ગુજરાત હાઈકોર્ટને મળ્યો બોમ્બનો ઈ-મેલ, સુરક્ષા કડક

ગુજરાત હાઈકોર્ટને બોમ્બથી  ઉડાવવાની ધમકી મળી છે. હાઈકોર્ટને ધમકીભર્યો ઈ-મેલ મળ્યો કોર્ટના ગેટ પણ બંધ કરી દેવામાં આવ્યા છે. ડોગ- સ્કવોડ અને બોમ્બ સ્કવોડ દ્વારા ચેકિંગ શરૂ કરી દેવામાં આવી છે. પોલીસને જાણ કરતાં પોલીસ હાઈકોર્ટ પહોંચી છે.

હાઈકોર્ટના ઈ- મેલ પર બોમ્બથી ઉડાવવાની ધમકી મળી : સફીન હસન

ઝોન 1ના ઈનચાર્જ ડીસીપી સફીન હસન જણાવ્યું હતું કે હાઈકોર્ટના ઈ-મેલ પર બોમ્બ ઉડાવી દેવાની ધમકી મળી છે. ધમકી મળતા તપાસ કરવામાં આવી રહી છે. હાઈકોર્ટના ગેટ બંધ કરી પોલીસ દ્વારા તપાસ કરવામાં આવી રહી છે. ઈ- મેલ કરનારની પણ તપાસ કરવામાં આવી રહી છે.

બોમ્બ ડિટેકશન એન્ડ ડિસ્પોઝેબલ ટીમ અને ફાયરની ગાડી હાઈકોર્ટ પહોંચી :

ઘટનાની જાણ થતાં જ બોમ્બ ડિટેકશન એન્ડ ડિસ્પોઝેબલ ટીમની ગાડી અને ફાયરની ગાડી હાઈકોર્ટ પહોંચી ગઈ છે. હાઈકોર્ટ સ્ટાફ પ્રવેશનો ગેટ નંબર-5 બંધ કરી દેવામાં આવ્યું છે. આ સાથે કોર્ટમાં પ્રવેશતા વાહનોનું પણ ચેકિંગ કરવામાં આવી રહ્યું છે.

રિસેસ બાદ કોર્ટ બંધ :

રિસેસ બાદ કોર્ટને બંધ કરી દેવાની સૂચના આપવામાં આવી છે. કોર્ટમાં ઉપસ્થિત વકીલોને પણ કોર્ટ છોડવા સૂચન કરાયું છે. હાલમાં કોર્ટમાં સિક્યોરીટી ચેકિંગ ચાલું છે.