ધોરણ-12 બોર્ડનું પરિણામ જાહેર

GSEB Result 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા વર્ષ 2026ની ધોરણ-12ની બોર્ડ પરીક્ષાનું પરિણામ સત્તાવાર રીતે જાહેર કરવામાં આવ્યું છે. રાજ્યના શિક્ષણ મંત્રી ડૉ. પ્રદ્યુમન વાજાએ વિજ્ઞાન અને સામાન્ય એમ બંને પ્રવાહોનું પરિણામ જાહેર કરતા વિદ્યાર્થીઓ અને વાલીઓમાં હર્ષોલ્લાસ જોવા મળી રહ્યો છે. આ વર્ષે કુલ 6.20 લાખથી વધુ પરીક્ષાર્થીઓએ પરીક્ષા આપી હતી, જેમાં બંને પ્રવાહમાં ઉત્કૃષ્ટ પરિણામ નોંધાયું છે.

વિજ્ઞાન પ્રવાહ: મોરબી જિલ્લો મોખરે, કુંભારીયા કેન્દ્રનું શ્રેષ્ઠ પ્રદર્શન
ધોરણ-12 વિજ્ઞાન પ્રવાહનું કુલ પરિણામ 84.33 ટકા નોંધાયું છે. વિજ્ઞાન પ્રવાહમાં કુલ 1,18,256 વિદ્યાર્થીઓ પરીક્ષામાં ઉપસ્થિત રહ્યા હતા, જેમાંથી 93 હજારથી વધુ વિદ્યાર્થીઓએ સફળતા મેળવી છે. જિલ્લાવાર પરિણામમાં મોરબી જિલ્લો 94.85 ટકા સાથે સમગ્ર રાજ્યમાં પ્રથમ ક્રમે રહ્યો છે, જ્યારે દાહોદ જિલ્લો 57.44 ટકા પરિણામ સાથે અંતિમ ક્રમે છે. કેન્દ્ર મુજબ જોઈએ તો સુરતનું કુંભારીયા કેન્દ્ર 98.62 ટકા સાથે સૌથી વધુ પરિણામ ધરાવતું કેન્દ્ર બન્યું છે, જ્યારે દાહોદનું લીમડી કેન્દ્ર 42.98 ટકા સાથે સૌથી પાછળ રહ્યું છે. નોંધનીય છે કે રાજ્યની કુલ 209 શાળાઓએ 100 ટકા પરિણામ હાંસલ કર્યું છે.

સામાન્ય પ્રવાહના ઉમેદવાર-પરિણામમાં વર્ષ 2025 અને 2026ની તુલના

સામાન્ય પ્રવાહ: વિદ્યાર્થિનીઓએ ફરી મારી બાજી
સામાન્ય પ્રવાહનું પરિણામ આ વર્ષે 92.71 ટકા આવ્યું છે, જેમાં વિદ્યાર્થિનીઓએ વિદ્યાર્થીઓ કરતા 5.31 ટકા વધુ પરિણામ મેળવીને વર્ચસ્વ જાળવી રાખ્યું છે. વિદ્યાર્થિનીઓનું પરિણામ 95.41 ટકા અને વિદ્યાર્થીઓનું પરિણામ 90.10 ટકા રહ્યું છે. સામાન્ય પ્રવાહમાં રાજ્યના 535 કેન્દ્રો પર પરીક્ષા યોજાઈ હતી, જેમાં 4,35,102 નિયમિત પરીક્ષાર્થીઓ ઉપસ્થિત રહ્યા હતા. જિલ્લા મુજબ સામાન્ય પ્રવાહમાં આહવા-ડાંગ જિલ્લો 97.88 ટકા સાથે મોખરે છે, જ્યારે અમદાવાદ શહેર 87.10 ટકા સાથે સૌથી ઓછું પરિણામ ધરાવતો જિલ્લો બન્યો છે. આ પ્રવાહમાં કુલ 2030 શાળાઓએ 100 ટકા પરિણામ મેળવી સિદ્ધિ હાંસલ કરી છે. પુનરાવર્તિત ઉમેદવારોનું પરિણામ 63.02 ટકા નોંધાયું છે.

રાજકોટ જિલ્લાનું પરિણામ
રાજકોટ જિલ્લાએ પણ શિક્ષણ ક્ષેત્રે પોતાનું વર્ચસ્વ જાળવી રાખ્યું છે. જિલ્લામાં વિજ્ઞાન પ્રવાહનું પરિણામ ગત વર્ષ કરતા 1 ટકા વધીને 93.36 ટકા નોંધાયું છે, જ્યારે સામાન્ય પ્રવાહનું પરિણામ 93.69 ટકા આવ્યું છે. રાજકોટમાં સામાન્ય પ્રવાહમાં 1184 વિદ્યાર્થીઓએ A1 ગ્રેડ અને વિજ્ઞાન પ્રવાહમાં 199 વિદ્યાર્થીઓએ A1 ગ્રેડ પ્રાપ્ત કર્યો છે.

ગુજરાત સ્ટેટ ઓપન સ્કૂલ (GSOS) નું પરિણામ
GSOS અંતર્ગત નોંધાયેલા નિયમિત ઉમેદવારોનું પરિણામ 61.60 ટકા આવ્યું છે. જેમાં 33,505 પરીક્ષાર્થીઓ ઉપસ્થિત રહ્યા હતા અને તેમાંથી 20,638 વિદ્યાર્થીઓ ઉત્તીર્ણ થયા છે. જ્યારે GSOS ના પુનરાવર્તિત ઉમેદવારોનું પરિણામ 60.13 ટકા નોંધાયું છે.

પરિણામ કઈ રીતે મેળવશો?
બોર્ડ દ્વારા વિદ્યાર્થીઓને પરિણામ જોવા માટે વિવિધ વિકલ્પો આપવામાં આવ્યા છે:
- વેબસાઇટ: વિદ્યાર્થીઓ www.gseb.org પર જઈને પોતાનો સીટ નંબર એન્ટર કરી સ્કોરકાર્ડ ડાઉનલોડ કરી શકે છે.
- WhatsApp: 6357300971 નંબર પર પોતાનો સીટ નંબર મોકલીને ત્વરિત પરિણામ મેળવી શકાય છે.
- SMS: વિજ્ઞાન પ્રવાહ માટે GJ12S [સીટ નંબર] અને સામાન્ય પ્રવાહ માટે GJ12G [સીટ નંબર] લખી 58888111 પર મેસેજ કરી શકાય છે.

ઉચ્ચ શિક્ષણની પ્રક્રિયા અને સાવચેતી
પરિણામ જાહેર થયા બાદ હવે એન્જિનિયરિંગ, ફાર્મસી અને અન્ય ઉચ્ચ શિક્ષણના અભ્યાસક્રમો માટે મેરિટ લિસ્ટની પ્રક્રિયા ટૂંક સમયમાં શરૂ કરવામાં આવશે. શિક્ષણ વિભાગે વિદ્યાર્થીઓને એડમિશન પ્રક્રિયા માટેના જરૂરી દસ્તાવેજો તૈયાર રાખવા અને બિનસત્તાવાર લિંક્સથી સાવધ રહેવા સૂચના આપી છે.