ખેડૂતો માટે ખુશખબર: ખરીફ પાકોના ટેકાના ભાવમાં 69 થી 596 રૂપિયાનો વધારો

કેન્દ્ર સરકારે ખેડૂતોના ખરીફ પાકના ટેકાના ભાવમાં વધારો જાહેર કર્યો છે. કેન્દ્રીય કેબિનેટે વર્ષ 2025-2026 માટે ટેકાનો ભાવ જાહેર કર્યો છે. ખેડૂતોને આર્થિક સુરક્ષા મળી રહે અને ખેતપેદાશોના પોષણક્ષમ ભાવ મળી રહે તે માટે ટેકાના ભાવમાં ગત વર્ષની સરખામણીએ પ્રતિ ક્વિન્ટલે રૂપિયા 69 થી 589 સુધીનો વધારો કર્યો છે.

ખેડૂતોમાં ખરીફ પાકોની વાવેતરની તૈયારીઓ શરૂ કરી છે. મગફળી, કપાસ, ડાંગર, જુવાર, બાજરી, રાગી, મકાઈ, તુવેર, મગ, અડદ અને સોયાબીન જેવા ખરીફ પાકોનું ચોમાસા દરમિયાન વાવેતર થતું હોય છે. ખરીફ પાકનું વાવેતર થાય તે પહેલાં કેન્દ્ર સરકારે ટેકાના ભાવ જાહેર કર્યા છે. ખેડૂતો માટે ખરીફ પાકના લઘુત્તમ ભાવ નક્કી કરવામાં આવ્યા છે.

કેન્દ્રીય કેબિનેટે બુધવારે ખરીફ પાકો માટે ટેકાના ભાવ જાહેર કર્યા હતા. ખેડૂતો કૃષિ પાકનું આગોતરૂ આયોજન કરી શકે તે માટે કેન્દ્ર સરકાર દ્વારા દર વર્ષે ખરીફ અને રવિ પાકો માટે વાવેતર પહેલાં ટેકાના ભાવ જાહેર કરવામાં આવતા હોય છે. વર્ષ 2025-26માં ટેકાના ભાવ વધારવાનો નીતિ વિષયક નિર્ણય કરાયો હતો.

કેન્દ્ર સરકારે પ્રતિ ક્વિન્ટલે મગફળી માટે રૂપિયા 7,263, કપાસ (લંબતારી) માટે રૂપિયા 8110, ડાંગર માટે રૂપિયા 2369, જુવાર માટે રૂપિયા 3699, બાજરી માટે રૂપિયા 2775, રાગી માટે રૂપિયા 4886, મકાઈ માટે રૂપિયા 2400, તુવેર માટે રૂપિયા 8000, મગ માટે રૂપિયા 8768, અડદ માટે રૂપિયા 7800, સોયાબીન માટે રૂપિયા 5328, અને તલ માટે રૂ. 9846 ભાવ જાહેર કરવામાં આવ્યો છે.

ગત વર્ષની સરખામણીએ રાગી, કપાસ(લંબતારી) અને તલના ટેકાના ભાવમાં પ્રતિ ક્વિન્ટલ સૌથી વધુ ભાવ જાહેર કરવામાં આવ્યો છે. રાગીમાં રૂપિયા 596, કપાસ(લંબતારી)માં રૂપિયા 589 અને તલમાં રૂપિયા 579નો વધારો કરાયો છે. આ ઉપરાંત રાજ્યના મુખ્ય પાક મગફળીના ટેકાના ભાવમાં પ્રતિ ક્વિન્ટલે રૂપિયા 480નો વધારો કરવામાં આવ્યો છે.