ તૂટી પડ્યો હતો. ગરમીથી રાહત મળી પરંતુ શહેરના અનેક વિસ્તારોમાં વીજળી ગૂલ થઈ ગઈ હતી. વલસાડમાં મોડી રાત્રે તીવ્ર ગતિએ મિની વાવાઝોડું ફૂંકાતા લોકોના જીવ તાળવે ચોંટ્યા હતા. ક્ષણભર માટે પાવર સપ્લાય બંધ થયા બાદ વીજ કંપનીએ તુરંત જ લાઈન પૂર્વવત કરી દીધી હતી. બોટાદ અને સૌરાષ્ટ્રમાં વહેલી સવારે પાળીયાદ રોડ, ટાવર રોડ, ગઢડા રોડ તેમજ ગ્રામ્ય પંથકના બરવાળા, સાળંગપુર અને રાણપુર તાલુકાના નાગનેશ અને દિવળિયામાં ક્યાંક ઝરમર તો ક્યાંક ધીમીધારે ગાજવીજ સાથે વરસાદ નોંધાયો છે.

6 જૂનથી પ્રી-મોન્સૂન સિસ્ટમ નબળી પડશે
હવામાન વિભાગના જણાવ્યા અનુસાર, 6 જૂનથી આ પ્રી-મોન્સૂન સિસ્ટમ નબળી પડતાં વાતાવરણ ફરી સૂકું બનશે. જોકે, ત્યાં સુધી આગામી ત્રણ દિવસ ઉત્તર-દક્ષિણ ગુજરાત અને સૌરાષ્ટ્રના દરિયાકાંઠાના વિસ્તારોમાં વરસાદી ઝાપટાં ચાલુ રહેશે, જેને પગલે માછીમારોને દરિયો ન ખેડવા કડક સૂચના અપાઈ છે.