રાજ્યમાં સૌથી વધુ કપરાડામાં 6.77 ઈંચ વરસાદ નોંધાયો

ગુજરાતમાં ફરી એકવાર વરસાદી સિસ્ટમ સક્રિય થઈ છે અને તેના કારણે દક્ષિણ ગુજરાતમાં ધોધમાર વરસાદ જોવા મળ્યો છે. રાજ્યના વિવિધ વિસ્તારોમાં છેલ્લા 24 કલાક દરમિયાન વરસાદી માહોલ સર્જાયો છે. સ્ટેટ ઈમરજન્સી ઓપરેશન સેન્ટર (SEOC), ગાંધીનગર દ્વારા જાહેર કરવામાં આવેલા તાજા આંકડા મુજબ, 25 જુલાઈ 2025 સવારે 6 વાગ્યાથી 26 જુલાઈ સવારે 6 વાગ્યા સુધી રાજ્યના કુલ 71 તાલુકામાં વરસાદ નોંધાયો છે.

સૌથી વધુ વરસાદ વલસાડ જિલ્લાના કપરાડા તાલુકામાં 6.77 ઈંચ (172 mm) નોંધાયો છે. વલસાડ જિલ્લાના કુલ 6 તાલુકાઓમાં વરસાદ થયો છે, જેમાં વાપીમાં 4.17 ઈંચ, ધરમપુરમાં 1.85 ઈંચ, પારડીમાં 1.77 ઈંચ, વલસાડ શહેરમાં 1.34 ઈંચ અને ઉમરગામમાં 0.67 ઈંચ વરસાદ નોંધાયો છે.

રાજ્યના અન્ય વિસ્તારોમાં પણ નોંધપાત્ર વરસાદ થયો છે. નવસારીના ખેરગામમાં 2.24 ઈંચ, સુરતના માંગરોળમાં 2.05 ઈંચ અને માંડવીમાં 1.97 ઈંચ વરસાદ થયો છે. ડાંગના આહવામાં 1.3 ઈંચ અને સુબિરમાં 1.18 ઈંચ વરસાદ નોંધાયો છે.

આ સાથે જ રાજ્યના 91 પૈકીના 19 તાલુકાઓમાં માત્ર નામમાત્ર વરસાદ નોંધાયો છે, જ્યાં 1થી 2 mm જેટલો વરસાદ પડ્યો છે. હવામાન વિભાગ દ્વારા જણાવવામાં આવ્યું છે કે, અરબ સાગરમાં સર્જાયેલી સિસ્ટમના કારણે રાજ્યમાં વરસાદી માહોલ સર્જાયો છે.

હવામાન વિભાગે દક્ષિણ ગુજરાતના 5 જિલ્લાઓ વલસાડ, નવસારી, ડાંગ, દમણ અને દાદરા નગર હવેલી માટે ઓરેન્જ એલર્ટ જાહેર કર્યું છે, કારણ કે, અહીયાં આજે ભારેથી અતિ ભારે વરસાદ પડવાની સંભાવના છે.

અગાઉના દિવસોમાં પણ રાજ્યના કેટલાક વિસ્તારોમાં વરસાદ પડતાં ધંધા-રોજગાર પર જતા લોકોને ભારે હાલાકીનો સામનો કરવો પડ્યો છે.

ખાસ કરીને દક્ષિણ અને મધ્ય ગુજરાતમાં ધોધમાર વરસાદે જનજીવનને અસર કરી છે.