Gandhinagar News: મુખ્યમંત્રી ભૂપેન્દ્ર પટેલના અધ્યક્ષ સ્થાને આજે 15 મેના રોજ સચિવાલય ખાતે ગુજરાત સરકારની મહત્વપૂર્ણ કેબિનેટ બેઠક મળી હતી. આ બેઠકમાં દેશ અને રાજ્યમાં ઇંધણ બચત, સરકારી ખર્ચમાં મોટો ઘટાડો કરવા અને જાહેર પરિવહનને વધુ સુદ્રઢ બનાવવાના મુદ્દે અત્યંત ક્રાંતિકારી નિર્ણયો લેવામાં આવ્યા છે. મુખ્યમંત્રીએ તમામ મંત્રીઓ અને ઉચ્ચ અધિકારીઓને પોતાના વિભાગોમાં પેટ્રોલ-ડીઝલનો બિનજરૂરી વપરાશ અટકાવવા અને વહીવટી ખર્ચ ઘટાડવા માટે કડક સૂચનાઓ આપી છે.
મંત્રીઓ અને વીઆઈપી સંસ્કૃતિ પર કાપ: પાયલોટિંગ કાર અને કોન્વોય ઘટ્યા વડાપ્રધાન નરેન્દ્ર મોદીની ઇંધણ બચાવવાની અપીલને પગલે ગુજરાત સરકારે વીઆઈપી સંસ્કૃતિ અને મંત્રીઓના ભપકા પર મોટો કાપ મૂક્યો છે. આ અંતર્ગત હવે માત્ર મુખ્યમંત્રી અને ઉપમુખ્યમંત્રીને જ સત્તાવાર કોન્વોય (મોટો કાફલો) મળશે. નાયબ મુખ્યમંત્રીના કાફલામાં પણ હવે માત્ર ત્રણ જ કાર રાખવાનો નિર્ણય કરાયો છે. કડક નિયમોના ભાગરૂપે રાજ્યપાલ પોતાની તમામ મુસાફરી એસટી (ST) બસ અને ટ્રેન મારફતે કરશે.
પાટીલ હવેથી પાયલોટિંગ કારનો ઉપયોગ નહીં કરે આ ઉપરાંત, કેન્દ્રીય જળશક્તિ મંત્રી સી. આર. પાટીલ હવેથી પાયલોટિંગ કારનો ઉપયોગ નહીં કરે. રાજ્યના આરોગ્ય મંત્રી અને રાજ્યમંત્રી જયંતી કવાડિયા તેમજ કાનજીભાઈ અમૃતિયાએ પણ પોતાની પાયલોટિંગ સેવાઓ સ્વેચ્છાએ છોડી દીધી છે, જ્યારે મંત્રી રમેશ કટારાએ ભવિષ્યમાં માત્ર એક જ કાર વાપરવાનો નિર્ણય કર્યો છે. પ્રતીકાત્મક રીતે, મુખ્યમંત્રી ભૂપેન્દ્ર પટેલ પોતે આજે કેબિનેટ બેઠકમાં માત્ર ત્રણ ગાડીઓના કાફલા સાથે પહોંચ્યા હતા અને અન્ય મંત્રીઓ કારપૂલિંગ તેમજ ઇલેક્ટ્રિક વાહનોનો ઉપયોગ કરીને સચિવાલય આવ્યા હતા. ખર્ચ બચાવવા માટે હર્ષ સંઘવીએ અમેરિકામાં યોજાનારા આગામી ગુજરાતી કન્વેન્શનમાં ન જવાનો પણ મોટો નિર્ણય લીધો છે.
વર્ચ્યુઅલ મિટિંગ, 'વર્ક ફ્રોમ હોમ' અને સરકારી અધિકારીઓ માટે કારપૂલિંગ ઇંધણ અને સમયનો બચાવ કરવા માટે મુખ્યમંત્રીએ ટેકનોલોજીના મહત્તમ ઉપયોગ પર ભાર મૂક્યો છે. તેમણે દરેક મંત્રીને પોતાના વિભાગોમાં જ્યાં પણ શક્ય હોય ત્યાં 'વર્ક ફ્રોમ હોમ'ની સાનુકૂળતા ચકાસવા નિર્દેશ આપ્યા છે. હવેથી તમામ વિભાગીય સમીક્ષા બેઠકો ઓનલાઈન (વર્ચ્યુઅલ માધ્યમથી) યોજવામાં આવશે, જેથી ગાંધીનગરમાં યોજાતી બેઠકો માટે સરકારી કર્મચારીઓને દૂરના જિલ્લાઓમાંથી બિનજરૂરી ધક્કા ન ખાવા પડે. મંત્રીઓને લોકાર્પણ અને ખાતમુહૂર્ત જેવા જાહેર કાર્યક્રમોમાં જવાની છૂટ છે, પરંતુ ત્યાં લાંબા સુરક્ષા કાફલા લઈ જવા પર સંપૂર્ણ પ્રતિબંધ મુકાયો છે. આ સાથે જ સરકારી અધિકારીઓ અને કર્મચારીઓ માટે પણ કચેરીએ આવવા-જવા માટે કારપૂલિંગની પદ્ધતિ અપનાવવાની સત્તાવાર સૂચના આપવામાં આવી છે.
સામાન્ય જનતાની સુવિધા માટે કોઈ પણ ગીધડ-ધમાકા વગર 300 નવી ST બસો શરૂ કેબિનેટ બેઠક બાદ પત્રકાર પરિષદને સંબોધતા ગૃહ અને પરિવહન રાજ્યમંત્રી હર્ષ સંઘવીએ જાહેરાત કરી હતી કે, રાજ્યમાં જાહેર પરિવહન સેવાને વધુ મજબૂત અને લોકભોગ્ય બનાવવા માટે આવતીકાલથી જ ૩૦૦ નવી એસટી (ST) બસો સીધી સેવામાં મૂકવામાં આવશે. સરકારી ખર્ચ અને સમય બચાવવાના ઉદ્દેશ્યથી, આ બસોના લોકાર્પણ માટે કોઈ ભવ્ય સમારોહ કે રિબન કાપવાના કાર્યક્રમો યોજાશે નહીં. બસોને સીધી ડેપો અને સેન્ટર પરથી જ રૂટ પર દોડતી કરી દેવામાં આવશે જેથી સામાન્ય નાગરિકો અને મુસાફરોને ઝડપી અને વધુ સગવડયુક્ત પરિવહનનો લાભ મળી શકે. ગુજરાત સરકાર ઇંધણ બચાવવા અને પર્યાવરણના રક્ષણ માટે સંપૂર્ણપણે કટિબદ્ધ છે.

મંત્રીઓના કાફલામાં ઘટાડો, 300 નવી ST બસો દોડશે

May 15, 2026 | 14:54 IST