GPSC વર્ગ 1-2 પરીક્ષાનુ પરિણામ એક વર્ષથી પેન્ડિંગ!

ગુજરાત જાહેર સેવા આયોગ (GPSC) દ્વારા વર્ગ-1 અને 2ની 2023-24 ભરતી જાહેરાત અંતર્ગત જાન્યુઆરી-2024માં પ્રિલિમ પરીક્ષા લીધા બાદ ઓક્ટોબર-2024માં મુખ્ય પરીક્ષા લેવામાં આવી હતી. એક વર્ષ થવા છતાં હજુ સુધી મુખ્ય પરીક્ષાનું પરિણામ જાહેર નહી કરાતાં ઉમેદવારો મૂંઝવણમાં મૂકાયા છે. GPSC દ્વારા પરિણામ ક્યારે જાહેર થશે અને ક્યારે ઈન્ટરવ્યુ લેવાશે તેની સ્પષ્ટતા કરાતી નથી. તેના કારણે ઉમેદવારો અન્ય પરીક્ષા આપવા અંગે નિર્ણય લઈ શકતાં નથી.

GPSC વર્ગ 1 અને 2ની ભરતી અંતર્ગત ઓક્ટોબર-2024ની મુખ્ય પરીક્ષા આપનારા ઉમેદવારોએ આયોગમાં રજૂઆત કરી છે. વર્ષ 2023-24ની ભરતી જાહેરાત અંતર્ગત જાન્યુઆરી 2024માં પ્રિલિમ પરીક્ષા લેવામાં આવી હતી .જેમાં ક્વોલિફાઈ થનારા અંદાજે 9900 જેટલા ઉમેદવારોએ ઓક્ટોબર 2024માં મેઈન પરીક્ષા આપી હતી. મેઈન પરીક્ષાને એક વર્ષ કરતા વધુ સમય થઈ ગયો છે પરંતુ હજુ સુધી GPSC દ્વારા પરિણામ જાહેર કરવામાં આવ્યુ નથી.

ઉમેદવારોની ફરિયાદ છે કે GPSC માં હાલ માત્ર ચેરમેન અને અન્ય એક જ સભ્ય છે. જ્યારે પાંચ સભ્યોની જગ્યા ખાલી છે. ઓક્ટોબર-2024ની મુખ્ય પરીક્ષાનું પરિણામ જાહેર કરવામા આવતુ નથી અને નવી ભરતી પરીક્ષાઓ જાહેર કરીને લેવામાં આવી રહી છે. તેવા સમયે ઉમેદવારોએ નવી પરીક્ષાઓ માટે તૈયારી કરવી કે નહીં, પરીક્ષા આપવી કે નહીં તેની મૂંઝવણમાં મૂકાયા છે. પરિણામ મુદ્દે અનેક વખત પૂછપરછ કરવામા આવી છે. પરંતુ GPSC દ્વારા કોઈ સ્પષ્ટતા કરાતી નહી હોવાનો ઉમેદવારોએ આક્ષેપ કર્યો છે.  

માત્ર વેબસાઈટ જોતા રહેવુ તેવો જ જવાબ આપવામા આવે છે. બે વર્ષ પહેલા જાહેર થયેલી ભરતીમાં હજુ સુધી ફાઈનલ પસંદગી થઈ શકી નથી. મુખ્ય પરીક્ષાનું પરિણામ ક્યારે આવશે અને ક્યારે ઈન્ટરવ્યુ થશે તેને લઈને ઉમેદવારો ચિંતામાં મૂકાયા છે. આ ઉપરાંત આયોગમાં મેમ્બરો પણ પૂરતા ન હોવાથી ભરતી પરીક્ષાઓમાં ઈન્ટરવ્યુ પણ કઈ રીતે લેવાશે તે સવાલ ઉમેદવારોને સતાવી રહ્યો છે.

GPSC હવે "ડેડ-લાઇન" બની ગયુઃ યુવરાજસિંહ જાડેજા

વિદ્યાર્થી નેતા યુવરાજસિંહ જાડેજાએ GPSC અને UPSCની કાર્યશૈલી અંગે કટાક્ષ કર્યો છે. તેમણે જણાવ્યું કે, UPSC પરિણામમાં 70 દિવસ, GPSC માં 400 દિવસ, સિલેબસ કોપી કર્યો, પરંતુ કાર્યક્ષમતાની શાહી ખૂટી ગઈ છે. તેમણે UPSC અને GPSC વચ્ચેના તફાવત અંગે જણાવ્યું કે, તફાવત કે તંત્રની હાર? UPSCએ 31 ઑગસ્ટ, 2025 ના રોજ મેઈન એક્ઝામ પૂરી કરીને 70 દિવસમાં 14,000 ઉમેદવારોનું ચોકસાઈપૂર્વકનું લેખિત પરિણામ જાહેર કરી દીધું, જ્યારે GPSC ઓક્ટોબર 2024માં લેવામાં આવેલી મેઈન પરીક્ષાનું પરિણામ 13 મહિના (400 દિવસ) બાદ પણ આપી શક્યું નથી.

GPSCના ચેરમેનને સીધો સવાલ કરતાં તેમણે કહ્યું કે, હવે કહો સાહેબ, બહાનાબાજી ક્યાં સુધી? અહીં પ્રોવિઝનલ Answer Key તૈયાર કરવાના બહાના પણ નહીં ચાલે? UPSCના દરેક સ્ટેજ માટે ચોક્કસ સમયપત્રક, પારદર્શક પ્રક્રિયા અને નક્કર ડેડલાઈન હોય છે અને GPSC હવે ડેડલાઇન નહીં, "ડેડ-લાઇન" બની ગયું છે. UPSC જેવી પ્રક્રિયા, UPSC જેવી ગંભીરતા, અને UPSC જેવી ગતિ રાખી શકાતી નથી તો પછી GPSC નો સિલેબસ બદલીને UPSC જેવો બનાવવાના નાટક શા માટે?

યુવરાજસિંહ જાડેજાએ ગુજરાત જાહેર સેવા આયોગ(GPSC) ‘GUJARAT PUBLIC SERVICE COMMISSION’ ના બદલે ‘GUJARAT PUBLIC “SLEEPING” COMMISSION’ કહ્યું છે.