Surat : RTE હેઠળ સીલબંધ શાળામાં પ્રવેશ, શિક્ષણના નામે સરેઆમ છેતરપિંડી!

ખાનગી શાળાઓમાં RTE (રાઈટ ટુ એજ્યુકેશન) હેઠળ પ્રવેશ ફાળવણીના મામલે ગુજરાતના શિક્ષણ વિભાગની અંધેર વહીવટ ફરી એકવાર ખુલ્લો પડ્યો છે. સુરતમાં સામે આવેલો કિસ્સો તો ઘોર બેદરકારી અને વહીવટી ગોરખધંધાનો જીવતો જાગતો પુરાવો છે. શું શિક્ષણ વિભાગે પોતાની આંખો પર પાટા બાંધી દીધા છે કે પછી જાણી જોઈને આવી ગંભીર ભૂલો આચરી રહ્યું છે?

સીલબંધ શાળામાં RTE પ્રવેશ...

સુરતના ડિંડોલી વિસ્તારના દેલાડવા ગામમાં આવેલી સાઉથ ઇન્ડિયન મોડર્ન સ્કૂલ નામની એક બંધ પડેલી અને બેંક દ્વારા સીલ કરાયેલી શાળામાં RTE હેઠળ વિદ્યાર્થીઓને પ્રવેશ ફાળવી દેવામાં આવ્યો! આ ઘટના શિક્ષણ વિભાગની કાર્યપદ્ધતિ પર ઘણા ગંભીર પ્રશ્નાર્થો ઊભા કરે છે. શું શિક્ષણ વિભાગ RTE હેઠળ પ્રવેશ ફાળવતી વખતે શાળાઓની ભૌતિક ચકાસણી પણ કરતું નથી? કે પછી કાગળ પર જ બધું ચાલી રહ્યું છે?

આ શાળાને બેંક દ્વારા 1.66 કરોડની રિકવરી કાઢીને સીલ કરી દેવામાં આવ્યું છે. સ્વાભાવિક છે કે, આવી શાળામાં કોઈ બાળક ભણી શકે નહીં. તેમ છતાં, એક વાલીએ જ્યારે પોતાના બાળકનો RTE હેઠળ આ જ શાળામાં પ્રવેશ કન્ફર્મ કરાવવા માટે સ્થળ પર પહોંચ્યા, ત્યારે તેમને શાળા પર બેંકનું સીલ અને નોટિસ જ જોવા મળી. આ દ્રશ્ય વાલીઓ માટે કેટલું હતાશાજનક અને આઘાતજનક હોઈ શકે તેની કલ્પના કરવી પણ મુશ્કેલ છે. એક તરફ સરકાર RTE હેઠળ શિક્ષણનો હક્ક આપવાના ઢંઢેરા પીટે છે, અને બીજી તરફ આવી હળાહળ બેદરકારી દાખવીને વિદ્યાર્થીઓના ભવિષ્ય સાથે ચેડાં કરી રહી છે.

જવાબદારી કોની?

આ સમગ્ર પ્રકરણમાં શિક્ષણ વિભાગની જવાબદારી સ્પષ્ટપણે દેખાઈ રહી છે. RTE હેઠળ પ્રવેશ ફાળવતા પહેલા શાળાઓની યાદી બનાવતી વખતે, શું તે શાળાઓ અસ્તિત્વમાં છે, કાર્યરત છે, અને તેમાં ભણવા માટે યોગ્ય માળખાગત સુવિધાઓ છે કે નહીં તેની ચકાસણી કરવાની પ્રાથમિક જવાબદારી શિક્ષણ વિભાગની છે. જો આ બેદરકારી માટે કોઈને જવાબદાર ઠેરવીને કડક પગલાં લેવામાં નહીં આવે, તો ભવિષ્યમાં પણ આવા અનેક કિસ્સાઓ બનતા રહેશે અને નિર્દોષ બાળકોના શિક્ષણનો હક્ક છીનવાતો રહેશે.

આ ઘટના દર્શાવે છે કે શિક્ષણ વિભાગમાં વહીવટી સુધારાની તાતી જરૂર છે. માત્ર કાગળ પર યોજનાઓ બનાવી દેવાથી નહીં, પરંતુ તેના અમલીકરણમાં પારદર્શિતા અને જવાબદારીપૂર્વકનું વલણ રાખવાથી જ બાળકોના ઉજ્જવળ ભવિષ્યનું નિર્માણ થઈ શકે છે. શું સરકાર આ ગંભીર બેદરકારી સામે કડક પગલાં લેશે અને ભવિષ્યમાં આવા કિસ્સાઓનું પુનરાવર્તન ન થાય તે સુનિશ્ચિત કરશે?