ગુજરાતમાં મેઘરાજાની ધમાકેદાર એન્ટ્રી, 29 ડેમ હાઈ એલર્ટ પર, 19 ડેમ 100 ટકા છલકાયા

ગુજરાતમાં છેલ્લા કેટલાક દિવસોથી વરસાદના કારણે ભારે પરિસ્થિતિ સર્જાઈ છે. રાજ્યના વિવિધ વિસ્તારોમાં સિઝનથી વધારે વરસાદ વરસતા નદી-નાળાઓ સાથે ડેમો પણ છલકાઈ રહ્યા છે. હાલમાં રાજ્યના કુલ 206 ડેમમાંથી 29 ડેમ હાઈ એલર્ટ પર છે, જ્યારે 17 ડેમ એલર્ટ મોડમાં અને વધુ 17 ડેમ વોર્નિંગ મોડ પર રાખવામાં આવ્યા છે. સૌરાષ્ટ્ર અને કચ્છના 19 ડેમ 100 ટકા છલકાઈ ગયા છે, અને તાપી જિલ્લાના 1 ડેમ પણ 100 ટકા ભરાઈ ગયો છે.

વીજળીના પૂરવઠા પર પણ ભારે વરસાદના કારણે અસર પડી છે. અત્યાર સુધીમાં કુલ 14,332 ગામોને વિજ પુરવઠાની સમસ્યાનો સામનો કરવો પડ્યો છે. કુલ 20,292 વિજ થાંભલા, 1,073 ટ્રાન્સફોર્મર સેન્ટરો અને 20,111 ફીડર્સ અસરગ્રસ્ત બન્યા છે. મોસમના ખોરવાટના લીધે વડોદરા સ્ટેટ હાઈવે અને છોટાઉદેપુર નેશનલ હાઈવે બંધ કરવાના ફરજ પડી હતી. માત્ર બપોરે 2 વાગ્યા સુધીમાં રાજ્યના વિવિધ 8 મુખ્ય માર્ગો અને ગ્રામ-તાલુકા-જિલ્લા પંથકના 249 માર્ગો વાહન વ્યવહાર માટે બંધ કરાયા હતા.

પરિવહન સેવાઓ પર પણ આ બાધાનો સીધો પ્રભાવ જોવા મળ્યો. ST વિભાગને 11 રૂટ બંધ કરવા પડ્યા હતા અને 34 ટ્રિપો રદ્દ કરવામાં આવી હતી. વધુમાં, 1 જુલાઈથી 6 જુલાઈ વચ્ચે રાજ્યના વિવિધ વિસ્તારોમાંથી 3,700થી વધુ લોકોનું સલામત સ્થળાંતર કરાવાયું છે.

રાજ્યમાં આ પરિસ્થિતિને જોતા 33 જિલ્લામાં NDRFની 13 ટીમો અને SDRFની 20 ટીમો તૈનાત કરવામાં આવી છે. આ ઉપરાંત 2 NDRF ટીમ રિઝર્વમાં રાખવામાં આવી છે. તંત્ર દ્વારા માછીમારોને ખાસ ચેતવણી આપવામાં આવી છે કે, તેઓ 10 જુલાઈ સુધી દરિયો ખેડવા ન જાય.

વરસાદના પગલે રાજ્યમાં ડેમ ભરાવની સ્થિતિમાં પણ ભારે ફેરફાર આવ્યો છે. અત્યારસુધીમાં 20 ડેમ 100 ટકા ભરાઈ ચૂક્યા છે, જ્યારે 43 ડેમ 70 ટકાથી 100  ટકા વચ્ચે, 46 ડેમ 25  ટકા થી 50  ટકા વચ્ચે અને 48 ડેમ 25 ટકાથી ઓછા પાણી ધરાવે છે.

આ તમામ પરિસ્થિતિઓને ધ્યાને લઈને તંત્ર દ્વારા સર્વત્ર ચાંપતી નજર રાખવામાં આવી રહી છે અને તાત્કાલિક કામગીરી માટે ટીમો સતર્ક છે. રાજ્ય સરકાર, આપત્તિ વ્યવસ્થાપન તંત્ર અને સુરક્ષા દળો દરેક સ્તરે સતત કામગીરી કરી રહ્યા છે જેથી કોઈ જાનહાની ન થાય અને લોકોને મદદ મળી રહે.