Gujarat Weather Update: ગુજરાતમાં એકતરફ ઉનાળાની આકરી ગરમીનો પ્રકોપ યથાવત્ છે, તો બીજી તરફ ચોમાસાના આગમનના મજબૂત સંકેતો પણ મળી રહ્યા છે. હવામાન વિભાગના જણાવ્યા અનુસાર, રાજ્યના મોટાભાગના વિસ્તારોમાં મહત્તમ તાપમાન સામાન્ય કે તેનાથી વધુ નોંધાઈ રહ્યું છે. જોકે, દેશમાં દક્ષિણ-પશ્ચિમ ચોમાસું ખૂબ જ ઝડપથી આગળ વધી રહ્યું હોવાથી હવે પ્રિ-મોન્સૂન એક્ટિવિટીના ભાગરૂપે ગુજરાતના વિવિધ વિસ્તારોમાં વાતાવરણ પલટાવવાનું શરૂ થઈ ગયું છે. હવામાન વિભાગે આગામી 7 દિવસ માટે રાજ્યના જુદા જુદા જિલ્લાઓમાં ગાજવીજ સાથે હળવાથી મધ્યમ વરસાદની આગાહી જાહેર કરી છે.
અમદાવાદમાં ગરમીનો પારો 42&deg;C ને પાર છેલ્લા 24 કલાક દરમિયાન રાજ્યમાં હવામાન સંપૂર્ણપણે સૂકું રહ્યું હતું, જેના કારણે નાગરિકો અસહ્ય ગરમી અને અકળામણનો સામનો કરી રહ્યા છે. 8 જૂનના રોજ રાજ્યનું સૌથી ઊંચું તાપમાન અમદાવાદમાં 42.2&deg;C નોંધાયું હતું, જે સામાન્ય તાપમાન કરતાં +1.3&deg;C જેટલું વધુ છે. આગામી દિવસોમાં પણ અમદાવાદમાં આકાશ આંશિક રીતે વાદળછાયું રહેવાની શક્યતા છે અને મહત્તમ તાપમાન 42&deg;Cની આસપાસ જ જળવાઈ રહેશે. જોકે, રાહતની વાત એ છે કે હાલમાં શહેર કે રાજ્ય માટે કોઈ મોટી આકસ્મિક 'વેધર વોર્નિંગ' જાહેર કરવામાં આવી નથી.
મુંબઈથી માત્ર 150 કિમી દૂર ચોમાસું, 5 દિવસમાં 13 રાજ્યો સર કર્યા રાષ્ટ્રીય સ્તરે દક્ષિણ-પશ્ચિમ ચોમાસું ખૂબ જ તીવ્ર ગતિએ આગળ વધી રહ્યું છે. હવામાન વિભાગના ડેટા અનુસાર, ચોમાસું માત્ર 5 દિવસની અંદર દેશના 13 રાજ્યો સુધી પહોંચી ગયું છે અને સોમવારે તેણે તેલંગાણામાં સફળતાપૂર્વક પ્રવેશ કરી લીધો છે. હાલમાં ચોમાસું પશ્ચિમ કિનારે આર્થિક પાટનગર મુંબઈથી માત્ર 150 કિલોમીટર દૂર છે, અને આગામી 48 કલાકમાં તે મુંબઈમાં દસ્તક આપે તેવી પૂરેપૂરી સંભાવના છે. ચોમાસાની આ આગેકૂચ મહારાષ્ટ્ર, કર્ણાટક, આંધ્રપ્રદેશ અને તેલંગાણાના ભાગોમાં થઈ ચૂકી છે. આગામી 2 થી 3 દિવસમાં તે છત્તીસગઢ, ઓડિશા અને પશ્ચિમ બંગાળ તરફ આગળ વધશે. હાલમાં ગુજરાતના વાતાવરણમાં નીચલા સ્તરે મુખ્યત્વે દક્ષિણ-પશ્ચિમીથી પશ્ચિમી પવનો ફૂંકાઈ રહ્યા છે.
બનાસકાંઠામાં વહેલી સવારથી વરસાદી માહોલ, જગતનો તાત ચિંતામાં ચોમાસાની આ ગતિની સીધી અસર આજે (9 જૂન) વહેલી સવારથી જ ગુજરાતના સરહદી જિલ્લા બનાસકાંઠામાં જોવા મળી છે. જિલ્લાના અમીરગઢ, ઈકબાલગઢ, ડીસા, પાલનપુર, દાંતીવાડા, ધાનેરા અને કાંકરેજ સહિતના અનેક વિસ્તારોમાં અચાનક વાતાવરણમાં પલટો આવ્યો હતો અને આકાશ ઘેરા વાદળોથી છવાઈ ગયું હતું. આ અણધાર્યા વરસાદી માહોલના કારણે સ્થાનિક ખેડૂતોમાં ભારે ફફડાટ અને ચિંતા વ્યાપી ગઈ છે. હાલમાં ખેતરોમાં ઉનાળુ બાજરી અને મગફળી સહિતના પાકો એકદમ તૈયાર હાલતમાં ઉભા છે. જો આ સમયે માવઠું કે વરસાદ થાય, તો તૈયાર પાક સંપૂર્ણપણે બગડી જવાની ભીતિ છે, જેના કારણે ખેડૂતોના મોઢે આવેલો કોળિયો છીનવાઈ જવાની સ્થિતિ સર્જાઈ છે.
જાણો આગામી 7 દિવસ ક્યાં અને ક્યારે વરસી શકે છે વરસાદ હવામાન વિભાગ અનુસાર, આગામી અઠવાડિયામાં રાજ્યના મહત્તમ તાપમાનમાં કોઈ મોટો ઘટાડો કે ફેરફાર થશે નહીં, પરંતુ પ્રિ-મોન્સૂન વરસાદી ઝાપટાં ચાલુ રહેશે: 9 અને 10 જૂન: દક્ષિણ ગુજરાતના પટ્ટામાં આવેલા ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં છૂટાછવાયા સ્થળોએ ગાજવીજ સાથે હળવો વરસાદ પડી શકે છે. બાકીના તમામ જિલ્લાઓ અને સૌરાષ્ટ્ર-કચ્છમાં હવામાન સૂકું રહેશે. 11 જૂન: વરસાદનો વ્યાપ થોડો વધશે. દક્ષિણ ગુજરાતના છોટા ઉદેપુર, નર્મદા, સુરત, ડાંગ, તાપી, નવસારી, વલસાડ અને કેન્દ્રશાસિત પ્રદેશોમાં હળવા બુંદાબાંદીની શક્યતા છે. 12 જૂન: પ્રિ-મોન્સૂન એક્ટિવિટી મધ્ય અને ઉત્તર ગુજરાત સુધી પહોંચશે. પંચમહાલ, દાહોદ, મહિસાગર સહિત ઉત્તર ગુજરાતના વિસ્તારો, વડોદરા, ભરૂચ સહિત સમગ્ર દક્ષિણ ગુજરાત અને સૌરાષ્ટ્રના અમરેલી, ભાવનગર, ગીર સોમનાથ અને દીવમાં વરસાદી ઝાપટાં પડી શકે છે. 13 અને 14 જૂન: આ બે દિવસો દરમિયાન વરસાદની તીવ્રતા વધશે. ઉત્તર ગુજરાતના અરવલ્લી, પંચમહાલ, દાહોદ, મહિસાગર; દક્ષિણ ગુજરાતના તમામ જિલ્લાઓ અને સૌરાષ્ટ્રના દરિયાકાંઠાના વિસ્તારો જેવા કે પોરબંદર, જૂનાગઢ, અમરેલી, ભાવનગર અને ગીર સોમનાથમાં ગાજવીજ સાથે મધ્યમ વરસાદ પડવાની આશંકા સેવાઈ રહી છે. બાકીના વિસ્તારોમાં હવામાન સામાન્ય રહેશે.

આગામી 7 દિવસ વરસાદની આગાહી, ખેડૂતો ચિંતિત

June 9, 2026 | 12:34 IST