સરકારી કામકાજમાં AI આધારિત સેન્ટ્રલ પોર્ટલ

ગુજરાત સરકારે તેના સરકારી કામકાજમાં ક્રાંતિકારી પરિવર્તન લાવવા માટે એક મોટો અને સમયસરનો નિર્ણય લીધો છે. રાજ્ય સરકાર ટૂંક સમયમાં AI આધારિત સેન્ટ્રલ પોર્ટલ શરૂ કરવા જઈ રહી છે. આ પોર્ટલનો મુખ્ય ઉદ્દેશ્ય શાસનમાં પારદર્શિતા, કાર્યક્ષમતા અને માહિતીની સરળ ઉપલબ્ધતા વધારવાનો છે. આ પોર્ટલ પર સરકારના તમામ કાયદાઓ, નિયમો, ઠરાવો, જાહેરનામા અને પરિપત્રો એક જ સ્થળે AI આધારિત સર્ચ સુવિધા સાથે ઉપલબ્ધ થશે, જે ભારતમાં એક અનોખો પ્રયાસ બની શકે છે.

ઠરાવો અને પરિપત્રોને ઉમેરવા પર ભાર મૂક્યો

આ મહત્વાકાંક્ષી પ્રોજેક્ટને સફળ બનાવવા માટે રાજ્યના તમામ વિભાગોમાં ભારે દોડધામ મચી ગઈ છે. મુખ્યમંત્રી કાર્યાલય દ્વારા આ પ્રોજેક્ટને ઉચ્ચ પ્રાથમિકતા આપવામાં આવી છે અને દૈનિક મોનિટરિંગ શરૂ કરી દેવાયું છે. સૂત્રો અનુસાર, તમામ વિભાગોને માત્ર 5 દિવસની અંદર તેમના તમામ સરકારી દસ્તાવેજોની સંપૂર્ણ વિગતો ગૂગલ શીટમાં અપડેટ કરવા માટે તાકીદના આદેશો આપવામાં આવ્યા છે. આ અપડેટમાં જૂના, રદ કરાયેલા અને બિનઅસરકારક દસ્તાવેજોને દૂર કરવા તેમજ મહત્ત્વના અને અપલોડ ન થયેલા ઠરાવો અને પરિપત્રોને ઉમેરવા પર ભાર મૂકવામાં આવ્યો છે.

સામાન્ય નાગરિકોને જરૂરી દસ્તાવેજ મળશે

હાલમાં, નાગરિકોને સરકારી દસ્તાવેજો અને ઠરાવોની કોપી કે વિગત જોઈતી હોય તો તેમને જે-તે વિભાગની વેબસાઈટ પર જઈને માહિતી મેળવવી પડે છે, જે એક સમય માંગી લેનારી પ્રક્રિયા છે. જોકે, AI આધારિત સેન્ટ્રલ પોર્ટલ શરૂ થયા બાદ આ સમગ્ર વ્યવસ્થા બદલાઈ જશે. સામાન્ય નાગરિકોને જરૂરી દસ્તાવેજ માત્ર એક ક્લિકમાં આંગળીના ટેરવે મળી રહેશે. આનાથી માત્ર અરજદારોને જ નહિ, પરંતુ વિભાગોને પણ ફાયદો થશે. કારણ કે, તે બેવડાં ઠરાવો અને ગૂંચવણને દૂર કરશે. AI આધારિત સર્ચ સુવિધાને કારણે માહિતીની શોધ ઝડપી અને ચોક્કસ બનશે, જેનાથી સરકારના નિર્ણયોમાં પારદર્શિતા અને જવાબદારી વધશે. રાજ્યના તમામ કાયદા અને શાસન નિર્ણયો એક જ પ્લેટફોર્મ પર ઉપલબ્ધ થવાથી શાસન વ્યવસ્થા વધુ સુદૃઢ બનશે.