ગુજરાત-રાજસ્થાન જોડતી સૌથી લાંબી ઘોડાની નાળ આકારની ટનલનું કામ થશે શરૂ, 2026-27માં દોડશે ટ્રેન

ઉત્તર ગુજરાત માટે એક મહત્વાકાંક્ષી રેલવે પ્રોજેક્ટ - તારંગા હિલ-અંબાજી-આબુ રોડ નવી રેલ લાઈનનો પ્રગતિશીલ તબક્કે કામ ચાલી રહ્યું છે. 116.65 કિલોમીટર લાંબી આ લાઇન રૂ. 2798.16 કરોડના ખર્ચે તૈયાર થઈ રહી છે. આ રેલવે લાઈન 11 ટનલ, 54 મોટા બ્રિજ, 151 નાના બ્રિજ અને અનેક ઓવરબ્રિજ અને અંડરપાસમાંથી પસાર થશે.

સાબરકાંઠાના પોશીના વિસ્તારમાં ગુજરાતની સૌથી લાંબી ઘોડાની નાળ આકારની ટનલ બનાવાઈ રહી છે, જે 1.860 કિમી લાંબી છે અને તેનો ઘેરાવો 21 મીટર છે. ટનલની ઊંચાઈ 7.2 મીટર અને પહોળાઈ 8 મીટર છે. ટનલના દરેક તબક્કે સર્વે અને બ્લાસ્ટિંગથી લઈને લોખંડ અને સિમેન્ટના મજબૂત સ્તરો સાથે સુરક્ષા કામો ચાલુ છે.

ટનલનું કામ સતત 24X7 ચાલી રહ્યું છે, જ્યાં એક મહિના પછી બીજી બાજુથી પણ ડ્રિલિંગ શરૂ થશે. છેલ્લા 2 મહિનામાં 100 મીટરનું કામ પૂરું થયું છે. ટનલના દરેક મટીરિયલ જેવા કે પાણી, રેતી, લોખંડ, સિમેન્ટ વગેરે લેબ ટેસ્ટ બાદ જ વપરાઈ રહ્યા છે.

હાલમાં આબુરોડથી અંબાજીનો રોડ માર્ગ 20 કિલોમીટર લાંબો છે જ્યાં ટ્રાવેલ ટાઈમ 30 મિનિટ છે. રેલવે માર્ગ આ અંતરને 32.654 કિલોમીટરનો બનાવશે અને તે સમયમાં ઘણો ફેર લાવશે. આવનારા દિવસોમાં આ રેલમાર્ગ યાત્રાળુઓ માટે અંબાજી પહોંચવાનું વધુ સરળ અને ઝડપી બનાવશે. હાલ 11 ટકા કામ પૂર્ણ થયું છે અને પ્રોજેક્ટ 2026-27 સુધીમાં પૂર્ણ થવાની સંભાવના છે. આ રેલ્વે માર્ગ માત્ર યાત્રાળુઓ માટે નહીં પરંતુ ગુજરાત-રાજસ્થાન વચ્ચે નવો રેલ વિકલ્પ બનશે.