Gujarat GSEB SSC Result 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા આજે સવારે 8 કલાકે ધોરણ-10 (SSC) પરીક્ષાનું પરિણામ જાહેર કરવામાં આવ્યું છે. વર્ષ 2026ની આ બોર્ડ પરીક્ષામાં રાજ્યનું કુલ પરિણામ 83.86% નોંધાયું છે, જે ગત વર્ષના 83.08% કરતા થોડો સુધારો દર્શાવે છે. શિક્ષણ મંત્રીએ પરિણામ જાહેર કરતા તમામ સફળ વિદ્યાર્થીઓને અભિનંદન પાઠવ્યા હતા. આ વર્ષે પણ પરિણામમાં દીકરીઓએ દીકરાઓ કરતા ચડિયાતો દેખાવ કર્યો છે.
પરિણામના મુખ્ય આંકડા આ વર્ષે માર્ચમાં યોજાયેલી પરીક્ષામાં કુલ 7,56,392 નિયમિત વિદ્યાર્થીઓ ઉપસ્થિત રહ્યા હતા, જેમાંથી 6,34,327 વિદ્યાર્થીઓ સફળતાપૂર્વક ઉત્તીર્ણ થયા છે. કન્યાઓનું પરિણામ: 88.28% કુમારોનું પરિણામ: (વિદ્યાર્થીઓ કરતા કન્યાઓ આશરે 8% આગળ રહી છે) અંગ્રેજી માધ્યમ: 92.50% ગુજરાતી માધ્યમ: 82.67%
1,697 શાળાઓએ 100% પરિણામ મેળવીને ઉત્કૃષ્ટ પ્રદર્શન કર્યું સમગ્ર રાજ્યમાં 1,697 શાળાઓએ 100% પરિણામ મેળવીને ઉત્કૃષ્ટ પ્રદર્શન કર્યું છે, જ્યારે 39 શાળાઓ એવી પણ છે જ્યાં એક પણ વિદ્યાર્થી પાસ થઈ શક્યો નથી એટલે કે શૂન્ય ટકા પરિણામ આવ્યું છે.
જિલ્લાવાર અને કેન્દ્રવાર સ્થિતિ પરિણામની વિગતો મુજબ, નર્મદા જિલ્લો 90.85% સાથે સમગ્ર રાજ્યમાં પ્રથમ ક્રમે રહ્યો છે, જે શિક્ષણના ક્ષેત્રે આદિવાસી બહુલ વિસ્તારની મોટી સિદ્ધિ માનવામાં આવે છે. બીજી તરફ, પંચમહાલ જિલ્લાનું પરિણામ 76.42% સાથે રાજ્યમાં સૌથી નીચું રહ્યું છે, જોકે ગત વર્ષ કરતા ત્યાં પણ 2.82% નો સુધારો જોવા મળ્યો છે. કેન્દ્રવાર વાત કરીએ તો, ગાંધીનગર જિલ્લાના આજોલ કેન્દ્રે 100% પરિણામ મેળવીને રાજ્યમાં ડંકો વગાડ્યો છે. જ્યારે દાહોદ જિલ્લાનું મુનખોસલા કેન્દ્ર 33.74% પરિણામ સાથે રાજ્યમાં સૌથી નબળું કેન્દ્ર સાબિત થયું છે.
સુરત અને રાજકોટનું તેજસ્વી પ્રદર્શન સુરત શહેરે ફરી એકવાર શિક્ષણ ક્ષેત્રે પોતાની ધાક જમાવી છે. સુરતનું પરિણામ 86.4% નોંધાયું છે. અહીંની 'આશાદીપ ગ્રુપ ઓફ સ્કૂલ'ના 562 વિદ્યાર્થીઓએ એકલા હાથે A1 ગ્રેડ મેળવીને રેકોર્ડ સર્જ્યો છે. સુરતના હીરા ઉદ્યોગ સાથે સંકળાયેલા રત્નકલાકારોના બાળકોએ પ્રતિકૂળ આર્થિક પરિસ્થિતિમાં પણ ઝળહળતી સફળતા મેળવીને વાલીઓની આંખમાં હર્ષના આંસુ લાવી દીધા હતા. રાજકોટ જિલ્લામાં પણ સતત ત્રીજા વર્ષે પરિણામમાં ઉતરોતર વધારો જોવા મળ્યો છે, જે આ વર્ષે 88.11% સુધી પહોંચ્યું છે.
વિષયવાર પરિણામ અને 'ગણિત'નો ગભરાટ પરિણામમાં વિષયવાર ગુણ પર નજર કરીએ તો, 'બેઝિક ગણિત' વિષય વિદ્યાર્થીઓ માટે સૌથી વધુ પડકારજનક સાબિત થયો છે. બેઝિક ગણિતમાં કુલ 1,06,504 વિદ્યાર્થીઓ નાપાસ થયા છે. જોકે, તેની સામે 3,529 વિદ્યાર્થીઓએ આ વિષયમાં 100 માંથી 100 માર્ક્સ મેળવીને અસાધારણ પ્રતિભા પણ દર્શાવી છે. વિજ્ઞાન વિષયમાં 8,250 અને સામાજિક વિજ્ઞાનમાં 2,943 વિદ્યાર્થીઓએ પૂર્ણ ગુણ પ્રાપ્ત કર્યા છે. અંગ્રેજી વિષયમાં સમગ્ર રાજ્યમાં માત્ર 1 વિદ્યાર્થી 100 માંથી 100 માર્ક્સ લાવવામાં સફળ રહ્યો છે.
કઈ રીતે જોવું પરિણામ વિદ્યાર્થીઓ બોર્ડની સત્તાવાર વેબસાઇટ www.gseb.org પર જઈને પોતાનો સીટ નંબર એન્ટર કરીને પરિણામ જોઈ શકે છે. આ ઉપરાંત, બોર્ડે વોટ્સએપ સુવિધા પણ આપી છે. વિદ્યાર્થીઓએ 6357300971 નંબર પર પોતાનો સીટ નંબર વોટ્સએપ કરવાનો રહેશે, જેનાથી તુરંત જ માર્કશીટની સોફ્ટ કોપી મળી જશે. જે વિદ્યાર્થીઓ પરીક્ષામાં સફળ થઈ શક્યા નથી તેમના માટે બોર્ડે આશાનું કિરણ જાળવી રાખ્યું છે. કુલ 1,83,674 નાપાસ વિદ્યાર્થીઓ (નિયમિત અને રિપીટર સહિત) માટે જૂન-2026માં પૂરક પરીક્ષા યોજાશે. આ વખતે વિદ્યાર્થીઓને &lsquo;Best of Two&rsquo; પદ્ધતિનો લાભ મળશે, જેમાં તેઓ બે પરીક્ષાઓમાંથી જે શ્રેષ્ઠ પરિણામ હશે તે ગણતરીમાં લઈ શકશે.
ભાવુક દ્રશ્યો અને ઉજવણી પરિણામ જાહેર થતા જ રાજ્યભરની શાળાઓમાં ક્યાંક અબીલ-ગુલાલની છોળો ઉડી હતી તો ક્યાંક વિદ્યાર્થીઓએ એકબીજાના મોઢા મીઠા કરાવ્યા હતા. પરિણામ જોતી વખતે ઘણા વિદ્યાર્થીઓ અને વાલીઓ ભાવુક થઈ ગયા હતા. ખાસ કરીને મધ્યમ અને ગરીબ વર્ગના તેજસ્વી તારલાઓએ પોતાની સિદ્ધિથી સાબિત કર્યું છે કે મહેનત આગળ કોઈ પણ અવરોધ ટકી શકતો નથી. હવે આ વિદ્યાર્થીઓ માટે ડિપ્લોમા, સાયન્સ કે કોમર્સ-આર્ટસના પ્રવેશદ્વાર ખૂલશે.

નર્મદા જિલ્લો રાજ્યમાં અવ્વલ, સુરતના રત્નકલાકારોના સંતાનોએ રચ્યો ઈતિહાસ

May 6, 2026 | 11:01 IST