અમદાવાદના શહેરમાં અસામાજિક તત્વોના સમાચારમાં દિન-પ્રતિદિન વધારો થતો જોવા મળી રહ્યો છે. કાયદાનો ભાન ભૂલીને સમાજમાં આશાંતિ ફેલાવતા હોય છે. શહેરના વટવા વિસ્તારમાં અસામાજિક તત્વોની બેફામતાની વધુ એક ઘટના સામે આવી છે. વટવા નવાપુરા દરબાર નગરમાં સામાન્ય વિવાદે ગંભીર સ્વરૂપ ધારણ કર્યું હતું, જેમાં એક ટોળાએ એક પરિવારના ઘરમાં અને બહાર પાર્ક કરેલા બે ટુ-વ્હીલરમાં આગ લગાડી દીધી હતી. આગના કારણે ઘરમાં લાખો રૂપિયાનું નુકસાન થયું છે.
આ ઘટનાની શરૂઆત બે પાડોશીઓ વચ્ચેના સામાન્ય વિવાદથી થઈ હતી. વહીદાબાનુ શેખના પરિવાર અને તેમના પડોશી આમન ઉર્ફે રાજા અસલમખાન પઠાણના પરિવાર વચ્ચે ઘરની આગળની ખુલ્લી જગ્યામાં લાકડાં રાખવા બાબતે બોલાચાલી ચાલતી હતી. આગાઉ પણ શૌચાલયની બાબતે વિવાદ ચાલી જ રહ્યો હતો.&nbsp; શનિવારે સવારના સમયે રાજા પઠાણ, તેના પિતા અસલમખાન અને અન્ય બે સભ્યોએ મળીને વહીદાબાનુના પતિ સાથે બોલાચાલી કરી અને મારામારી કરી હતી. ઈજાગ્રસ્તોને સારવાર માટે હોસ્પિટલ લઈ જવાયા હતા.
ઝઘડાની અદાવતમાં બાઈક સળગાવી&nbsp;
સવારે થયેલા ઝઘડાની અદાવત રાખીને સાંજે રાજા પઠાણ અન્ય 4 લોકો સાથે હુમલો કરવા આવ્યા હતા. હોસ્પિટલમાં રહેલા ફરિયાદીને પરિચિત દ્વારા ફોન પર જાણ કરવામાં આવી કે રાજા પઠાણ અને અન્ય લોકો તેમનું ઘર સળગાવવા આવ્યા છે.
ટોળાએ સૌપ્રથમ ઘરની બહાર પડેલી બે મોટરસાયકલમાં આગ લગાડી દીધી. ત્યારબાદ, સળગતી બાઈકનું સીટ કવર કે અન્ય કોઈ સળગતી વસ્તુ બંધ મકાનની જાળીમાં ફેંકતા ઘરના ફર્નિચરમાં પણ આગ લાગી ગઈ. ઘરમાં આગથી લાખો રૂપિયાનું નુકસાન પણ થયું છે.&nbsp;
આ ઘટના બાદ તાત્કાલિક ફાયર બ્રિગેડ અને પોલીસને જાણ કરવામાં આવી. ફાયર ટીમે ઘટનાસ્થળે પહોંચીને આગ પર કાબુ મેળવ્યો હતો, પરંતુ ત્યાં સુધીમાં ઘરમાં રહેલું ફર્નિચર અને બંને ટુ-વ્હીલર બળીને ખાખ થઈ ગયા હતા.
જોકે, ઘરના માલીકે પોલીસ પર સમયસર કાર્યવાહી ન કરી હોવાનો ગંભીર આક્ષેપ લગાવ્યો છે. વટવા પોલીસે આ મામલે મુખ્ય આરોપી રાજા પઠાણ (જેનો અગાઉ પણ ગુનાહિત ઇતિહાસ છે) સહિત ચાર લોકો વિરુદ્ધ ફરિયાદ નોંધીને આગળની કાયદેસરની કાર્યવાહી હાથ ધરી છે.

ઝઘડાની અદાવતમાં અસામાજિક તત્વો બેફામ

સવારે ઝઘડો, સાંજે હુમલો: બાઈક સળગાવી સીટ કવર ઘરમાં ફેંક્યું, 4 સામે ફરિયાદ નોંધાઈ..

November 9, 2025 | 17:29 IST