પોલીસ અને પંચાયત અધિકારીના એજન્ટો ACBના જાળમાં

ગુજરાત એન્ટી કરપ્શન બ્યુરો (ACB)એ છેલ્લા ત્રણ દિવસમાં લાંચના બે અલગ-અલગ કેસમાં ઝડપી કાર્યવાહી કરી છે. એક કેસમાં ગોધરા SRP ગ્રુપ-5ના ASI અને તેના મિત્રને 1.44 લાખની લાંચ લેતા ઝડપ્યા, જ્યારે બીજા કેસમાં ભાવનગરના સિહોર તાલુકા પંચાયતના વિસ્તરણ અધિકારી વતી 2 લાખ લાંચ લેવા આવેલો અમદાવાદનો પોલીસ કોન્સ્ટેબલ અને તેનો સાથી ઝડપાયા છે.

1. ગોધરા SRP ASI અને AMC સુપરવાઈઝર 1.44 લાખની લાંચમાં ઝડપાયા

19 નવેમ્બરના રોજ ACBની બે ટીમોએ એકસાથે કાર્યવાહી કરી હતી. ગોધરા SRP ગ્રુપ-5માં ફરજ બજાવતા ASI રોશનકુમાર અનિલભાઈ ભુરિયા (ઉં.વ. 42, રહે. ઝાલોદ પાસે ગામડી) તથા તેમના બાળપણના મિત્ર અને અમદાવાદ મહાનગરપાલિકાના પૂર્વ ઝોન સોલિડ વેસ્ટ કલેક્શનમાં કોન્ટ્રાક્ટ બેઝ સુપરવાઈઝર ડામોર પ્રિન્સ ઉર્ફે વિક્કી મુકેશભાઈ ડામોર (રહે. ઝાલોદ પાસે ગામડી)ને લાંચ લેતા રંગેહાથ ઝડપી લીધા હતા.

આ કેસની વિગતો આ પ્રમાણે છે:

• અમદાવાદના ગિફ્ટ આર્ટિકલ્સના વેપારીએ ગોધરા SRPની “ધી કર્મચારી ધિરાણ ગ્રાહક સહકારી મંડળી”ને 670 ગિફ્ટ આર્ટિકલ્સનો ઓર્ડર આપ્યો હતો.
• ઓર્ડરની કુલ રકમ ₹8,37,500 હતી, જેમાંથી ₹97,000 રોકડા આપ્યા બાદ બાકીના 30% એટલે ₹2.51 લાખની લાંચ માંગવામાં આવી હતી.
• બાકીના ₹1.44 લાખ લેવા ASI રોશન ભુરિયાના મિત્ર વિક્કી ડામોર વેપારીની ઓફિસે પહોંચ્યા, જ્યાં તેઓ ACBના જાળમાં ફસાયા.
• બીજી ટીમે ASI રોશન ભુરિયાને ઓઢવ-વિશાલા પાસે AMC પાર્કિંગમાંથી ઝડપી પાડ્યા હતા.

2. સિહોર તાલુકા પંચાયત અધિકારી વતી 2 લાખ લેવા આવેલો બોડકદેવ પોલીસ કોન્સ્ટેબલ ઝડપાયો

બીજી ઘટના 21 નવેમ્બરની છે. ભાવનગર જિલ્લાના સિહોર તાલુકા પંચાયતમાં વિસ્તરણ અધિકારી દશરથસિંહ પાંચાભાઈ ચૌહાણે પૂર્વ કલસ્ટર કો-ઓર્ડિનેટરને ફરી નોકરી આપવા, બાકી પગાર છોડાવવા અને પોલીસ ફરિયાદ ન કરવા સામે ₹2 લાખની લાંચ માંગી હતી.

• ફરિયાદી અમદાવાદની આંખની હોસ્પિટલમાં હાજર હતા ત્યારે લાંચિયા અધિકારીએ ઉતાવળમાં લાંચ લેવા પોતાના કૌટુંબિક ભાણા એટલે કે બોડકદેવ પોલીસ સ્ટેશનમાં ફરજ બજાવતા કોન્સ્ટેબલ રૂતુરાજસિંહ ધીરૂભાઈ પરમારને મોકલ્યા.
• કોન્સ્ટેબલ રૂતુરાજસિંહે પોતાના મિત્ર જીગર ઠક્કરને સાથે લઈને પ્રહ્લાદનગર વિસ્તારમાં ₹2 લાખની લાંચ લેતા ACBએ બંનેને રંગેહાથ પકડી પાડ્યા.
• મુખ્ય આરોપી વિસ્તરણ અધિકારી દશરથસિંહ ચૌહાણ અને તેનો ખાનગી વહીવટદાર વિરેન્દ્રસિંહ પ્રહલાદસિંહ ગોહિલ હજુ ફરાર છે.

આ બંને કેસમાં ACBએ ઝડપથી કાર્યવાહી કરીને લાંચિયા તંત્રના એજન્ટોને પકડ્યા છે, જ્યારે મુખ્ય આરોપીઓની શોધખોળ ચાલુ છે. ગુજરાતમાં ભ્રષ્ટાચાર વિરોધી કાર્યવાહીઓએ ફરી એકવાર ઝડપ પકડી છે.